گلتیوں 2

2 ¹چودہ سال بعد میں برنباس کے ساتھ دوبارہ یروشلیم کو گیا، اور طِطُس کو بھی ساتھ لے گیا۔ ²میں مکاشفہ کے مطابق گیا اور جو خوشخبری میں غیر اقوام میں سناتا ہوں وہ اُن کے سامنے پیش کی—نجی طور پر، اُن لوگوں کے سامنے جو معتبر سمجھے جاتے ہیں—تاکہ ایسا نہ ہو کہ میری دوڑ رائیگاں ہو، یا رائیگاں ہو چکی ہو۔ ³لیکن طِطُس تک، جو میرے ساتھ تھا، اگرچہ یونانی تھا، ختنہ کرانے پر مجبور نہ کیا گیا۔ ⁴یہ اُن جھوٹے بھائیوں کے سبب تھا جو چپکے سے اندر لائے گئے اور خفیہ طور پر گھس آئے تاکہ اُس آزادی کی جاسوسی کریں جو ہمیں مسیح یسوع میں حاصل ہے، اور اُن کا مقصد ہمیں غلام بنانا تھا۔ ⁵ہم نے ایک لمحے کے لیے بھی اُن کے آگے سر نہ جھکایا، تاکہ خوشخبری کی سچائی تمہارے درمیان قائم رہے۔ ⁶جہاں تک اُن لوگوں کا تعلق ہے جو معتبر سمجھے جاتے ہیں—وہ جو کچھ بھی تھے، مجھے اِس سے کوئی فرق نہیں پڑتا؛ ہمارا باپ کسی کی طرفداری نہیں کرتا—اُن معتبر لوگوں نے میرے پیغام میں کچھ اضافہ نہ کیا۔ ⁷بلکہ اُنہوں نے دیکھا کہ جس طرح پطرس کو مختونوں کے لیے خوشخبری سونپی گئی تھی، اُسی طرح مجھے نامختونوں کے لیے خوشخبری سونپی گئی ہے۔ ⁸کیونکہ جس نے پطرس میں کام کر کے اُسے مختونوں کے لیے رسول بنایا، اُسی نے مجھ میں بھی کام کیا تاکہ میں غیر اقوام کے لیے رسول بنوں۔ ⁹اور جو فضل مجھے بخشا گیا تھا اُسے پہچان کر، یعقوب، پطرس اور یوحنّا نے—جو ستون مانے جاتے ہیں—مجھے اور برنباس کو رفاقت کا دہنا ہاتھ دیا: کہ ہم غیر اقوام کے پاس جائیں اور وہ مختونوں کے پاس۔ ¹⁰اُنہوں نے صرف یہ چاہا کہ ہم غریبوں کو یاد رکھیں—اور یہی وہ بات تھی جسے کرنے کا میں خود بھی مشتاق تھا۔

پولُس کا انطاکیہ میں کیفا سے مقابلہ

¹¹لیکن جب پطرس انطاکیہ آیا تو میں نے رُوبرُو اُس کی مخالفت کی، کیونکہ وہ قابلِ ملامت ٹھہرا تھا۔ ¹²اِس سے پہلے کہ یعقوب کی طرف سے کچھ لوگ آئیں، وہ غیر اقوام کے ساتھ کھانا کھاتا تھا؛ لیکن جب وہ آئے تو وہ مختونوں کے گروہ سے ڈر کر پیچھے ہٹ گیا اور اپنے آپ کو الگ کر لیا۔ ^a a v12 ”مختونوں کے گروہ“—وہ یہودی مسیحی جو اِس بات پر اصرار کرتے تھے کہ غیر اقوام کے ایمان داروں کے مکمل طور پر قبول کیے جانے کے لیے ختنہ کرانا ضروری ہے۔ ¹³باقی یہودی بھی اِس ریاکاری میں اُس کے ساتھ شامل ہو گئے، یہاں تک کہ برنباس بھی اُن کی ریاکاری میں بہہ گیا۔ ¹⁴لیکن جب میں نے دیکھا کہ وہ خوشخبری کی سچائی کے مطابق سیدھی چال نہیں چل رہے، تو میں نے سب کے سامنے پطرس سے کہا، ”اگر تُو یہودی ہو کر غیر قوموں کی طرح زندگی گزارتا ہے، نہ کہ یہودیوں کی طرح، تو پھر تُو غیر اقوام کو یہودیوں کی طرح زندگی گزارنے پر کیسے مجبور کر سکتا ہے؟“

¹⁵ہم تو پیدائشی طور پر یہودی ہیں، نہ کہ غیر اقوام میں سے گنہگار، ¹⁶پھر بھی ہم جانتے ہیں کہ کوئی شخص شریعت کے اعمال سے خُدا کے سامنے راستباز نہیں ٹھہرتا، بلکہ یسوع مسیح پر ایمان لانے سے۔ اِس لیے ہم نے بھی مسیح یسوع پر بھروسا کیا، تاکہ مسیح پر ایمان سے راستباز ٹھہریں، نہ کہ شریعت کے اعمال سے—کیونکہ شریعت کے اعمال سے کوئی انسان راستباز نہیں ٹھہرتا۔ ¹⁷لیکن اگر مسیح میں راستباز ٹھہرنے کی تلاش میں ہم خود بھی گنہگار پائے جائیں، تو کیا مسیح گناہ کا خادم ہے؟ ہرگز نہیں! ¹⁸کیونکہ اگر میں جسے ڈھا چکا ہوں اُسے دوبارہ بناؤں، تو میں اپنے آپ کو خطاکار ثابت کرتا ہوں۔ ¹⁹کیونکہ میں شریعت ہی کے وسیلے سے شریعت کے لیے مر گیا، تاکہ میں ہمارے باپ کے لیے جیوں۔ ²⁰میں مسیح کے ساتھ مصلوب ہو چکا ہوں۔ اب میں زندہ نہیں رہا، بلکہ مسیح مجھ میں زندہ ہے۔ اور جو زندگی میں اب جسم میں گزارتا ہوں وہ ہمارے باپ کے بیٹے پر ایمان کے وسیلے سے گزارتا ہوں، جس نے مجھ سے محبت کی اور اپنے آپ کو میرے لیے دے دیا۔ ²¹میں ہمارے باپ کے فضل کو رد نہیں کرتا؛ کیونکہ اگر راستبازی شریعت کے ذریعے ملتی ہے، تو مسیح کا مرنا بےفائدہ ہوا۔