గలతీయులకు 1

1 ¹పౌలు, ఒక అపొస్తలుడు—మనుష్యుల నుండి కాదు, మనుష్యుని ద్వారానూ కాదు, గాని యేసు క్రీస్తు ద్వారానూ, ఆయనను మృతులలో నుండి లేపిన మన తండ్రి ద్వారానూ అపొస్తలుడైనవాడు, ²మరియు నాతో ఉన్న సహోదర సహోదరీలందరును, గలతీయలోని సంఘములకు: ³మన తండ్రి నుండియు, ప్రభువైన యేసు క్రీస్తు నుండియు మీకు కృపయు సమాధానమును కలుగును గాక, ⁴ఆయన మన పాపముల నిమిత్తము తన్నుతానే అప్పగించుకొనెను, ఈ ప్రస్తుత దుష్ట యుగము నుండి మనలను విడిపించుటకు, మన తండ్రి చిత్తానుసారముగా చేసెను, ⁵ఆయనకు యుగయుగములకును మహిమ కలుగును గాక. ఆమేన్.

వేరొక సువార్త లేదు

⁶క్రీస్తు కృపవలన మిమ్మును పిలిచినవాని నుండి మీరు ఇంత శీఘ్రముగా వేరొక సువార్తకు తిరిగిపోవుచున్నందుకు నేను ఆశ్చర్యపడుచున్నాను. ⁷మరియొక సువార్త ఉన్నదని కాదు—గాని కొందరు మిమ్మును కలవరపరచుచు, క్రీస్తు సువార్తను వక్రీకరింపగోరుచున్నారు. ⁸అయితే మేమైనను, లేక పరలోకమునుండి వచ్చిన దూతయైనను, మేము మీకు ప్రకటించిన సువార్తకంటె వేరైన సువార్తను ప్రకటించినయెడల, అట్టివాడు శాపగ్రస్తుడగును గాక. ⁹మేము ఇంతకుముందు చెప్పినట్లు, ఇప్పుడు నేను మరల చెప్పుచున్నాను: మీరు అంగీకరించిన సువార్తకంటె వేరైన సువార్తను ఎవడైనను మీకు ప్రకటించినయెడల, అట్టివాడు శాపగ్రస్తుడగును గాక.

¹⁰నేను ఇప్పుడు మనుష్యుల అంగీకారమును వెదకుచున్నానా, లేక మన తండ్రి అంగీకారమునా? నేను మనుష్యులను సంతోషపెట్టుటకు ప్రయత్నించుచున్నానా? నేను ఇంకను మనుష్యులను సంతోషపెట్టుటకు ప్రయత్నించుచుండినయెడల, నేను క్రీస్తు దాసుడనై యుండను.

మన తండ్రి పౌలును నేరుగా పిలిచాడు

¹¹సహోదర సహోదరీలారా, మీరు తెలిసికొనవలెనని నేను కోరుచున్నాను: నేను ప్రకటించిన సువార్త మనుష్యులవలన కలిగినది కాదు. ¹²నేను దానిని ఏ మనుష్యుని నుండియు అంగీకరింపలేదు, దానిని ఉపదేశింపబడలేదు, గాని యేసు క్రీస్తు ప్రత్యక్షత ద్వారానే పొందితిని. ¹³యూదమతమునందు నా గత జీవితమునుగూర్చి మీరు వినియున్నారు—నేను ఎంత తీవ్రముగా మన తండ్రి సంఘమును హింసించుచు, దానిని నాశనము చేయుటకు ప్రయత్నించితినో మీరు వినియున్నారు. ¹⁴నా జనులలోని నా సమకాలికులలో అనేకులకంటె నేను యూదమతమునందు అభివృద్ధిపొంది, నా పితరుల సంప్రదాయముల విషయమై మిక్కిలి ఆసక్తిగలవాడనైతిని. ¹⁵అయితే నా తల్లి గర్భమునుండి నన్ను ప్రత్యేకపరచి, తన కృపవలన నన్ను పిలిచిన మన తండ్రికి, ¹⁶నేను అన్యజనులలో ఆయనను ప్రకటించునట్లు తన కుమారుని నాయందు బయలుపరచుటకు ఇష్టమైనప్పుడు, నేను వెంటనే యెవనితోను సంప్రదింపలేదు, ¹⁷నాకంటె ముందున్న ఆ అపొస్తలుల యొద్దకు యెరూషలేమునకు వెళ్లనూలేదు, గాని అరేబియాకు వెళ్లి, తరువాత దమస్కునకు తిరిగివచ్చితిని.

¹⁸అటుపిమ్మట, మూడు సంవత్సరములైన తరువాత, పేతురును ఎరుగుటకు నేను యెరూషలేమునకు వెళ్లి, ఆయనతో పదునైదు దినములుంటిని. ¹⁹అయితే ప్రభువు సహోదరుడైన యాకోబును తప్ప, ఇతర అపొస్తలులలో ఎవనిని నేను చూడలేదు. ²⁰నేను మీకు వ్రాయుచున్న వాటిలో, మన తండ్రి యెదుట మీకు నిశ్చయముగా చెప్పుచున్నాను, నేను అబద్ధమాడుటలేదు. ²¹అటుతరువాత నేను సిరియ, కిలికియ ప్రాంతములలోనికి వెళ్లితిని. ²²క్రీస్తునందున్న యూదయలోని సంఘములకు నేను ఇంకను వ్యక్తిగతముగా తెలియనివాడనై యుంటిని. ²³"ఒకప్పుడు మనలను హింసించినవాడు, తాను ఒకప్పుడు నాశనము చేయ ప్రయత్నించిన విశ్వాసమునే ఇప్పుడు ప్రకటించుచున్నాడు" అని మాత్రమే వారు వినిరి. ²⁴మరియు నా నిమిత్తము వారు మన తండ్రిని మహిమపరచిరి.