2ይ ቆሮንቶስ 13 FHB Father's Heart Bible™

13 ¹እዝ ናባኻትኩም ዝመፅእ ዘለኹ፥ ሳልሳይ ጊዜ እዩ። “ኵሉ ነገር ብምስክርነት ክልተ ወይ ሰለስተ ምስክር ይረጋገፅ።” ²ነቶም ቀደም ሓጢኣት ዝገበሩን ነቶም ካልኦት ዅሎምን፥ ከምቲ ኣብ ካልኣይ ምብፃሐይ ኣብ ቅድሚኦም ኮይነ ዝበልክዎም፥ ቅድም ኢለ ነጊረዮም እየ፤ ሕዚ ኸዓ ርሑቕ እንተለኹ እነግሮም ኣለኹ፦ ዳግማይ እንተ መፃእኹ፥ ኣይራህርሀሎምን እየ፥ ³ክርስቶስ ብኣይ ከም ዝዛረብ መረዳእታ ትደልዩ ኣለኹም እሞ። ንሱ ናባኻትኩም ድኹም ኣይኮነን፥ ኣብ ማእኸልኩም ደኣ ሓያል እዩ እምበር። ⁴ብድኻም ተሰቒሉ እዩ እሞ፥ ብሓይሊ ኣቦና ግና ህያው ኮይኑ ይነብር እዩ። ንሕናውን ኣብኡ ድኹማት ኢና፥ ናባኻትኩም ግና ብሓይሊ ኣቦና ምስኡ ክንነብር ኢና።

⁵ንነፍስኹም ፈትኑ፤ ኣብ እምነት ኣለኹምዶ? ንነፍስኹም መርምሩ። ኢየሱስ ክርስቶስ ኣባኻትኩም ከም ዘሎዶ ኣይትፈልጡን? እንተ ዘይኮይኑ ግና ፈተና ዝወደቕኩም ኢኹም። ⁶ንሕና ባዕልትና ፈተና ኸም ዘይወደቕና፥ ክትፈልጡ ኢኹም ኢለ እኣምን ኣለኹ።

⁷ንስኻትኩም ሓንቲ ክፉእ እኳ ከይትገብሩ፥ ንኣቦና ንልምኖ ኣለና፤ እዙይ ከዓ ንሕና ፍቱናት ኮይንና ምእንቲ ክንረአ ዘይኮነስ፥ ንሕና ዘይፍቱናት እኳ እንተ መሰልና፥ ንስኻትኩም እቲ ቅኑዕ ነገር ምእንቲ ክትገብሩ ደኣ እዩ። ⁸ንሓቂ ኽንፃረር ኣይንኽእልን ኢና እሞ፥ ንሓቂ ደኣ እምበር። ⁹ንሕና ድኹማት እንተለና ንስኻትኩም ድማ ሓያላት እንተለኹም፥ ንሕጐስ ኢና፤ ፍፁማት ክትኮኑ ድማ ንልምን ኢና። ¹⁰ስለዙይ እየ ርሑቕ እንተለኹ እዝ ነገር እዙይ ዝፅሕፍ ዘለኹ፤ እዙይ ከዓ ኣብ ምስ መፃእኹ፥ በቲ ጐይታ ንምህናፅ እምበር ንምፍራስ ዘይሃበኒ ስልጣን ተጠቒመ፥ ብትሪ ከይዛረበኩም ኢለ እየ።

ፍቕርን ሰላምን ኣቦና

¹¹ኣብ መወዳእታ፥ ኣቱም ኣሕዋተይ፥ ተሓጐሱ፤ ፍፁማት ክትኮኑ ፃዓሩ፤ ንሓድሕድኩም ተፀናንዑ፤ ሓደ ሕሳብ ሓስቡ፤ ብሰላም ንበሩ፤ እቲ ናይ ፍቕርን ሰላምን ኣቦና ኸዓ ምሳኻትኩም ክኸውን እዩ። ¹²ብቕዱስ ስዕመት ንሓድሕድኩም ሰላም ተበሃሃሉ።

¹³ኵሎም ቅዱሳን ሰላም ይብሉኻትኩም ኣለዉ።

¹⁴ፀጋ ጐይታና ኢየሱስ ክርስቶስን፥ ፍቕሪ ኣቦናን፥ ዓሚቝ ሕብረት መንፈስ ቅዱስን ምስ ኵላትኩም ይኹን። ^a a v14 እዝ መዛዘሚ በረኸት እዙይ፥ ነቶም ሰለስቲኦም ኣካላት ሓቢሩ ይሰምዮም፦ ንወልድ፥ ንኣቦ፥ ንመንፈስ ቅዱስ፤ እዙይ ከዓ ነቲ ስም ኣቦና ኣብ ልዕሊ ህዝቡ ዘንበረ ናይ ክህነት በረኸት ዘቃልሕ ናይ ሃዋርያት ድምፂ እዩ።