Ruhuna a kan 'Ya'yanka

Uba ya yi alkawarin zubo ruwa da Ruhu a kan 'ya'yan Isra'ila. Sa'an nan an daɗe ana dubin mutumin da yake ƙone rabin itace don ya gasa abincinsa, ya kuma rusuna wa sauran rabin, yana roƙonsa ya cece shi. Gāba da wannan, an share zunubai kamar hazon safiya.

Babi na 44.

Amma yanzu ka saurara, Yakubu bawana, Isra'ila wanda na zaɓa. Ga abin da Ubanmu ya ce—shi wanda ya halicce ka, wanda ya ƙera ka tun cikin mahaifa, zai kuwa taimake ka: Kada ka ji tsoro, Yakubu bawana, Yeshurun wanda na zaɓa. ^a Gama zan zuba ruwa a kan ƙasa mai ƙishi, da magudanan ruwa a kan busasshiyar ƙasa; zan zuba Ruhuna a kan 'ya'yanka, da albarkata a kan zuriyarka. Za su tsiro a cikin ciyawa kamar itatuwan wardi a gefen magudanan ruwa masu gudu. Wani zai ce, “Ni na Uba ne”; wani kuma zai kira kansa da sunan Yakubu; wani kuwa zai rubuta a hannunsa, “Na Uba,” yă kuma ɗauki sunan Isra'ila.

Na Farko da Na Ƙarshe

Ga abin da Ubanmu ya ce—Sarkin Isra'ila da kuma Mai Fansarsa, Uba na rundunonin Sama: Ni ne na farko, ni ne kuma na ƙarshe; ban da ni babu wani allah. Wane ne kamar ni? Bari yă yi shelarsa. Bari yă furta yă kuma shimfiɗa shi a gabana, tun ranar da na kafa mutanen dā. Bari su faɗi abin da yake zuwa, da abin da zai kasance nan gaba. Kada ka yi rawar jiki, kada ka ji tsoro. Ashe, ban gaya maka tun dā ba, na kuma furta shi? Ku ne shaiduna. Akwai wani Uba ban da ni? Babu wani Dutse; ban san ko ɗaya ba.

Duk masu yin gumaka ba kome ba ne, abubuwan da suke ƙauna kuwa ba su da amfani. Shaidunsu ba sa gani, ba sa sani, saboda haka za su sha kunya. Wane ne yake yin wani allah, ko yă zuba gunki, wanda ba ya wa mai yinsa kome? Duba—dukan abokansa za su sha kunya, gama masu sana'ar mutane ne kawai. Bari su taru duka su tsaya a tsaye; za su firgita su kuma sha kunya tare.

Maƙeri yakan ƙera kayan aiki na ƙarfe, yana sarrafa shi a kan garwashi; yakan buge shi da guduma yă kuma ƙera shi da ƙarfin hannunsa. Duk da haka yakan ji yunwa, ƙarfinsa kuma yă ƙare; ba ya shan ruwa, sai yă karaya. Masassaƙi yakan miƙa igiyar awo yă kuma yi wa itacen alama da alƙalami; yakan sassaƙa shi da kayan sassaƙa yă kuma yi masa alama da kamfas. Yakan sassaƙa shi yă zama siffar mutum, da kyau irin na mutum, domin yă zauna a wurin tsafi. Yakan sare itatuwan al'ul, ko yă zaɓi itacen saifires ko itacen oak, yă bar shi yă yi ƙarfi a cikin itatuwan jeji. Yakan shuka itacen al'ul, ruwan sama kuma yă sa shi yă yi girma. Yakan yi amfani da shi don itacen wuta. Yakan ɗauki sashensa yă ji ɗumi; yă hura wuta yă kuma toya burodi. Amma yakan kuma yi wani allah yă bauta masa; yă yi gunki yă durƙusa masa. Yakan ƙone rabin itacen a wuta; a kansa yă gasa nama, yă ƙoshi, yă kuma ji ɗumi. Yakan ce, “Kai, na ji ɗumi; ina jin wutar.” Daga saura kuma yakan yi wani allah, gunkinsa; yă durƙusa masa yă bauta, yă yi masa addu'a yă ce, “Ka cece ni, gama kai ne allahna!”

Ba su san kome ba, ba su gane kome ba; an rufe idanunsu don kada su gani, haka ma zukatansu, don kada su gane. Babu wanda yake tsayawa yă yi tunani, babu wanda yake da sani ko hikimar da zai ce, “Rabinsa na ƙone a wuta; na ma toya burodi a kan garwashinsa, na gasa nama na ci. Zan mai da sauran yă zama abin ƙyama? Zan durƙusa wa guntun itace?” Yana cin toka; zuciya mai ruɗu ta ɓatar da shi. Ba zai iya ceton kansa ba, ko yă ce, “Ashe, ba ƙarya ce a hannun damana ba?”

Ka tuna da waɗannan abubuwa, Yakubu, da kai kuma, Isra'ila, gama kai bawana ne. Na ƙera ka; kai bawana ne. Isra'ila, ba zan manta da kai ba. Na share tawayenka kamar girgije, zunubanka kamar hazon safiya. Ka komo gare ni, gama na fanshe ka.

Ku rera waƙa, ya sammai, gama Ubanmu ya aikata shi! Ku yi sowa da ƙarfi, ya zurfafan ƙasa. Ku ɓarke da waƙa, ya duwatsu, ya jeji, da kowane itace a cikinsa! Gama Ubanmu ya fanshe Yakubu, ya kuma bayyana ɗaukakarsa cikin Isra'ila.

Ga abin da Ubanmu ya ce—Mai Fansarka, wanda ya ƙera ka tun cikin mahaifa: Ni ne Ubanka, Mahaliccin dukan abubuwa, wanda ni kaɗai na shimfiɗa sammai, wanda na baza ƙasa ni kaɗai, wanda nake ɓata alamun annabawan ƙarya nake kuma mai da masu duba wawaye, wanda nake kakkaɓe ilimin masu hikima nake kuma mai da saninsu wauta, wanda yake tabbatar da maganar bawansa yake kuma cika shawarar manzanninsa, wanda yake cewa game da Urushalima, “Za a zauna a cikinta,” da kuma game da biranen Yahuda, “Za a sāke gina su, zan kuma maido da kufansu,” wanda yake ce wa zurfin ruwa, “Ka bushe; zan busar da kogunanka,” wanda yake cewa game da Sairus, “Shi makiyayina ne, zai kuma cika dukan abin da nake so”; wanda yake cewa game da Urushalima, “Za a sāke gina ta,” da kuma game da haikali, “Za a kafa harsashinka.”