Paulwui paokaphā Jerusalemli shāptitmi
Paulna awui paokaphā chi Jerusalemli khuivāda, kathāna kasaa mibingna chili khikha mayāngmana. Chiwui thili Peterna ngacheeda Gentilebing eina ngasoda mashaithuwa kaji theilaga Paulna ali maingatlak eina hānga. Ainwui otsakna khipalikha mamashungmirarmana; Paul ara ithumwui Avāwui Naomayarali shitkasang eina kharingna.
2 1Zingkum tharāda matiwui thili, ina Barnabas eina ngasoda Titusli thānlaga Jerusalemli khavāluishita. 2Ina phongmi eina khavai, kala aremali makhuizat, lah aremali makhuizathai kaji khavai, Gentilebingli iwui hāshok paokaphā chi khayākakā mibingli ngathumsāda theingasaka. 3Kha iwui ngasokazat Titus, Greek nijilala, ahui rimshok khavai tandi masāmana. 4Hi kakapik ivānaobingli vangna. Ngathumda khuizangmi kahai athum china ithumli raonao sāngasak khavai ngaranda, Khrista Jishuli ithumna khalei ningkhān chi ra̱yang khavai ngathumsāda zanghaowa. 5Chithākha paokaphāwui khamashung chi nathumli leichingra khavai, ithumna hunkha akhala eina tangda athumli makhuisangmana. 6Khayākakā mibingwui pongli, athum khikha jilala ili khangatei maleimana; kaja ithumwui Avāna mijang mavaimana. Khayākakā mibingna ili khikha maronmimana. 7Chithālala, ahui rimkashokbingli Peterli horsangmi kahai thada, ahui marimkashokbingli hāshok khavai paokaphā chi ili horsangmi kahaina da athumna thei. 8Kaja ahui rimkashokbingwui paokazata sākhavai Peterli ot kasā ā china, Gentilebingwui vang ilila ot sai. 9Ili mikahai lukhamashan chi machutta, pākra̱ da nganaiya James, Peter kala Johnna, inina Gentilebingli, athumna ahui rimkashokbingli vākhavai, ili kala Barnabasli ngarumsakwui yāpang mi. 10Athumna inina kachāmabingli phaningung khavai mashichinla poi. Chi iva sākhavai sangaiya ot chimānga.
Paulna Antiochli Peterli yet
11Kha Peterna Antiochli rā tharan, ina ali awui mangāli yeta, kaja a yonngasak kahaina. 12Jameswui eina kaikhana mibing rāranglakha eina tangda ana Gentilebingli phazāruma; kha athum rā tharan, ahui rimkashoka mibingli ngacheehaoda, ana zatthui khalatta ngatei ngasaka. a a v12 "Ahui rimkashoka mibing"—Gentile shitkasangbingli ungshung eina khuisang khavai ahui rimshokphalungra da khakā kahai Jihudi Khristiannaobing. 13Khangatei Jihudibingna ali hi sākhaninga otli ngarumsak, chieina Barnabasla athumwui sākhaninga eina khuivāhaira. 14Kha athumna paokaphāwui khamashung athishurda mashunga eina mazatla lei kaji ina thei tharan, ina mi saikorawui mangāli Peterli hānga, "Na Jihudi nijilala, Jihudi thada mazatla Gentile thada okthuiakha, khisāda Gentilebingli Jihudi thada okthui khavai tandi sarakhala?"
15Ithum kachichā kapharāwui eina thuida Jihudibingna, kala Gentile morei kaphungbing maningmana, 16chithālala mi akha hi ainwui ot kasā eina maningla, Jishu Khristali shitkasang eina Varena mashungmi kaji ithumna thei. Ithumlila ainwui ot kasā eina maningla, Khristali shitkasang eina Varena mashungmi khavai Khrista Jishuli shitsanga. Kaja ainwui ot kasā eina mi akhala mashungmi maleimana. 17Kha Khristali Varena mashungmi khavai phalak eina, ithum kachichā morei kaphungbing da samphangakha, chithākha Khrista hi moreiwui rao khala? Maningphutmana! 18Kaja ina sākhai kahai chi sakāluishitakha, ina I khalatta yonngasakhaira da chitheira. 19Kaja ithumwui Avāli ringkhavai, ain mangā eina ina ainwui pongli thihaira. 20Ina Khristali ngasoda krushtungli shaothathaira. Ina maringluimana, kha iwui lungli khalei Khrista china ringa. Ara ina phasāli ringda khalei mirin chi, ili leishida kala iwui vang a khalattawui manglā chihokhami ithumwui Avāwui Naomayarali shitkasang mangā eina ina ringa. 21Ina ithumwui Avāwui lukhamashan chi makhalanmana; kaja khamashung khangarong chi ain mangā eina kharā jisi kaja, Khrista chi ngalang maleila thihaira.
