ገላትያ 1

1 ¹ጳውሎስ፣ ሐዋርያ — ከሰዎች ሳይሆን፣ በሰውም በኩል ሳይሆን፣ ነገር ግን በኢየሱስ ክርስቶስና ኢየሱስን ከሙታን ባስነሣው በአባታችን በኩል የሆነ — ²ከእኔም ጋር ያሉ ወንድሞችና እኀቶች ሁሉ፣ ወደ ገላትያ አብያተ ክርስቲያናት፦ ³ከአባታችንና ከጌታ ከኢየሱስ ክርስቶስ ጸጋና ሰላም ለእናንተ ይሁን፤ ⁴ይህም በአባታችን ፈቃድ ከዚህ የአሁኑ ክፉ ዘመን ሊያድነን ስለ ኀጢአታችን ራሱን የሰጠ ነው፤ ⁵ለእርሱም ከዘላለም እስከ ዘላለም ክብር ይሁን። አሜን።

ሌላ ወንጌል የለም

⁶በክርስቶስ ጸጋ ከጠራችሁ ወደ ሌላ ወንጌል እንዲህ ፈጥናችሁ መዞራችሁ ያስገርመኛል። ⁷ሌላ ወንጌል ኖሮ አይደለም፤ ነገር ግን የክርስቶስን ወንጌል ሊያጣምሙ የሚፈልጉ አንዳንዶች ያውካችኋል። ⁸ነገር ግን እኛ ብንሆን ወይም ከሰማይ የመጣ መልአክ፣ ከሰበክንላችሁ ሌላ ወንጌል ቢሰብክ፣ የተረገመ ይሁን። ⁹አስቀድመን እንዳልነው፣ አሁንም እንደ ገና እላለሁ፦ ማንም ከተቀበላችሁት ሌላ ወንጌል ቢሰብክላችሁ፣ ያ ሰው የተረገመ ይሁን።

¹⁰አሁን የሰዎችን ሞገስ ነውን የምፈልገው ወይስ የአባታችንን? ሰዎችን ደስ ላሰኝ እሻለሁን? አሁንም ሰዎችን ደስ ለማሰኘት የምሻ ብሆን ኖሮ፣ የክርስቶስ አገልጋይ ባልሆንሁም ነበር።

አብ ጳውሎስን በቀጥታ ጠራው

¹¹ወንድሞችና እኀቶች ሆይ፣ የሰበክሁት ወንጌል ከሰው እንዳልሆነ ታውቁ ዘንድ እሻለሁ። ¹²ከማንም ሰው አልተቀበልሁትም፣ አልተማርሁትምም፤ ነገር ግን በኢየሱስ ክርስቶስ መገለጥ በኩል ተቀበልሁት። ¹³በአይሁድ ሃይማኖት የነበረኝን ያለፈ ኑሮ ሰምታችኋል፤ የአባታችንን ቤተ ክርስቲያን ላጠፋት እየሞከርሁ እንዴት አጥብቄ እንዳሳደድኋት። ¹⁴ለአባቶቼ ወግ እጅግ ይበልጥ ቀናተኛ በመሆን፣ በወገኖቼ መካከል ከነበሩ ብዙ እኩዮቼ ይልቅ በአይሁድ ሃይማኖት እበልጥ ነበር። ¹⁵ነገር ግን ከእናቴ ማኅፀን ጀምሮ የለየኝና በጸጋው የጠራኝ አባታችን ደስ ባለው ጊዜ፣ ¹⁶ልጁን በእኔ ሊገልጥ፣ በአሕዛብ መካከል እሰብከው ዘንድ፤ ወዲያውኑ ማንንም አላማከርሁም፤ ¹⁷ከእኔም በፊት ወደ ነበሩ ሐዋርያት ወደ ኢየሩሳሌም አልወጣሁም፤ ነገር ግን ወደ ዓረብ አገር ሄድሁ፣ ከዚያም ወደ ደማስቆ ተመለስሁ።

¹⁸ከዚያም ከሦስት ዓመት በኋላ፣ ጴጥሮስን ለማወቅ ወደ ኢየሩሳሌም ወጣሁ፤ ከእርሱም ጋር ዐሥራ አምስት ቀን ቆየሁ። ¹⁹ነገር ግን ከጌታ ወንድም ከያዕቆብ በቀር ከሌሎቹ ሐዋርያት አንዱንም አላየሁም። ²⁰የምጽፍላችሁ ነገር፣ በአባታችን ፊት፣ እንደማልዋሽ አረጋግጥላችኋለሁ። ²¹ከዚያም ወደ ሶርያና ወደ ኪልቅያ አገሮች ሄድሁ። ²²በክርስቶስ ላሉት በይሁዳ አብያተ ክርስቲያናት ዘንድ፣ እስከዚያ ጊዜ ድረስ በአካል አይታወቅሁም ነበር። ²³“ድሮ ያሳድደን የነበረው ሰው፣ ቀድሞ ሊያጠፋው የሞከረውን እምነት አሁን ይሰብካል” የሚለውን ብቻ ሰምተው ነበር። ²⁴ስለ እኔም አባታችንን አከበሩ።