ገላትያ 1 FHB Father's Heart Bible™

1 ¹ጳውሎስ፥ ካብ ሰብ ዘይኮነ፥ ብሰብ ድማ ዘይኮነ፥ ብኢየሱስ ክርስቶስን በቲ ካብ ምዉታት ዘተስኦ ኣቦናን ዝኾነ ሃዋርያ፥ ²ምሳይ ዘለዉ ኵሎም ኣሕዋት ድማ፥ ናብተን ኣብ ገላትያ ዘለዋ ኣብያተ ክርስቲያን፦ ³ፀጋን ሰላምን ካብ ኣቦናን ካብ ጐይታና ኢየሱስ ክርስቶስን ንኣኻትኩም ይኹን፤ ⁴ንሱ ድማ ከም ፍቓድ ኣቦና፥ ካብዛ ሕዚ ዘላ እክይቲ ዓለም ምእንቲ ኸናግፈና፥ ምእንቲ ሓጢኣትና ርእሱ ኣሕለፈ፤ ⁵ንእኡ ኽብሪ ንዘለኣለመ ኣለም ይኹን። ኣሜን።

ካልእ ወንጌል የለን

⁶ካብቲ በቲ ፀጋ ክርስቶስ ዝፀውዓኩም ናብ ካልእ ወንጌል ብኸምዙይ ቀልጢፍኩም ብምዝዋርኩም እገረም ኣለኹ። ⁷ካልእ ወንጌል ኣሎ ማለት ኣይኮነን—ገሊኦም ግና ነቲ ወንጌል ክርስቶስ ክቕይንዎ እናደለዩ፥ የናውፁኹም ኣለዉ። ⁸ግና ንሕና ኮነ ኻብ ሰማይ ዝመፀ መልኣኽ፥ ብዘይ እቲ ዝሰበኽናልኩም ካልእ ወንጌል እንተ ሰበኸልኩም፥ ርጉም ይኹን። ⁹ከምቲ ቐዲምና ዝበልናዮ፥ ሕዚ እውን መሊሰ እብል ኣለኹ፦ ሓደ እኳ ብዘይ እቲ እተቐበልኩሞ ካልእ ወንጌል እንተ ሰበኸልኩም፥ እቱይ ሰብ ርጉም ይኹን።

¹⁰ሕዚ ሞገስ ሰብ ድየ ዝደሊ ዘለኹ፥ ወይ ሞገስ ኣቦና? ንሰብ ከሕጉስ ድየ ዝደሊ? ገና ንሰብ ከሕጉስ እንተ ዝደሊ ነይረ፥ ባርያ ክርስቶስ ኣይምኾንኩን።

ኣቦ ንጳውሎስ ባዕሉ ፀውዖ

¹¹ኣቱም ኣሕዋተይ፥ እቲ ዝሰበኽኩዎ ወንጌል ከም ናይ ሰብ ዘይኮነ ኽትፈልጡ እደሊ ኣለኹ። ¹²ኣነ ብምግላፅ ኢየሱስ ክርስቶስ ደኣ እምበር፥ ካብ ሰብ ኣይተቐበልኩዎን፥ ኣይተመሃርኩዎንን። ¹³ቀደም ኣብ ይሁዲነት ዝነበረኒ ናብራ ሰሚዕኹም ኣለኹም፤ ነታ ቤተ ክርስቲያን ኣቦና የመና ኸም ዝሰጐጕክዋን ከጥፍኣ ኸም ዝፈተንኩን። ¹⁴ካብ ብዙሓት ኣብ ወገነይ ዝነበሩ መዛነይ ንላዕሊ፥ ኣብ ይሁዲነት በሊፀ ነይረ፥ ንወግዒ ኣቦታተይ ድማ ኣዝየ ቐኒአ ነይረ። ¹⁵ግና እቲ ኻብ ከርሲ እኖይ ዝፈለየኒ፥ ብፀጋኡ ዝፀውዓኒ ኣቦና ደስ ምስ በሎ፥ ¹⁶ንወዱ ኣባይ ክገልፅ፥ ኣብ ማእኸል ኣህዛብ ድማ ምእንቲ ኽሰብኾ፥ ሽዑ ንሽዑ ምስ ሓደ እኳ ኣይተማኸርኩን፤ ¹⁷ናብ ቅድመይ ናብ ዝነበሩ ሃዋርያት ናብ ኢየሩሳሌም ድማ ኣይደየብኩን፤ ናብ ዓረብ ደኣ ኸድኩ፥ ደጊመ ኸዓ ናብ ደማስቆ ተመለስኩ።

¹⁸ድሕሪኡ፥ ድሕሪ ሰለስተ ዓመት፥ ንጴጥሮስ ክፈልጦ ናብ ኢየሩሳሌም ደየብኩ፥ ምስኡ ኸዓ ዓሰርተ ሓሙሽተ መዓልቲ ፀናሕኩ። ¹⁹ብዘይ ያእቆብ ሓው ጐይታ ግና፥ ካብቶም ካልኦት ሃዋርያት ሓደ እኳ ኣይረአኹን። ²⁰በቲ ዝፅሕፈልኩም ዘለኹ ነገር፥ ኣብ ቅድሚ ኣቦና ኣይሕሱን ከም ዘለኹ የረጋግፀልኩም ኣለኹ። ²¹ድሕሪኡ ናብ ሃገር ሶርያን ቀሊቅያን ከድኩ። ²²ነተን ኣብ ክርስቶስ ዘለዋ ኣብያተ ክርስቲያን ይሁዳ ግና፥ ገና ብገፀይ ኣይፈልጣኒን ነበራ። ²³“እቲ ቐደም ዝሰጐገና፥ ነታ ቐደም ከጥፍኣ ዝፈተነ እምነት፥ ሕዚ ይሰብኻ ኣሎ” ዝብል ጥራሕ ይሰምዑ ነበሩ። ²⁴ብኣይ ምኽንያት ድማ ንኣቦና ኣኽበርዎ።