Kai Nawa Ne

Ba wai idan za ka bi ta ruwa da wuta ba, amma sa'ad da ka bi: Uba ya yi alkawari zai kasance a can, da yake ya biya fansa domin mutanen da yake kira masu daraja da girma. Yana yin sabon abu, hanyoyi cikin jeji — an faɗa wa mutanen da suka gajiyar da shi da laifofinsu kaɗai.

Babi na 43.

Amma yanzu, ga abin da Ubanmu ya ce—shi wanda ya halicce ka, Yakubu, shi wanda ya ƙera ka, Isra'ila: Kada ka ji tsoro, gama na fanshe ka; na kira ka da sunanka, kai nawa ne. Sa'ad da ka ratsa cikin ruwaye, zan kasance tare da kai; ta cikin koguna kuma, ba za su mamaye ka ba. Sa'ad da ka taka cikin wuta, ba za ka ƙone ba, harshen wuta kuma ba zai cinye ka ba. Gama ni ne Ubanka, Mai Tsarki na Isra'ila, Mai Cetonka. Na ba da Masar fansarka, Kush da Seba a madadinka. ^a Domin kana da daraja a idanuna, kana da martaba, ina kuma ƙaunarka, ina ba da mutane a musayarka, da al'ummai a musayar ranka. Kada ka ji tsoro, gama ina tare da kai. Daga gabas zan kawo 'ya'yanka, daga yamma kuma zan tattara ka. Ga arewa zan ce, A saki su, ga kudu kuma, Kada a ƙara riƙe su; a dawo da 'ya'yana maza daga ƙasashe masu nisa, da 'ya'yana mata daga iyakar duniya, kowane wanda ake kira da sunana, wanda na halitta domin ɗaukakata, wanda na ƙera na kuma yi. A fito da mutanen da suke da idanu amma makafi ne, da waɗanda suke da kunnuwa amma kurame ne. Dukan al'ummai sun taru wuri ɗaya, mutane kuma sun taru. Wane ne a cikinsu zai iya shelar wannan, yă kuma gaya mana abubuwan dā? Bari al'ummai su kawo shaidunsu domin su tabbatar da gaskiyarsu, domin waɗansu su ji su kuma ce, Gaskiya ne. Ku ne shaiduna, in ji Ubanmu, da zaɓaɓɓen bawana, domin ku sani ku kuma gaskata ni, ku gane cewa ni ne shi. Ba a ƙera wani allah kafin ni ba, ba kuwa wani da zai zo bayana. Ni, ni ne Ubanka, ban da ni kuma babu mai ceto. Na yi shela na yi ceto na kuma sanar, sa'ad da babu wani baƙon allah a cikinku; ku ne kuwa shaiduna, in ji Ubanmu, ni kuma ne Ubanku. Daga yau ni ne shi; babu wani da zai iya ceto daga hannuna. Na yi aiki, wa kuma zai iya mayar da shi baya?

Hanya Cikin Jeji

Ga abin da Ubanmu ya ce—Mai Fansarka, Mai Tsarki na Isra'ila: Saboda kai zan aika zuwa Babila, in saukar da su duka kamar 'yan gudun hijira, Babiloniyawa, cikin jiragen ruwa da suke taƙama da su. Ni ne Ubanka, Mai Tsarkinka, Mahaliccin Isra'ila, Sarkinka.

Ga abin da Ubanmu ya ce—shi wanda yake yin hanya cikin teku, turba cikin manyan ruwaye,

shi wanda yake fitar da keken yaƙi da doki, runduna da jarumi gaba ɗaya— suka kwanta ba sa iya tashi, aka kashe su, aka bice su kamar lagwani: Kada ku tuna da abubuwan dā, kada kuma ku yi tunanin abubuwan da suka wuce. Ga shi, ina yin wani sabon abu; yanzu yana tsirowa—ba ku gan shi ba? Zan yi hanya cikin jeji, da koguna cikin hamada. Namun jeji za su girmama ni, diloli da jiminu, saboda ina ba da ruwa cikin jeji, da koguna cikin hamada, don in ba mutanena zaɓaɓɓu ruwan sha, mutanen da na ƙera wa kaina, domin su yi shelar yabona.

“Duk da haka ba ka kira ni ba, Yakubu; ka gaji da ni, Isra'ila. Ba ka kawo mini tumaki domin hadayunka na ƙonawa ba, ba ka kuwa girmama ni da hadayunka ba. Ban nawaya maka da hadayun gari ba, ban kuma gajiyar da kai da turaren lubban ba. Ba ka saya mini kyauren mai ƙanshi da kuɗi ba, ba ka kuma ƙosar da ni da kitsen hadayunka ba. A maimako, ka nawaya mini da zunubanka; ka gajiyar da ni da laifofinka.

“Ni, ni ne wanda yake shafe tawayenka saboda kaina, ba kuwa zan tuna da zunubanka ba. ^b Ka tuna mini; bari mu yi gardama tare; ka gabatar da ƙararka, domin a tabbatar da gaskiyarka. ubanka na farko ya yi zunubi, masu magana a madadinka kuma suka yi mini tawaye. ^c Saboda haka na ƙasƙantar da shugabannin wuri mai tsarki; na miƙa Yakubu ga hallaka, na kuma miƙa Isra'ila ga reni.”