2 ቆሮንቶስ 13

13 ¹ወደ እናንተ የምመጣው ይህ ለሦስተኛ ጊዜ ነው። “ነገር ሁሉ በሁለት ወይም በሦስት ምስክሮች ቃል ይጸናል።” ²በፊት ኀጢአት ለሠሩትና ለሌሎቹ ሁሉ አስቀድሜ፣ በሁለተኛው ጕብኝቴ በአካል በተገኘሁ ጊዜ እንዳልኩት፣ አሁንም ርቄ ሳለሁ እንዲህ እላቸዋለሁ፤ ደግሜ ብመጣ አልራራላቸውም፣ ³ክርስቶስ በእኔ እንደሚናገር ማስረጃ ስለምትፈልጉ ነው። እርሱ ለእናንተ ደካማ አይደለም፤ በመካከላችሁ ኀያል ነው እንጂ። ⁴በድካም ተሰቅሏልና፤ ነገር ግን በአባታችን ኀይል ሕያው ነው። እኛም በእርሱ ደካሞች ነን፤ ነገር ግን ለእናንተ በአባታችን ኀይል ከእርሱ ጋር በሕይወት እንኖራለን።

⁵ራሳችሁን መርምሩ፤ በእምነት ውስጥ ናችሁን? ራሳችሁን ፈትኑ። ፈተናውን ካልወደቃችሁ በቀር፣ ኢየሱስ ክርስቶስ በእናንተ ውስጥ እንዳለ አታውቁምን? ⁶እኛ ራሳችን ፈተናውን እንዳልወደቅን እንድታውቁ ተስፋ አደርጋለሁ።

⁷ምንም ክፉ ነገር እንዳታደርጉ ወደ አባታችን እንጸልያለን፤ ይህም እኛ የተመሰከረልን ሆነን እንድንታይ ሳይሆን፣ እኛ ያልተመሰከረልን ብንመስልም እናንተ መልካሙን እንድታደርጉ ነው። ⁸እውነትን ልንቃወም አንችልምና፤ ለእውነት እንጂ። ⁹እኛ ስንደክም እናንተም ስትበረቱ ደስ ይለናል፤ ፍጹም መታደሳችሁንም እንጸልያለን። ¹⁰ርቄ ሳለሁ ይህን የምጽፈው፣ በተገኘሁ ጊዜ ጌታ በሰጠኝ ሥልጣን ጨካኝ መሆን እንዳያስፈልገኝ ነው፤ ይህ ሥልጣን ለማነጽ እንጂ ለማፍረስ አይደለም።

የአባታችን ፍቅርና ሰላም

¹¹በመጨረሻም፣ ወንድሞችና እኅቶች ሆይ፤ ደስ ይበላችሁ፣ ፍጹም ለመታደስ ትጉ፣ እርስ በርሳችሁ ተበረታቱ፣ በአንድ ሐሳብ ሁኑ፣ በሰላም ኑሩ፤ የፍቅርና የሰላም አባታችንም ከእናንተ ጋር ይሆናል። ¹²እርስ በርሳችሁ በተቀደሰ አሳሳም ሰላምታ ተሰጣጡ።

¹³ቅዱሳን ሁሉ ሰላምታ ያቀርቡላችኋል።

¹⁴የጌታችን የኢየሱስ ክርስቶስ ጸጋ፣ የአባታችን ፍቅር፣ የመንፈስ ቅዱስም ጥልቅ ኅብረት ከሁላችሁ ጋር ይሁን። ^a a v14 ይህ የመዝጊያ በረከት ሦስቱን አካላት በአንድነት ይጠራል፤ ወልድን፣ አብን፣ መንፈስ ቅዱስንም፤ ይህም የአባታችንን ስም በሕዝቡ ላይ ያኖረው የካህናቱ በረከት ሐዋርያዊ ማስተጋባት ነው።