Galatianao 3

3 ¹Mangkhama̱ Galatianaobing, khipāna nathumli minam ngasakkhala? Nathumwui miktāli Jishu Khristali krushli shaoshān kahaia da chithei kahaina. ²Ina nathumwui eina hi mānga theikhui ngaingai: nathumna Manglā Kathara chi ainwui otsakna samphanglā, lah shitkasangna nganā eina samphanglā? ³Nathum hipā mangkhama̱la? Manglā eina sāphokhaira, ara nathum mikumowui chotlak eina kāshung ngasakngailā? ⁴Nathumna kachotkachāng kachungkha arema eina phunghaila, shokta arema eina leihaiakha? ⁵Chieina nathumli Manglā Kathara hekmaheilak eina mikhame kala nathumwui alungli matakhak kahai ot sākhame ithumwui Avāna hi ainwui otsakna sāla, lah shitkasangna nganā eina sāla? ⁶Abrahamwui pongli chithada shokhaowa: "Ana ithumwui Avāli shitsanga, kala chi ali khamashung khangaronga da shānkhui." ⁷Chieina shitkasanga mibing china Abrahamwui ara̱-azāna kaji theilu.

⁸Katharatuina, ithumwui Avāna yurbingli shitkasangna mashungmira da sāngngarānda theilaga, Abrahamli paokaphā chi sāngngarānda hāngkahai: "Nawui eina yur saikora sokhami ngasāra."

⁹Chieina shitkasanga mibing china shitkasanga mi Abraham eina ngasoda sokhami ngasāra.

¹⁰Kaja ainwui otsakna chihān mi saikora khonkashiwui azingli lei, khikhalajila hithada kapihaida lei: "Ainwui lairikli kapihai saikora chi masāchingakha mi saikora khonkashi kahaina." ¹¹Tharlak eina, ainna ithumwui Avāwui mangāli mi khipālikha mamashungmirarmana: "Khamashunga mina shitkasangna ringra." ¹²Kha ain hiya shitkasangli mapheisinmana; chiwui mahutliva, "Chibing kasā mi china chieina ringra."

¹³Khristana ithumwui vang khonkashi sāhaoda ithumli ainwui khonkashiwui eina ngatangmihaira. Kaja hithada kapihaida lei, "Thingtungli phāshi sākahai mi saikora khonshi kahaina." ¹⁴Abrahamwui sokhami chi Khrista Jishuwui mangā eina yurbingli kharā khavai, kala ithumna ngashitmi kahai Manglā Kathara chi shitkasangwui mangā eina samphang khavai, ana hi sai.

Tuingashit Nganinga, Ainna Otram Ngatha̱

¹⁵Ivānaobing, ina mikumo akha thada kahāngna: mikumowui tuingashit mashungmi kahai chi khipānakha mashimān ngasakla lah chili masangpaimana. ¹⁶Ngashitmi kahaibing china Abraham eina awui ara̱-azāli hāngkahaina. "Ara̱-azābingli" da kachungkha thada mahāngmana, kha "nawui ara̱-azāli" da mānga chi hāngkahaina, chiya Khristana. ¹⁷Iwui kahāng china hina: zingkum 430 khaleilaga kharā ain china, ngashitmi kahai chi arema ngasak khavai, ithumwui Avāna sāngngarānda mashungmi kahai tuingashit chi mashimān ngasakmana. ¹⁸Shimlui hi ainwui mangā eina kharā jiakha, ngashitmi kahaiwui mangā eina maningluimana. Kha ithumwui Avāna ngashitmi kahai mangā eina Abrahamli mi.

¹⁹Chithākha khi eina ain leikhala? Ngashit kahai ara̱-azā chi kharāranglakha eina tangda, khayonkhamāngwui vang eina chi ngarumsanga. Kazingraobingwui mangā eina ngashikkhame akhawui pāngli chi ngarānserhaina. ^a a v19 Jihudibingna hithada shitsang kahaina: Varena kazingraobingwui mangā eina Sinai phungreili Mosesli ain mihaina. ²⁰Ara ngashikkhame hi akhamāngwui vang maningmana; kha ithumwui Avā akhamānga.

²¹Chithākha ain hi ithumwui Avāwui ngashitmi kahaibingli ngakaikashina? Maningphutmana! Ain akhana kharing mikapaisi kaja, khamashung khangarong hi kachangkhat eina ainwui mangā eina kharāla. ²²Kha Kathara lairikna moreiwui azingli ot saikora shungkahaina, chiwui vang eina ngashitmi kahai chi Jishu Khristali shitkasang mangā eina shitsang mibingli mikhavaina.

²³Shitkasang marāranglakha ayā kathā, kharā shitkasang chi phongmiranglakha eina tangda, ithum ainwui azingli phārihaida shungkahaina. ²⁴Chieina shitkasangna ithumli mashungmi khavai, ain hi Khristawui atam eina tangda ithumwui mayonkhame sai. ²⁵Kha ara shitkasang kharāhaoda, ithum mayonkhamewui azingli maleiluimana.

Shitkasang Mangā eina Avāwui Naongarā

²⁶Kaja shitkasang mangā eina Khrista Jishuli nathum saikora ithumwui Avāwui naongarāsera. ²⁷Kaja Khristali ra̱hikmi kahai nathum saikora Khrista eina vāpānhaira. ²⁸Jihudi eina Greek, rao eina ningkhān kahaibing, mayarnao eina sha̱nao khangatei maleiluimana; kaja nathum saikora Khrista Jishuli akhamānga. ²⁹Kala nathum Khristawuina jiakha, nathum Abrahamwui ara̱-aza̱sera, ngashit kahai athishurda shimluikatbingsera.