Galatia 1

1 ¹Paulu, aposteli kan—kì í ṣe láti ọ̀dọ̀ ènìyàn, bẹ́ẹ̀ ni kì í ṣe nípasẹ̀ ènìyàn, ṣùgbọ́n nípasẹ̀ Jesu Kristi àti Baba wa, ẹni tí ó jí i dìde kúrò nínú òkú, ²àti gbogbo àwọn arákùnrin àti arábìnrin tí ó wà pẹ̀lú mi, sí àwọn ìjọ Galatia: ³Oore-ọ̀fẹ́ àti àlàáfíà sí yín láti ọ̀dọ̀ Baba wa àti Olúwa Jesu Kristi, ⁴ẹni tí ó fi ara rẹ̀ fún nítorí ẹ̀ṣẹ̀ wa, láti gbà wá là kúrò nínú ayé búburú ìsinsìnyí, gẹ́gẹ́ bí ìfẹ́ Baba wa, ⁵ẹni tí ògo wà fún láé àti láéláé. Àmín.

Kò Sí Ìhìnrere Mìíràn

⁶Ẹnu yà mí pé ẹ̀yin ti kánjú yí padà kánkán kúrò lọ́dọ̀ ẹni tí ó pè yín nípasẹ̀ oore-ọ̀fẹ́ Kristi sí ìhìnrere mìíràn tí ó yàtọ̀. ⁷Kì í ṣe pé ìhìnrere mìíràn wà—ṣùgbọ́n àwọn kan ń yọ yín lẹ́nu, tí wọ́n ń fẹ́ láti yí ìhìnrere Kristi po. ⁸Ṣùgbọ́n bí àwa, tàbí angẹli kan láti ọ̀run, bá wàásù ìhìnrere mìíràn yàtọ̀ sí èyí tí àwa wàásù fún yín, ẹ jẹ́ kí ó di ẹni ègún. ⁹Gẹ́gẹ́ bí àwa ti sọ tẹ́lẹ̀, mo tún sọ nísinsìnyí pé: bí ẹnikẹ́ni bá wàásù ìhìnrere fún yín yàtọ̀ sí èyí tí ẹ ti gbà, ẹ jẹ́ kí ẹni náà di ẹni ègún.

¹⁰Ǹjẹ́ ìtẹ́wọ́gbà ènìyàn ni mo ń wá nísinsìnyí, àbí ti Baba wa? Ǹjẹ́ ènìyàn ni mo ń gbìyànjú láti wù? Bí mo bá ṣì ń gbìyànjú láti wu ènìyàn, èmi kì yóò jẹ́ ìránṣẹ́ Kristi.

Baba Pe Paulu Tààrà

¹¹Nítorí, ẹ̀yin arákùnrin àti arábìnrin, mo fẹ́ kí ẹ mọ̀ pé: ìhìnrere tí mo wàásù kì í ṣe láti ọ̀dọ̀ ènìyàn ni ìpilẹ̀ṣẹ̀ rẹ̀. ¹²Èmi kò gbà á láti ọ̀dọ̀ ènìyàn kankan, bẹ́ẹ̀ ni a kò kọ́ mi ní i, ṣùgbọ́n nípasẹ̀ ìfihàn Jesu Kristi ni. ¹³Ẹ ti gbọ́ nípa ìgbésí ayé mi àtijọ́ nínú ẹ̀sìn àwọn Júù—bí mo ti ṣe inúnibíni líle sí ìjọ Baba wa, tí mo ń gbìyànjú láti pa á run. ¹⁴Mo tẹ̀síwájú nínú ẹ̀sìn àwọn Júù ju ọ̀pọ̀ àwọn ẹgbẹ́ mi lọ láàrin àwọn ènìyàn mi, mo sì ní ìtara púpọ̀ gidigidi fún àwọn òfin àtọwọ́dọ́wọ́ àwọn baba ńlá mi. ¹⁵Ṣùgbọ́n nígbà tí ó wu Baba wa, ẹni tí ó yà mí sọ́tọ̀ láti inú ìyá mi wá tí ó sì pè mí nípasẹ̀ oore-ọ̀fẹ́ rẹ̀, ¹⁶láti fi Ọmọ rẹ̀ hàn nínú mi, kí èmi lè máa wàásù rẹ̀ láàrin àwọn Kèfèrí, èmi kò kàn sí ẹnikẹ́ni lẹ́sẹ̀kẹsẹ̀, ¹⁷bẹ́ẹ̀ ni èmi kò gòkè lọ sí Jerusalẹmu, sọ́dọ̀ àwọn aposteli tí ó ṣáájú mi, ṣùgbọ́n mo lọ sí Arabia, lẹ́yìn náà mo padà sí Damasku.

¹⁸Nígbà náà, lẹ́yìn ọdún mẹ́ta, mo gòkè lọ sí Jerusalẹmu láti mọ Peteru, mo sì bá a gbé fún ọjọ́ mẹ́ẹ̀ẹ́dógún. ¹⁹Ṣùgbọ́n èmi kò rí ẹnikẹ́ni nínú àwọn aposteli yòókù àyàfi Jakọbu, arákùnrin Olúwa. ²⁰Nínú ohun tí mo ń kọ sí yín, mo fi dá yín lójú níwájú Baba wa pé, èmi kò purọ́. ²¹Lẹ́yìn náà mo lọ sí àwọn agbègbè Siria àti Kilikia. ²²Síbẹ̀ àwọn ìjọ Judea tí ó wà nínú Kristi kò tíì mọ̀ mí ní ojú. ²³Wọ́n kàn gbọ́ pé: “Ẹni tí ó ti ṣe inúnibíni sí wa nígbà kan rí ti ń wàásù ìgbàgbọ́ tí ó gbìyànjú láti parun nígbà kan rí báyìí.” ²⁴Wọ́n sì yin Baba wa lógo nítorí mi.