Wagalatia 1

1 ¹Paulo, mtume—si kutoka kwa wanadamu, wala kwa njia ya mwanadamu, bali kwa njia ya Yesu Kristo na Baba yetu, aliyemfufua kutoka kwa wafu, ²na ndugu wote walio pamoja nami, kwa makanisa ya Galatia: ³Neema na amani ziwe kwenu kutoka kwa Baba yetu na Bwana Yesu Kristo, ⁴aliyejitoa mwenyewe kwa ajili ya dhambi zetu, ili atuokoe katika ulimwengu huu wa sasa ulio mbaya, kwa mapenzi ya Baba yetu, ⁵ambaye utukufu ni wake milele na milele. Amina.

Hakuna Injili Nyingine

⁶Nashangaa kwamba mnaacha upesi hivi yule aliyewaita kwa neema ya Kristo, mkigeukia injili nyingine. ⁷Si kwamba ipo injili nyingine—bali wako watu wanaowavuruga, wakitaka kuipotosha injili ya Kristo. ⁸Lakini hata ikiwa sisi, au malaika kutoka mbinguni, atahubiri injili nyingine tofauti na ile tuliyowahubiria, na alaaniwe. ⁹Kama tulivyokwisha sema, sasa nasema tena: mtu ye yote akiwahubiria injili nyingine tofauti na ile mliyoipokea, na alaaniwe.

¹⁰Je, sasa natafuta kibali cha wanadamu, au cha Baba yetu? Je, natafuta kuwapendeza wanadamu? Kama ningali nikitafuta kuwapendeza wanadamu, nisingekuwa mtumishi wa Kristo.

Baba Alimwita Paulo Moja kwa Moja

¹¹Kwa maana, ndugu zangu, nataka mjue: injili niliyohubiri haikutoka kwa mwanadamu. ¹²Sikuipokea kwa mwanadamu ye yote, wala sikufundishwa, bali kwa ufunuo wa Yesu Kristo. ¹³Mmesikia habari za maisha yangu ya zamani katika Uyahudi—jinsi nilivyolitesa kwa ukali kanisa la Baba yetu, nikijaribu kuliangamiza. ¹⁴Nalizidi katika Uyahudi kuliko wengi wa kizazi changu miongoni mwa watu wangu, nikiwa na juhudi kubwa zaidi kwa mapokeo ya baba zangu. ¹⁵Lakini Baba yetu, aliyenitenga tangu tumbo la mama yangu na kuniita kwa neema yake, alipopendezwa, ¹⁶kumfunua Mwanawe ndani yangu, ili nimtangaze miongoni mwa watu wa Mataifa, sikushauriana na mtu papo hapo, ¹⁷wala sikupanda kwenda Yerusalemu kwa wale waliokuwa mitume kabla yangu, bali nilikwenda Arabuni, kisha nikarudi Dameski.

¹⁸Kisha, baada ya miaka mitatu, nilipanda kwenda Yerusalemu ili nimjue Petro, nikakaa naye siku kumi na tano. ¹⁹Lakini sikumwona mtume mwingine ye yote isipokuwa Yakobo, ndugu yake Bwana. ²⁰Katika haya ninayowaandikia, nawahakikishia mbele za Baba yetu, mimi sisemi uongo. ²¹Kisha nilikwenda pande za Shamu na Kilikia. ²²Nami nilikuwa bado sijajulikana uso kwa uso na makanisa ya Uyahudi yaliyo katika Kristo. ²³Walisikia tu: "Yule aliyekuwa akitutesa zamani, sasa anaihubiri ile imani aliyojaribu kuiangamiza zamani." ²⁴Nao wakamtukuza Baba yetu kwa sababu yangu.