ገላትያ 2

2 ¹ከዐሥራ አራት ዓመት በኋላ ከበርናባስ ጋራ ቲቶንም ይዤ እንደገና ወደ ኢየሩሳሌም ወጣሁ። ²በመገለጥም ወጣሁ፤ በአሕዛብ መካከል የምሰብከውን ወንጌል ለተከበሩት ለብቻቸው አቀረብሁላቸው፤ ይህም የምሮጠው ወይም የሮጥሁት በከንቱ እንዳይሆን ነበር። ³ከእኔ ጋራ የነበረው ቲቶ እንኳ ግሪክ ቢሆንም እንዲገረዝ አልተገደደም። ⁴ይህ የሆነው በስውር በገቡ ሐሰተኞች ወንድሞች ምክንያት ነበር፤ እነርሱም በክርስቶስ ኢየሱስ ያለንን ነጻነት ለመሰለል ሾልከው የገቡ፣ ሊያስገዙን የፈለጉ ነበሩ። ⁵የወንጌል እውነት ከእናንተ ጋራ ጸንታ እንድትኖር ለቅጽበት እንኳ አልተገዛንላቸውም። ⁶ስለ ተከበሩቱ ግን፦ የቀድሞ ማንነታቸው ለእኔ ልዩነት የለውም፤ አባታችን አያዳላምና፤ እነዚያ የተከበሩት ምንም አልጨመሩልኝም። ⁷ከዚህ ይልቅ ለጴጥሮስ ለተገረዙት ወንጌል እንደ ተሰጠው፣ እኔም ላልተገረዙት ወንጌል በአደራ እንደ ተሰጠኝ አዩ። ⁸ለተገረዙት ሐዋርያ እንዲሆን በጴጥሮስ የሠራው፣ ለአሕዛብም በእኔ ሠርቷልና። ⁹የተሰጠኝን ጸጋ አውቀው፣ ዐምዶች የተባሉት ያዕቆብ፣ ጴጥሮስና ዮሐንስ ለእኔና ለበርናባስ የኅብረትን ቀኝ እጅ ሰጡን፤ እኛ ወደ አሕዛብ፣ እነርሱ ወደ ተገረዙት እንሄድ ዘንድ። ¹⁰ድኾችን እንድናስብ ብቻ ለመኑን፤ ይህም እኔ ለማድረግ የጓጓሁለት ነገር ነበር።

ጳውሎስ ኬፋን በአንጾኪያ መቃወሙ

¹¹ጴጥሮስ ወደ አንጾኪያ በመጣ ጊዜ ግን፣ የተፈረደበት ስለ ነበር፣ ፊት ለፊት ተቃወምሁት። ¹²ከያዕቆብ ዘንድ አንዳንድ ሰዎች ከመምጣታቸው በፊት ከአሕዛብ ጋራ ይበላ ነበር፤ በመጡ ጊዜ ግን የተገረዙትን ፈርቶ ራሱን ሰብስቦ ለየ። ^a a v12 “የተገረዙት” — አሕዛብ አማኞች ሙሉ በሙሉ ተቀባይነት እንዲያገኙ መገረዝ አለባቸው ብለው የሚያስገድዱ አይሁዳውያን ክርስቲያኖች። ¹³ሌሎቹ አይሁድም በዚህ ግብዝነት ተባበሩት፤ ስለዚህ በርናባስ እንኳ በግብዝነታቸው ተወሰደ። ¹⁴እንደ ወንጌል እውነት በቅንነት እንዳልሄዱ ባየሁ ጊዜ ግን፣ በሁሉ ፊት ጴጥሮስን፣ “አንተ አይሁዳዊ ሆነህ እንደ አይሁዳዊ ሳይሆን እንደ አሕዛብ ብትኖር፣ አሕዛብን እንደ አይሁድ እንዲኖሩ እንዴት ታስገድዳቸዋለህ?” አልሁት።

¹⁵እኛ ራሳችን በትውልድ አይሁድ ነን እንጂ ኀጢአተኞች አሕዛብ አይደለንም፤ ¹⁶ነገር ግን ሰው በሕግ ሥራ ሳይሆን በኢየሱስ ክርስቶስ በማመን በእግዚአብሔር ፊት ጻድቅ እንደሚሆን እናውቃለን። እኛም በሕግ ሥራ ሳይሆን በክርስቶስ በማመን ጻድቃን እንሆን ዘንድ በክርስቶስ ኢየሱስ አመንን፤ በሕግ ሥራ ማንም ሰው ጻድቅ አይሆንምና። ¹⁷በክርስቶስ ጻድቃን ለመሆን ስንፈልግ እኛ ራሳችን ደግሞ ኀጢአተኞች ሆነን ብንገኝ፣ እንግዲህ ክርስቶስ የኀጢአት አገልጋይ ነውን? ከቶ አይደለም! ¹⁸ያፈረስሁትን እንደገና ብሠራ፣ ራሴ ሕግ ተላላፊ እንደ ሆንሁ አስረዳለሁና። ¹⁹እኔ ለአባታችን በሕይወት እኖር ዘንድ፣ በሕግ በኩል ለሕግ ሞቼአለሁና። ²⁰ከክርስቶስ ጋራ ተሰቅዬአለሁ። ከእንግዲህ የምኖረው እኔ አይደለሁም፤ በእኔ ውስጥ የሚኖረው ክርስቶስ ነው እንጂ። አሁን በሥጋ የምኖረውን ሕይወት፣ በወደደኝና ራሱን ስለ እኔ አሳልፎ በሰጠው በአባታችን ልጅ በማመን እኖረዋለሁ። ²¹የአባታችንን ጸጋ አልጥልም፤ ጽድቅ በሕግ በኩል የሚገኝ ከሆነ፣ ክርስቶስ በከንቱ ሞተ ማለት ነውና።