ਗਲਾਤੀਆਂ 2

2 ¹ਚੌਦਾਂ ਸਾਲਾਂ ਬਾਅਦ ਮੈਂ ਬਰਨਬਾਸ ਦੇ ਨਾਲ ਤੀਤੁਸ ਨੂੰ ਵੀ ਲੈ ਕੇ ਫਿਰ ਯਰੂਸ਼ਲਮ ਨੂੰ ਗਿਆ। ²ਮੈਂ ਪਰਕਾਸ਼ ਦੇ ਕਾਰਨ ਗਿਆ ਅਤੇ ਜਿਹੜੀ ਖ਼ੁਸ਼ਖ਼ਬਰੀ ਮੈਂ ਪਰਾਈਆਂ ਕੌਮਾਂ ਵਿੱਚ ਪਰਚਾਰ ਕਰਦਾ ਹਾਂ, ਉਹ ਮੈਂ ਉਨ੍ਹਾਂ ਦੇ ਅੱਗੇ ਰੱਖੀ—ਪਰ ਨਿਵੇਕਲੇ, ਉਨ੍ਹਾਂ ਦੇ ਅੱਗੇ ਜਿਹੜੇ ਆਦਰ ਵਾਲੇ ਗਿਣੇ ਜਾਂਦੇ ਸਨ—ਤਾਂ ਜੋ ਇੰਝ ਨਾ ਹੋਵੇ ਕਿ ਮੈਂ ਵਿਅਰਥ ਦੌੜਦਾ ਹੋਵਾਂ ਜਾਂ ਦੌੜਿਆ ਹੋਵਾਂ। ³ਪਰ ਤੀਤੁਸ ਵੀ, ਜਿਹੜਾ ਮੇਰੇ ਨਾਲ ਸੀ ਅਤੇ ਯੂਨਾਨੀ ਸੀ, ਸੁੰਨਤ ਕਰਾਉਣ ਲਈ ਮਜਬੂਰ ਨਾ ਕੀਤਾ ਗਿਆ। ⁴ਇਹ ਉਨ੍ਹਾਂ ਝੂਠੇ ਭਰਾਵਾਂ ਦੇ ਕਾਰਨ ਸੀ, ਜਿਹੜੇ ਚੁੱਪ-ਚੁਪੀਤੇ ਅੰਦਰ ਲਿਆਂਦੇ ਗਏ ਸਨ, ਜੋ ਸਾਡੀ ਉਸ ਅਜ਼ਾਦੀ ਦੀ ਜਾਸੂਸੀ ਕਰਨ ਲਈ ਚੋਰੀ ਅੰਦਰ ਆ ਵੜੇ, ਜਿਹੜੀ ਸਾਨੂੰ ਮਸੀਹ ਯਿਸੂ ਵਿੱਚ ਹੈ, ਤਾਂ ਜੋ ਸਾਨੂੰ ਗ਼ੁਲਾਮ ਬਣਾ ਲੈਣ। ⁵ਅਸੀਂ ਇੱਕ ਪਲ ਵੀ ਉਨ੍ਹਾਂ ਦੇ ਅਧੀਨ ਨਾ ਹੋਏ, ਤਾਂ ਜੋ ਖ਼ੁਸ਼ਖ਼ਬਰੀ ਦੀ ਸਚਿਆਈ ਤੁਹਾਡੇ ਨਾਲ ਬਣੀ ਰਹੇ। ⁶ਰਹੀ ਉਨ੍ਹਾਂ ਦੀ ਗੱਲ ਜਿਹੜੇ ਆਦਰ ਵਾਲੇ ਗਿਣੇ ਜਾਂਦੇ ਸਨ—ਉਹ ਜੋ ਵੀ ਸਨ, ਇਸ ਨਾਲ ਮੈਨੂੰ ਕੋਈ ਫ਼ਰਕ ਨਹੀਂ ਪੈਂਦਾ; ਸਾਡਾ ਪਿਤਾ ਕਿਸੇ ਦਾ ਪੱਖਪਾਤ ਨਹੀਂ ਕਰਦਾ—ਉਨ੍ਹਾਂ ਆਦਰ ਵਾਲੇ ਗਿਣੇ ਜਾਂਦਿਆਂ ਨੇ ਮੈਨੂੰ ਕੁਝ ਵੀ ਨਾ ਵਧਾਇਆ। ⁷ਸਗੋਂ ਉਨ੍ਹਾਂ ਨੇ ਵੇਖਿਆ ਕਿ ਜਿਵੇਂ ਪਤਰਸ ਨੂੰ ਸੁੰਨਤੀਆਂ ਲਈ, ਤਿਵੇਂ ਮੈਨੂੰ ਬੇਸੁੰਨਤਿਆਂ ਲਈ ਖ਼ੁਸ਼ਖ਼ਬਰੀ ਸੌਂਪੀ ਗਈ ਸੀ। ⁸ਕਿਉਂਕਿ ਜਿਸ ਨੇ ਪਤਰਸ ਵਿੱਚ ਕੰਮ ਕਰ ਕੇ ਉਸ ਨੂੰ ਸੁੰਨਤੀਆਂ ਲਈ ਰਸੂਲ ਬਣਾਇਆ, ਉਸੇ ਨੇ ਮੇਰੇ ਵਿੱਚ ਵੀ ਕੰਮ ਕਰ ਕੇ ਮੈਨੂੰ ਪਰਾਈਆਂ ਕੌਮਾਂ ਲਈ ਬਣਾਇਆ। ⁹ਅਤੇ ਜਿਹੜੀ ਕਿਰਪਾ ਮੈਨੂੰ ਦਿੱਤੀ ਗਈ ਸੀ, ਉਸ ਨੂੰ ਪਛਾਣ ਕੇ ਯਾਕੂਬ, ਪਤਰਸ ਅਤੇ ਯੂਹੰਨਾ, ਜਿਹੜੇ ਥੰਮ੍ਹ ਸਮਝੇ ਜਾਂਦੇ ਸਨ, ਨੇ ਮੈਨੂੰ ਅਤੇ ਬਰਨਬਾਸ ਨੂੰ ਸੰਗਤ ਦਾ ਸੱਜਾ ਹੱਥ ਦਿੱਤਾ: ਅਸੀਂ ਪਰਾਈਆਂ ਕੌਮਾਂ ਕੋਲ ਜਾਈਏ ਅਤੇ ਉਹ ਸੁੰਨਤੀਆਂ ਕੋਲ। ¹⁰ਉਨ੍ਹਾਂ ਨੇ ਕੇਵਲ ਇਹੋ ਮੰਗਿਆ ਕਿ ਅਸੀਂ ਗ਼ਰੀਬਾਂ ਨੂੰ ਚੇਤੇ ਰੱਖੀਏ—ਇਹੋ ਗੱਲ ਜਿਸ ਨੂੰ ਕਰਨ ਲਈ ਮੈਂ ਪਹਿਲਾਂ ਹੀ ਲੋਚਦਾ ਸੀ।

ਪੌਲੁਸ ਨੇ ਅੰਤਾਕਿਯਾ ਵਿੱਚ ਕੇਫ਼ਾਸ ਦਾ ਸਾਹਮਣਾ ਕੀਤਾ

