加拉太書 3

3 ¹無知嘅加拉太人啊,係邊個迷惑咗你哋呢?耶穌基督釘十字架嘅情景,曾經清清楚楚擺喺你哋眼前。 ²我只想問你哋一件事:你哋領受聖靈,係靠住行律法,定係靠住聽信福音呢? ³你哋咁無知嘅咩?你哋既然靠聖靈開始,而家反而想靠人嘅努力去得到完全咩? ⁴你哋受咗咁多苦,難道係徒然嘅咩?若果真係徒然就好可惜喇。 ⁵咁,我哋嘅父豐豐富富咁賜聖靈畀你哋,又喺你哋當中行神蹟,佢咁樣做係靠住行律法,定係靠住聽信福音呢? ⁶正如亞伯拉罕一樣:「佢信我哋嘅父,呢份信心就算佢為義。」 ⁷所以你哋要明白,有信心嘅人,先至係亞伯拉罕嘅兒女。

⁸聖經早就預先睇到,我哋嘅父會叫萬國因信稱義,所以預先將福音傳畀亞伯拉罕,話:「萬國都要因你得福。」

⁹咁,有信心嘅人就同有信心嘅亞伯拉罕一齊蒙福。

¹⁰凡係倚靠行律法嘅人,都喺咒詛之下,因為經上記住:「凡係唔常常遵守律法書上所寫嘅一切嘅人,就受咒詛。」 ¹¹好明顯,喺我哋嘅父面前,冇人係靠律法稱義嘅,因為:「義人必因信得生。」 ¹²但係律法唔係本於信心;反而係:「行呢啲事嘅人,就必因呢啲事得生。」

¹³基督為咗我哋成為咒詛,將我哋從律法嘅咒詛之下贖返出嚟,因為經上話:「凡係掛喺木頭上嘅,都受咒詛。」 ¹⁴佢咁樣做,係要叫亞伯拉罕嘅福,喺基督耶穌裏面臨到萬國,好等我哋可以藉住信心領受所應許嘅聖靈。

應許長存,律法服侍

¹⁵弟兄姊妹啊,等我用人嘅講法嚟講:一份已經立定嘅人間盟約,冇人可以廢除或者添加。 ¹⁶呢啲應許係向亞伯拉罕同佢嘅後裔講嘅。經上唔係話「同眾後裔」,好似指住好多個;而係話「同你嘅後裔」,指住一個,呢個就係基督。 ¹⁷我嘅意思係咁:律法喺四百三十年之後先至嚟到,並唔能夠廢除我哋嘅父早就立定嘅約,以致令個應許失效。 ¹⁸若果基業係本於律法,就唔再係本於應許喇;但係我哋嘅父係藉住應許,將基業賜畀亞伯拉罕。

¹⁹咁,律法係為咩而有呢?律法係因為過犯而添加上去,直到嗰位承受應許嘅後裔嚟到;律法係藉住天使,經一位中保嘅手而設立嘅。 ^a a v19 猶太人嘅傳統認為,神喺西奈山藉住天使做中間人,將律法交畀摩西。 ²⁰凡有中保,就唔係單為一方;但係我哋嘅父係獨一嘅。

²¹咁,律法係咪同我哋父嘅應許相反呢?絕對唔係!若果曾經有一條律法能夠賜生命,義就真係本於律法喇。 ²²但係聖經把萬物都圈喺罪之下,好等所應許嘅,可以藉住信耶穌基督,賜畀所有信嘅人。

²³喺信心未嚟到之前,我哋被律法看守,被圈住,直到將要顯明嘅信心臨到。 ²⁴咁,律法就係我哋嘅啟蒙老師,帶我哋到基督嗰度,好叫我哋可以因信稱義。 ²⁵但係而家信心既然嚟到,我哋就唔再喺啟蒙老師之下喇。

藉住信心成為我哋父嘅兒女

²⁶因為你哋眾人喺基督耶穌裏面,都藉住信心成為我哋父嘅兒女。 ²⁷你哋凡係受洗歸入基督嘅,都已經披戴咗基督。 ²⁸並冇分猶太人或者希臘人,並冇分奴隸或者自由人,並冇分男或者女;因為你哋喺基督耶穌裏面都成為一體。 ²⁹你哋若果屬於基督,就係亞伯拉罕嘅後裔,係按住應許承受基業嘅人。