Takteibü Shanga Lamlean Kian Loushi
Semboukei loubü kho semtikei, hoba tat yam haoei sinngaian kibü shuong to asenetlabü. Khrista hao danko lauda dogo haoen aukabü wanthungbüei, haoei takteibü kho sepeian lauda: kan lolo takteishi. Haoei leiluan kümbo loubü to liman, seneibü Bou hauei hau aki tegü yeian haoen tükdea hapla aei sanouda.
13 1Ho ngo kan jungto semboukei louada. “Ngüh pendou kho aukabü müt nyi ayingsi sem sembungei yeila thükkei.” 2Ngo nyiboubü louko kan yoa kijinei ngo lolo laubü tegü, shaang shabü shonbü shuong hoba lubü pendou to ngei shaang lenkei, hoba tou yam kijinei haoen to lenda: ngo ladangkei loualonga, ngei haoen asenetlabü, 3aishanga Khrista kü danko lauda dogo aukabü kanei wanthungbüei. Haoei kan to hau aki aying, lausikei kan yoa hau kibü ki. 4Aishanga hao hau akibüa peiseia thüngkei, lausikei haoei Bou hauei langkei ki. Aishanga senkei hao to hau aki, lausikei kan shanga senei Bou hauei hao yoa langkei kilabü.
5Kan lolo takteishi — kan mailem to ki lo? Kan lolo chühshi. Jisu Khrista kan to ki dogo kanei angekei lo? — kanei takteibüa alot yingalonga khei. 6Hoba künei takteibüa lotbü dogo kanei ditenlabü dogo ngei maanglemda.
7Künei ai amai aküm dogo künei Bou to welauda — künei lolo lotbü yeila aying, lausikei kanei tükde kümla shanga, künei alot tegü yingsikei. 8Aishanga senei ngühmai khulimbo ai kümla athük, lausikei ngühmai shanga ong. 9Senei hau aki hoba kan hau kijinei senei olinda; hoba kanei pendou tükdea kitilabü shanga künei welauda. 10Khoei ngo kan yoa akijinei ho ngüh ho doda, ngo kan yoa kijinei kaangko lenla akümlabü shanga, Bunyubouei kü la kubü sei danko — lea shanga, aying leilutila shanga.
Bou Sanou hoba Sangmai
11Phaila, jaisinasi shuong, olinashi, pendou tükdea kila haujemashi, cheei che to thungeijangeishi, jetei damenashi, sangmaia kishi — hoba sanou hoba sangmai seneibü Bou kan yoa kilabü. 12Saopobü sembung shepbo cheei che to salem kushi.
13Saopobü shuong pendouei kan la salem kuda.
14Seneibü Bunyubou Jisu Khrista onou, seneibü Bou sanou, hoba Soushou Saopobü khümbo kubü kan pendou yoa kishima. a a v14 Ho wansilengbü haülangbüei müt sem pendou chela ngaida — Shou, Bou hoba Soushou Saopobü — kho Boueibü nyen hao mütshuong thüka phobü ungshedbü haülangbü youkoikjaibüei ladangbü ki.