¹¹ਪਰ ਜਦੋਂ ਪਤਰਸ ਅੰਤਾਕਿਯਾ ਨੂੰ ਆਇਆ, ਤਾਂ ਮੈਂ ਉਹ ਦੇ ਮੂੰਹ ਉੱਤੇ ਉਹ ਦਾ ਵਿਰੋਧ ਕੀਤਾ, ਕਿਉਂਕਿ ਉਹ ਦੋਸ਼ੀ ਠਹਿਰਿਆ ਸੀ। ¹²ਇਸ ਤੋਂ ਪਹਿਲਾਂ ਕਿ ਯਾਕੂਬ ਵੱਲੋਂ ਕੁਝ ਮਨੁੱਖ ਆਉਣ, ਉਹ ਪਰਾਈਆਂ ਕੌਮਾਂ ਦੇ ਨਾਲ ਖਾਂਦਾ ਹੁੰਦਾ ਸੀ; ਪਰ ਜਦੋਂ ਉਹ ਆਏ, ਤਾਂ ਉਹ ਸੁੰਨਤ ਵਾਲਿਆਂ ਤੋਂ ਡਰ ਕੇ ਪਿੱਛੇ ਹਟ ਗਿਆ ਅਤੇ ਆਪਣੇ ਆਪ ਨੂੰ ਅੱਡ ਕਰ ਲਿਆ। ^a a v12 "ਸੁੰਨਤ ਵਾਲੇ"—ਯਹੂਦੀ ਮਸੀਹੀ, ਜਿਹੜੇ ਜ਼ੋਰ ਦਿੰਦੇ ਸਨ ਕਿ ਪਰਾਈਆਂ ਕੌਮਾਂ ਦੇ ਵਿਸ਼ਵਾਸੀਆਂ ਨੂੰ ਪੂਰੀ ਤਰ੍ਹਾਂ ਕਬੂਲ ਹੋਣ ਲਈ ਸੁੰਨਤ ਕਰਾਉਣੀ ਜ਼ਰੂਰੀ ਹੈ। ¹³ਅਤੇ ਬਾਕੀ ਯਹੂਦੀ ਵੀ ਇਸ ਦੰਭ ਵਿੱਚ ਉਹ ਦੇ ਨਾਲ ਰਲ ਗਏ, ਇੱਥੋਂ ਤੱਕ ਕਿ ਬਰਨਬਾਸ ਵੀ ਉਨ੍ਹਾਂ ਦੇ ਦੰਭ ਵਿੱਚ ਵਹਿ ਗਿਆ। ¹⁴ਪਰ ਜਦੋਂ ਮੈਂ ਵੇਖਿਆ ਕਿ ਉਹ ਖ਼ੁਸ਼ਖ਼ਬਰੀ ਦੀ ਸਚਿਆਈ ਅਨੁਸਾਰ ਸਿੱਧੀ ਚਾਲ ਨਹੀਂ ਚੱਲਦੇ, ਤਾਂ ਮੈਂ ਸਭਨਾਂ ਦੇ ਸਾਹਮਣੇ ਪਤਰਸ ਨੂੰ ਆਖਿਆ, "ਜੇ ਤੂੰ ਯਹੂਦੀ ਹੋ ਕੇ ਯਹੂਦੀਆਂ ਵਾਂਗੂੰ ਨਹੀਂ, ਸਗੋਂ ਪਰਾਈਆਂ ਕੌਮਾਂ ਵਾਂਗੂੰ ਜੀਵਨ ਬਿਤਾਉਂਦਾ ਹੈਂ, ਤਾਂ ਤੂੰ ਪਰਾਈਆਂ ਕੌਮਾਂ ਨੂੰ ਯਹੂਦੀਆਂ ਵਾਂਗੂੰ ਜੀਵਨ ਬਿਤਾਉਣ ਲਈ ਕਿਵੇਂ ਮਜਬੂਰ ਕਰਦਾ ਹੈਂ?"

