加拉太書 1

1 ¹我保羅係一個使徒——唔係由人差派,亦都唔係藉住人,而係藉住耶穌基督,同埋叫佢從死人之中復活嘅、我哋嘅父, ²同埋所有同我一齊嘅弟兄姊妹,寫信畀加拉太嘅眾教會: ³願恩典同平安,由我哋嘅父同主耶穌基督臨到你哋, ⁴基督照住我哋父嘅旨意,為咗我哋嘅罪捨咗自己,要救我哋脫離而家呢個邪惡嘅世代。 ⁵願榮耀歸畀佢,直到永永遠遠。阿們。

冇第二個福音

⁶我覺得好出奇,你哋咁快就離棄咗藉住基督嘅恩典呼召你哋嘅嗰位,而去跟從另一個福音。 ⁷其實根本冇另一個福音——只不過有啲人攪擾緊你哋,想扭曲基督嘅福音。 ⁸但係就算係我哋,或者係天上嚟嘅天使,傳一個同我哋當初傳畀你哋唔一樣嘅福音,佢都應該受咒詛。 ⁹我哋以前講過,而家我再講一次:如果有人傳一個同你哋所領受唔一樣嘅福音畀你哋,嗰個人就應該受咒詛。

¹⁰我而家係想討人歡心,定係想討我哋嘅父歡心呢?我係想討人嘅喜悅咩?如果我仲想討人喜悅,我就唔係基督嘅僕人喇。

天父親自呼召保羅

¹¹弟兄姊妹,我想你哋知道:我所傳嘅福音唔係出於人嘅。 ¹²呢個福音唔係我由人嗰度領受嘅,亦都唔係人教我嘅,而係藉住耶穌基督嘅啟示。 ¹³你哋聽過我以前喺猶太教入面嘅為人——我點樣狠狠咁逼迫我哋父嘅教會,想將佢毀滅。 ¹⁴我喺猶太教入面嘅長進,超過咗我同族入面好多同輩,對我祖先嘅傳統加倍熱心。 ¹⁵但係,當我哋嘅父——就係嗰位喺我出母胎之前就將我分別出嚟、又藉住佢嘅恩典呼召我嘅——覺得喜悅, ¹⁶要將佢個仔啟示喺我裡面,好等我可以喺外邦人中間傳揚佢嗰陣,我冇即刻同任何人商量, ¹⁷亦都冇上耶路撒冷,去見嗰啲比我早做使徒嘅人,而係去咗阿拉伯,之後再返去大馬士革。

¹⁸過咗三年,我先至上耶路撒冷去認識彼得,同佢一齊住咗十五日。 ¹⁹至於其他使徒,除咗主嘅兄弟雅各之外,我一個都冇見過。 ²⁰我而家寫畀你哋嘅嘢,我喺我哋嘅父面前向你哋保證,我冇講大話。 ²¹之後我去咗敘利亞同基利家一帶嘅地方。 ²²嗰陣時,喺基督裡面嘅猶太各教會,佢哋都仲未見過我本人。 ²³佢哋只不過聽人講:「嗰個從前逼迫我哋嘅人,而家反而傳揚佢從前想毀滅嘅信仰喇。」 ²⁴佢哋就因為我嘅緣故歸榮耀畀我哋嘅父。