قالاتئیایا فیض و باریش
پولوسون فیض ائنجئلئنی، ائمانا شرئعت ساخلاماغی آرتیرماق ائسته‌یَنلره قارشی شئدّتلی مودافئعه‌سی. مسئحده آزادلیق اونون مؤوضوعودور.
1 1پولوس، بئر حواری - نه ائنسانلاردان، نه ده ائنسان واسئطه‌سی‌ائله، آمّا عئسا مسئح و اونو اؤلولردن دئرئلدن آتامیز واسئطه‌سی‌ائله، 2و منئمله اولان بوتون قارداشلاردان، قالاتئیانین کئلئسالارینا: 3فیض و باریش سئزه، آتامیزدان و رب عئسا مسئحدن اولسون، 4او کی، آتامیزین ائراده‌سی‌ائله، بئزی بو ائندئکی پئس دؤوراندان قورتارماق اوچون، گوناهلاریمیز اوچون اؤزونو وردی، 5جلال ابددن ابده‌جک اونا اولسون. آمئن.
باشقا ائنجئل یوخدور
6تعجّوب ادئرم کی، سئز مسئحئن فیضی‌ائله سئزی چاغیران کسدن بو قدر تئز دؤنوب، باشقا بئر ائنجئله طرف گدئرسئنئز. 7باشقا بئر ائنجئل وار دیئل - آمّا بعضئلری سئزی نئگاران ادئرلر و مسئحئن ائنجئلئنی اَیری اتمک ائسته‌یئرلر. 8آمّا اگر بئز، یا دا گؤیدن بئر ملک، سئزه وعظ اتدئیئمئزدن باشقا بئر ائنجئلی وعظ اِتسَک، قوی ملعون اولسون. 9نجه کی، اوّلجه‌دن ددئک، ائندی گئنه دیئرم: اگر بئر کس سئزه، آلدیغینیزدان باشقا بئر ائنجئلی وعظ اتسه، قوی او آدام ملعون اولسون.
10ائندی من ائنسانلارین رضایتئنی آختاریرام، یوخسا آتامیزین؟ مگر ائنسانلاری راضی اتمه‌یه چالیشیرام؟ اگر حله ائنسانلاری راضی اتمه‌یه چالیشسایدیم، مسئحئن قولو اولمازدیم.
آتا پولوسو بی‌واسئطه چاغیردی
11چونکی، قارداشلار، ائسته‌یئرم بئله‌سئنئز کی، منئم وعظ اتدئیئم ائنجئل ائنساندان دیئل. 12من اونو هچ بئر ائنساندان آلمادیم و نه ده منه اؤیرَتدئلر، آمّا عئسا مسئحئن وحیی واسئطه‌سی‌ائله آلدیم. 13سئز منئم یهودی دینئنده‌کی کچمئشئمی اشئدئبسئنئز - کی، آتامیزین کئلئساسینا نجه شئدّتله عذاب ورئردئم و اونو محو اتمه‌یه چالیشیردیم. 14یهودی دئنئنده اؤز خالقیمین آراسیندا بئر چوخ هم‌دؤورلرئمدن داها ائره‌لی گتدئم، اجدادلاریمین عنعنه‌لری اوچون داها چوخ قیرت چکئردئم. 15آمّا منی آنامین بطنئندن آییریب اؤز فیضی‌ائله چاغیران آتامیز راضی اولان زامان، 16اؤز اوغلونو منده آشکار اتمک اوچون، تا کی، اونو قیری‌یهودئلرئن آراسیندا وعظ ادم، من دَرحال هچ کئمدن مصلحت آلمادیم، 17نه ده اورشلئمه، مندن قاباق حواری اولانلارین یانینا گتدئم، آمّا عرب بؤلگه‌سئنه گتدئم و سونرا دَمَشقه قاییتدیم.
18سونرا، اوچ ائلدن سونرا، پطروسو تانیماق اوچون اورشلئمه گتدئم و اون بئش گون اونون یانیندا قالدیم. 19آمّا ربّئن قارداشی یعقوبدان باشقا، او بئری حواریلردن هچ بئرئنی گؤرمه‌دئم. 20سئزه یازدیغیم بو شیلر حاقّیندا، آتامیزین حوضوروندا سئزی اَمئن ادئرم کی، یالان دیمئرم. 21سونرا سورئیه و کئلئکئیه بؤلگه‌لرئنه گتدئم. 22مسئحده اولان یهودئیه کئلئسالاری حله منی شخصن تانیمیردیلار. 23اونلار آنجاق بونو اشئدئردئلر: «بئر زامان بئزی تعقئب ادن آدام، ائندی بئر واخت محو اتمه‌یه چالیشدیغی ائمانی وعظ ادئر.» 24و اونلار منه گؤره آتامیزی عئزّتلندئردئلر.
