Galatianao 1

1 ¹Mibingwui eina maningla, miwui mangā eina maningla, kha Jishu Khrista kala kathiwui eina ali ringshok ngasak kahaia ithumwui Avāwui mangā eina paokazata ngasākahai Paul ina, ²kala ili ngasotabing ivānao saikora, Galatiawui churchbingli: ³Ithumwui Avā kala Proho Jishu Khristawui eina lukhamashan kala chingri kahai chi nathumwui ngasāranu. ⁴Ithumwui Avāwui ningkachāng athishurda, aruihonwui makaphā atam hi eina ithumli kanshok khavai, Khristana ithumwui moreiwui vang awui khalatta mihaira. ⁵Ali mashimānda tekmateichingranu. Amen.

Paokaphā Khangateipā Maleimana

⁶Nathum atam kasha̱kha Khristawui lukhamashan eina nathumli hokhui kahaiawui eina paokaphā khangateishong ngareithui kaji ina matakhakhaira. ⁷Paokaphā khangatei maleimana. Kha Khristawui paokaphā chi yonngasak khangai mi kaikhana nathumli khanang ngasakda lei. ⁸Kha ithumnala, lah kazingramwui eina kazingrao akhanala, nathumli hāshok kahai paokaphā chiwui eina khangatei paokaphā hāshokakha, a china khonkashi chi awui ngasāranu. ⁹Rida ithumna hāng kahaiwui kathāda, ara ina hāngluishitli: khipānakha nathum samphang kahai paokaphā chiwui eina khangatei paokaphā nathumli hāshokakha, a china khonkashi chi awui ngasāranu.

¹⁰Ara ina miwui ngahānkhangai phāra jila, lah ithumwui Avāwui ngahānkhangai phāra jila? Ina mibingli ningyāng ung ngasak khavai ngahānna jila? Ina aruila mibingli ningyāng ung ngasak khavai ngahānakha, ina Khristawui rao maningmara.

Avāna Paulli Ngatartei Eina Hokhui

¹¹Ivānaobing, ina nathumli theingasakngaiya: ina hāshok kahai paokaphā chi miwui eina kharā maningmana. ¹²Ina chi mi khipākhawui eina masamphangmana, kala tamchithei sākhala maphāmana, kha Jishu Khristawui marānkhami eina samphanga. ¹³Jihudi dharma khareli iwui okthui, ithumwui Avāwui church chi sāshimān khavai ina panglāk eina rekharek ngasaka kaji nathumna shāhaira. ¹⁴Iwui ishāvā ngarāwui khamayon tarākhawui vang mataimeida lungchāngda, Jihudi dharma ina iwui miyurwui alungli iwui atam kasābing kachungkhali lāngda mangā vāngasaka. ¹⁵Kha ishāva̱wui naopamwui eina ili phaishok kahaia kala awui lukhamashan eina ili hokhui kahaia ithumwui Avā ningyāng unglakhaowa tharan, ¹⁶awui Anaomayara chi iwuklungli phongshok khavai, ali Gentilebingli hāshok khavai, ina ngalāngda mi khipākhalila ngasan maningmana, ¹⁷lah iwui rida paokazata kahaibingli Jerusalemli ina kāhao maningmana, kha Arabiali vaiya, chiwui thili Damascusli latunghaowa.

¹⁸Chiwui thili, zingkum kathum khaleilaga, Peterli theikhui khavai Jerusalemli vai, ali ngasoda zimiksho tharāda phangā pamsanga. ¹⁹Kha Prohowui agato James maningla khangatei paokazatbing khipālikha matheimana. ²⁰Ina nathumli kakapi hiwui pongli, ithumwui Avā mangāli ina kachangkhat kahāngna, ina minam mahāngmana. ²¹Chiwui thili ina Syria eina Cilicia ngaleili vai. ²²Khristali kazanga Judea ngaleili khalei churchbing china aruila iwui zakmai matheisāthuwa. ²³Athumna hi maningla shai: "Atam akhali ithumli rekharek kahai mi china, khareli sāshimān khavai sākahai shitkasang chi ara hāshoka." ²⁴Chieina athumna iwui vang eina ithumwui Avāli tekmatei ngasaka.