¹⁵ਅਸੀਂ ਤਾਂ ਜਨਮ ਤੋਂ ਯਹੂਦੀ ਹਾਂ, ਪਰਾਈਆਂ ਕੌਮਾਂ ਵਿੱਚੋਂ ਪਾਪੀ ਨਹੀਂ, ¹⁶ਤਾਂ ਵੀ ਅਸੀਂ ਜਾਣਦੇ ਹਾਂ ਕਿ ਮਨੁੱਖ ਸ਼ਰਾ ਦੇ ਕੰਮਾਂ ਤੋਂ ਨਹੀਂ, ਸਗੋਂ ਯਿਸੂ ਮਸੀਹ ਉੱਤੇ ਵਿਸ਼ਵਾਸ ਦੇ ਰਾਹੀਂ ਪਰਮੇਸ਼ੁਰ ਨਾਲ ਧਰਮੀ ਠਹਿਰਾਇਆ ਜਾਂਦਾ ਹੈ। ਅਸਾਂ ਵੀ ਮਸੀਹ ਯਿਸੂ ਉੱਤੇ ਭਰੋਸਾ ਕੀਤਾ, ਤਾਂ ਜੋ ਅਸੀਂ ਸ਼ਰਾ ਦੇ ਕੰਮਾਂ ਤੋਂ ਨਹੀਂ, ਸਗੋਂ ਮਸੀਹ ਉੱਤੇ ਵਿਸ਼ਵਾਸ ਦੇ ਰਾਹੀਂ ਧਰਮੀ ਠਹਿਰਾਏ ਜਾਈਏ—ਕਿਉਂਕਿ ਸ਼ਰਾ ਦੇ ਕੰਮਾਂ ਤੋਂ ਕੋਈ ਮਨੁੱਖ ਧਰਮੀ ਨਹੀਂ ਠਹਿਰਦਾ। ¹⁷ਪਰ ਜੇ ਮਸੀਹ ਵਿੱਚ ਧਰਮੀ ਠਹਿਰਨ ਦੀ ਭਾਲ ਵਿੱਚ ਅਸੀਂ ਆਪ ਵੀ ਪਾਪੀ ਨਿੱਕਲੇ, ਤਾਂ ਕੀ ਮਸੀਹ ਪਾਪ ਦਾ ਸੇਵਕ ਹੈ? ਬਿਲਕੁਲ ਨਹੀਂ! ¹⁸ਕਿਉਂਕਿ ਜੇ ਮੈਂ ਜਿਹੜੀਆਂ ਚੀਜ਼ਾਂ ਢਾਹ ਦਿੱਤੀਆਂ ਸਨ, ਉਨ੍ਹਾਂ ਨੂੰ ਫਿਰ ਉਸਾਰਾਂ, ਤਾਂ ਮੈਂ ਆਪਣੇ ਆਪ ਨੂੰ ਉਲੰਘਣਾ ਕਰਨ ਵਾਲਾ ਸਾਬਤ ਕਰਦਾ ਹਾਂ। ¹⁹ਕਿਉਂਕਿ ਮੈਂ ਸ਼ਰਾ ਦੇ ਰਾਹੀਂ ਸ਼ਰਾ ਲਈ ਮਰ ਗਿਆ, ਤਾਂ ਜੋ ਮੈਂ ਸਾਡੇ ਪਿਤਾ ਲਈ ਜੀਵਾਂ। ²⁰ਮੈਂ ਮਸੀਹ ਦੇ ਨਾਲ ਸਲੀਬ ਉੱਤੇ ਚਾੜ੍ਹਿਆ ਗਿਆ ਹਾਂ। ਹੁਣ ਮੈਂ ਨਹੀਂ ਜੀਉਂਦਾ, ਸਗੋਂ ਮਸੀਹ ਮੇਰੇ ਵਿੱਚ ਜੀਉਂਦਾ ਹੈ। ਅਤੇ ਜੋ ਜੀਵਨ ਮੈਂ ਹੁਣ ਸਰੀਰ ਵਿੱਚ ਜੀਉਂਦਾ ਹਾਂ, ਉਹ ਸਾਡੇ ਪਿਤਾ ਦੇ ਪੁੱਤਰ ਉੱਤੇ ਵਿਸ਼ਵਾਸ ਨਾਲ ਜੀਉਂਦਾ ਹਾਂ, ਜਿਸ ਨੇ ਮੈਨੂੰ ਪਿਆਰ ਕੀਤਾ ਅਤੇ ਮੇਰੇ ਲਈ ਆਪਣੇ ਆਪ ਨੂੰ ਦੇ ਦਿੱਤਾ। ²¹ਮੈਂ ਸਾਡੇ ਪਿਤਾ ਦੀ ਕਿਰਪਾ ਨੂੰ ਰੱਦ ਨਹੀਂ ਕਰਦਾ; ਕਿਉਂਕਿ ਜੇ ਧਾਰਮਿਕਤਾ ਸ਼ਰਾ ਦੇ ਰਾਹੀਂ ਮਿਲਦੀ ਹੈ, ਤਾਂ ਮਸੀਹ ਵਿਅਰਥ ਹੀ ਮਰਿਆ।