ପାଉଲଙ୍କ ସୁସମାଚାର ଯିରୂଶାଲମରେ ଦୃଢ଼ୀକୃତ

ପାଉଲ ନିଜ ସୁସମାଚାର ଯିରୂଶାଲମକୁ ନେଇଯାଆନ୍ତି ଏବଂ ସ୍ତମ୍ଭସ୍ୱରୂପ ନେତାମାନେ ତହିଁରେ କିଛି ଯୋଗ କରନ୍ତି ନାହିଁ। ପରେ ଭୟରେ ଅଣଯିହୂଦୀମାନଙ୍କ ଭୋଜନରୁ ପଛଘୁଞ୍ଚା ଦେଇଥିବାରୁ ସେ ପିତରଙ୍କୁ ମୁହାଁମୁହିଁ ପ୍ରତିବାଦ କରନ୍ତି। କେହି ବ୍ୟବସ୍ଥା ପାଳନ ଦ୍ୱାରା ଧାର୍ମିକ ଗଣିତ ହୁଏ ନାହିଁ; ପାଉଲ ଏବେ ଆମ ପିତାଙ୍କ ପୁତ୍ରଙ୍କଠାରେ ବିଶ୍ୱାସ ଦ୍ୱାରା ଜୀବନଯାପନ କରନ୍ତି।

ଅଧ୍ୟାୟ 2।

ଚଉଦ ବର୍ଷ ଉତ୍ତାରେ ମୁଁ ବର୍ଣ୍ଣବ୍ବାଙ୍କ ସହିତ ତୀତସଙ୍କୁ ମଧ୍ୟ ସଙ୍ଗରେ ନେଇ ପୁନର୍ବାର ଯିରୂଶାଲମକୁ ଗଲି। ମୁଁ ପ୍ରକାଶନା ଅନୁସାରେ ଉପରକୁ ଯାଇ, ବିଜାତିମାନଙ୍କ ମଧ୍ୟରେ ଯେଉଁ ସୁସମାଚାର ଘୋଷଣା କରୁଅଛି, ତାହା ସେମାନଙ୍କ ନିକଟରେ ଉପସ୍ଥାପନ କଲି—ବିଶେଷତଃ ସମ୍ଭ୍ରାନ୍ତ ବ୍ୟକ୍ତିମାନଙ୍କ ନିକଟରେ ଗୋପନରେ, ଯେପରି ମୁଁ ବୃଥା ନ ଦୌଡ଼େ, କିମ୍ବା ବୃଥା ନ ଦୌଡ଼ିଥାଏ। ମାତ୍ର ମୋʼ ସଙ୍ଗରେ ଥିବା ତୀତସ ଗ୍ରୀକ ହେଲେ ହେଁ ସୁଦ୍ଧା ତାହାଙ୍କୁ ସୁନ୍ନତ ହେବା ପାଇଁ ବାଧ୍ୟ କରାଗଲା ନାହିଁ। ଏହା ଗୋପନରେ ଅଣାଯାଇଥିବା ଭଣ୍ଡ ଭ୍ରାତୃଗଣଙ୍କ କାରଣରୁ ଘଟିଲା, ଯେଉଁମାନେ ଖ୍ରୀଷ୍ଟ ଯୀଶୁଙ୍କଠାରେ ଆମ୍ଭମାନଙ୍କର ଯେଉଁ ସ୍ଵାଧୀନତା ଅଛି, ତାହା ଗୁପ୍ତଚର ପରି ଅନୁସନ୍ଧାନ କରିବା ନିମନ୍ତେ ଲୁଚିକରି ଭିତରକୁ ପଶିଲେ, ଆମ୍ଭମାନଙ୍କୁ ଦାସ କରିବାକୁ ଉଦ୍ଦେଶ୍ୟ କଲେ। ଆମ୍ଭେମାନେ କ୍ଷଣକ ନିମନ୍ତେ ହେଁ ସେମାନଙ୍କ ବଶୀଭୂତ ହେଲୁ ନାହିଁ, ଯେପରି ସୁସମାଚାରର ସତ୍ୟ ତୁମ୍ଭମାନଙ୍କ ସଙ୍ଗରେ ସ୍ଥିର ରହେ। ଆଉ ଯେଉଁମାନେ ସମ୍ଭ୍ରାନ୍ତ ବୋଲି ଗଣିତ, ସେମାନେ ଯାହା ଥିଲେ ତାହା ମୋʼ ପକ୍ଷରେ କିଛି ଭେଦ ଜନ୍ମାଏ ନାହିଁ; ଆମ୍ଭମାନଙ୍କ ପିତା ମନୁଷ୍ୟର ମୁଖାପେକ୍ଷା କରନ୍ତି ନାହିଁ—ସେହି ସମ୍ଭ୍ରାନ୍ତ ବ୍ୟକ୍ତିମାନେ ମୋତେ କିଛି ଅଧିକ ଯୋଗ କଲେ ନାହିଁ। ବରଂ ପିତର ଯେପରି ସୁନ୍ନତ-ପ୍ରାପ୍ତ ଲୋକଙ୍କ ନିମନ୍ତେ ସୁସମାଚାରର ଭାର ପାଇଥିଲେ, ସେପରି ମୁଁ ଅସୁନ୍ନତ-ପ୍ରାପ୍ତ ଲୋକଙ୍କ ନିମନ୍ତେ ତାହା ପାଇଅଛି ବୋଲି ସେମାନେ ଦେଖିଲେ। କାରଣ ଯେ ସୁନ୍ନତ-ପ୍ରାପ୍ତ ଲୋକଙ୍କ ପ୍ରତି ପ୍ରେରିତ କାର୍ଯ୍ୟ ନିମନ୍ତେ ପିତରଙ୍କଠାରେ କାର୍ଯ୍ୟ କଲେ, ସେ ବିଜାତିମାନଙ୍କ ପ୍ରତି ମୋʼ ଠାରେ ମଧ୍ୟ କାର୍ଯ୍ୟ କଲେ। ମୋତେ ଦତ୍ତ ଅନୁଗ୍ରହ ଜାଣି, ସ୍ତମ୍ଭ ବୋଲି ଗଣିତ ଯାକୁବ, ପିତର ଓ ଯୋହନ ମୋତେ ଓ ବର୍ଣ୍ଣବ୍ବାଙ୍କୁ ସହଭାଗିତାର ଦକ୍ଷିଣ ହସ୍ତ ଦେଲେ: ଆମ୍ଭେମାନେ ବିଜାତିମାନଙ୍କ ନିକଟକୁ, ଆଉ ସେମାନେ ସୁନ୍ନତ-ପ୍ରାପ୍ତ ଲୋକଙ୍କ ନିକଟକୁ ଯିବୁ। କେବଳ ଆମ୍ଭେମାନେ ଯେପରି ଦରିଦ୍ରମାନଙ୍କୁ ସ୍ମରଣ କରୁ, ଏହା ସେମାନେ ପ୍ରାର୍ଥନା କଲେ—ଯାହା କରିବାକୁ ମୁଁ ମଧ୍ୟ ଉଦ୍‌ଯୋଗୀ ଥିଲି।

