Beno Kwiza ya Kukubama samu na Kumekama
Mbala ya tatu ya nzyetolo me kubama, mpe mbala yayi Polo ke yambula ve bayina landaka na kusala masumu. Bawu zolaka kidimbu yina ke lakisa ti Klisto ke tuba na nzila ya yandi, na yina yandi ke balula kimeku: beno meka beno mosi. Yandi ke zola kumonikina ya kulemba na ngolo ya Tata ya beto mpe kukuta bawu ya mvimba, na kisika ya kukwiza na kubwisa.
13 1Yayi kele mbala ya tatu mu ke kwiza na sika ya beno. «Konso dyambu, ba fwana kundima yawu na kimbangi ya bambangi zole to tatu.» 2Mu zabisaka ntete bayina salaka disumu, mpe bantu ya nkaka nyonso, na ntwala—mutindu mu tubaka yawu ntangu mu vwandaka kuna na mbala ya zole ya nzyetolo ya munu—mpe mu ke zabisa bawu ntangu yayi ntangu mu kele ntama: kana mu kwiza dyaka, mu ke yambula bawu ve, 3samu ti beno ke zola kidimbu yina ke lakisa ti Klisto ke tuba na munu. Yandi kele ya kulemba na beno ve, kasi yandi kele na ngolo na kati ya beno. 4Samu ba komaka yandi na kulunsi na kulemba, kasi yandi ke zinga na ngolo ya Tata ya beto. Samu beto mpi, beto kele ya kulemba na kati ya yandi, kasi na beno, beto ke zinga kintwadi na yandi na ngolo ya Tata ya beto.
5Beno meka beno mosi—keti beno kele na kati ya kiminu? Beno tala beno mosi mbote-mbote. Keti beno zaba ve ti Yesu-Klisto kele na kati ya beno? Kana ve, beno me kuluka na ntontolo. 6Mpe mu ke tula kivuvu ti beno ke zaba ti beto mosi, beto me kuluka na ntontolo ve.
7Beto ke samba na Tata ya beto samu ti beno sala ata dyambu ya yimbi ve—kasi ve samu na kulakisa ti ba me ndima beto mosi, kasi samu ti beno sala mambu ya kudedama, ata beto ke monikina bonso bantu yina ba me ndima ve. 8Samu beto lenda tedimina butsyelika ve, kasi kaka samu na butsyelika. 9Beto ke yangalala ntangu beto kele ya kulemba mpe beno kele na ngolo; beto ke samba mpi samu na kuyidika ya mvimba ya beno. 10Ni yawu yina mu ke sonika mambu yayi ntangu mu kele ntama, samu ti ntangu mu ke vwanda kuna, mu vwanda na nsatu ve ya kuvwanda ngolo, na kusadila lutumu yina Mfumu pesaka munu—samu na kutunga, kasi ve samu na kumwangisa.
Luzolo mpe Kizunu ya Tata
11Na nsuka, bampangi, beno yangalala, beno sala ngolo samu na kuyidika, beno kindisa beno na beno, beno banza mutindu mosi, beno zinga na kizunu—mpe Tata ya beto ya luzolo mpe ya kizunu ke vwanda na beno. 12Beno pesa beno na beno mbote na kufiba ya longo.
13Bantu nyonso ya longo ke pesa beno mbote.
14Bika ti bumbote ya Mfumu ya beto Yesu-Klisto, luzolo ya Tata ya beto, mpe kuzinga kintwadi ya Mpeve ya Longo kuvwanda na beno nyonso. a a v14 Lusakumunu yayi ya nsuka ke tanga Bantu tatu yonso kintwadi—Mwana, Tata, mpe Mpeve ya Longo—yawu kele mutindu bantumwa ke vutukilaka lusakumunu ya nganga-Nzambi yina vwandaka tula nkumbu ya Tata ya beto na bantu ya yandi.