ପାଉଲ ଆନ୍ତିୟଖିଆରେ କୈଫାଙ୍କୁ ପ୍ରତିରୋଧ କଲେ

କିନ୍ତୁ ପିତର ଯେତେବେଳେ ଆନ୍ତିୟଖିଆକୁ ଆସିଲେ, ସେତେବେଳେ ମୁଁ ତାହାଙ୍କ ମୁଖ ଆଗରେ ତାହାଙ୍କୁ ପ୍ରତିରୋଧ କଲି, କାରଣ ସେ ଦୋଷୀ ସାବ୍ୟସ୍ତ ହୋଇଥିଲେ। ଯାକୁବଙ୍କ ନିକଟରୁ କେତେକ ଲୋକ ଆସିବା ପୂର୍ବରୁ ସେ ବିଜାତିମାନଙ୍କ ସଙ୍ଗରେ ଭୋଜନ କରୁଥିଲେ; ମାତ୍ର ସେମାନେ ଆସନ୍ତେ, ସେ ସୁନ୍ନତ-ପ୍ରାପ୍ତ ଲୋକଙ୍କୁ ଭୟ କରି ଆପଣାକୁ ଟାଣି ନେଇ ପୃଥକ କଲେ। ^a ଅନ୍ୟ ଯିହୂଦୀମାନେ ମଧ୍ୟ ତାହାଙ୍କ ସହିତ ଏହି କପଟରେ ଯୋଗ ଦେଲେ, ଏଣୁ ବର୍ଣ୍ଣବ୍ବା ସୁଦ୍ଧା ସେମାନଙ୍କ କପଟରେ ଭ୍ରାନ୍ତ ହୋଇଗଲେ। କିନ୍ତୁ ଯେତେବେଳେ ମୁଁ ଦେଖିଲି ଯେ ସେମାନେ ସୁସମାଚାରର ସତ୍ୟ ଅନୁସାରେ ସରଳ ଭାବରେ ଆଚରଣ କରୁ ନାହାନ୍ତି, ସେତେବେଳେ ମୁଁ ସମସ୍ତଙ୍କ ସାକ୍ଷାତରେ ପିତରଙ୍କୁ କହିଲି, “ଆପଣ ଯିହୂଦୀ ହୋଇ ଯଦି ଯିହୂଦୀ ପରି ନ ବଞ୍ଚି ବିଜାତି ପରି ବଞ୍ଚନ୍ତି, ତେବେ ବିଜାତିମାନଙ୍କୁ ଯିହୂଦୀ ପରି ବଞ୍ଚିବା ନିମନ୍ତେ କିପରି ବାଧ୍ୟ କରନ୍ତି?”

ଆମ୍ଭେମାନେ ତ ଜନ୍ମରୁ ଯିହୂଦୀ, ବିଜାତୀୟ ପାପୀ ନୋହୁଁ, ତଥାପି ଆମ୍ଭେମାନେ ଜାଣୁ ଯେ ମନୁଷ୍ୟ ବ୍ୟବସ୍ଥାର କର୍ମ ଦ୍ଵାରା ଈଶ୍ଵରଙ୍କ ଛାମୁରେ ଧାର୍ମିକ ଗଣିତ ହୁଏ ନାହିଁ, ମାତ୍ର ଯୀଶୁ ଖ୍ରୀଷ୍ଟଙ୍କଠାରେ ବିଶ୍ଵାସ ଦ୍ଵାରା ହୁଏ। ଆମ୍ଭେମାନେ ମଧ୍ୟ ବ୍ୟବସ୍ଥାର କର୍ମ ଦ୍ଵାରା ନୁହେଁ, ବରଂ ଖ୍ରୀଷ୍ଟଙ୍କଠାରେ ବିଶ୍ଵାସ ଦ୍ଵାରା ଧାର୍ମିକ ଗଣିତ ହେବା ପାଇଁ ଖ୍ରୀଷ୍ଟ ଯୀଶୁଙ୍କଠାରେ ବିଶ୍ଵାସ କଲୁ—କାରଣ ବ୍ୟବସ୍ଥାର କର୍ମ ଦ୍ଵାରା କୌଣସି ମନୁଷ୍ୟ ଧାର୍ମିକ ଗଣିତ ହୁଏ ନାହିଁ। କିନ୍ତୁ ଖ୍ରୀଷ୍ଟଙ୍କଠାରେ ଧାର୍ମିକ ଗଣିତ ହେବାକୁ ଚେଷ୍ଟା କରୁଥିବା ବେଳେ ଯଦି ଆମ୍ଭେମାନେ ନିଜେ ମଧ୍ୟ ପାପୀ ବୋଲି ଦେଖାଯାଉ, ତେବେ କʼଣ ଖ୍ରୀଷ୍ଟ ପାପର ସେବକ? କେବେ ହେଁ ନୁହେଁ! କାରଣ ମୁଁ ଯାହା ଭାଙ୍ଗିଲି, ତାହା ଯଦି ପୁନର୍ବାର ଗଢ଼େ, ତେବେ ମୁଁ ଆପଣାକୁ ଅପରାଧୀ ବୋଲି ପ୍ରମାଣ କରେ। କାରଣ ମୁଁ ବ୍ୟବସ୍ଥା ଦ୍ଵାରା ବ୍ୟବସ୍ଥା ପ୍ରତି ମୃତ ହେଲି, ଯେପରି ମୁଁ ଆମ୍ଭମାନଙ୍କ ପିତାଙ୍କ ଉଦ୍ଦେଶ୍ୟରେ ବଞ୍ଚେ। ମୁଁ ଖ୍ରୀଷ୍ଟଙ୍କ ସହିତ କ୍ରୁଶରେ ହତ ହୋଇଅଛି। ବର୍ତ୍ତମାନ ମୁଁ ଆଉ ବଞ୍ଚେ ନାହିଁ, ମାତ୍ର ଖ୍ରୀଷ୍ଟ ମୋʼ ଠାରେ ବଞ୍ଚନ୍ତି। ଆଉ ଏବେ ମୁଁ ଶରୀରରେ ଯେଉଁ ଜୀବନ କ୍ଷେପଣ କରୁଅଛି, ତାହା ଆମ୍ଭମାନଙ୍କ ପିତାଙ୍କ ପୁତ୍ରଙ୍କଠାରେ ବିଶ୍ଵାସ ଦ୍ଵାରା କରୁଅଛି, ଯେ ମୋତେ ପ୍ରେମ କଲେ ଓ ମୋʼ ନିମନ୍ତେ ଆପଣାକୁ ଦେଲେ। ମୁଁ ଆମ୍ଭମାନଙ୍କ ପିତାଙ୍କ ଅନୁଗ୍ରହ ବ୍ୟର୍ଥ କରେ ନାହିଁ; କାରଣ ଯଦି ବ୍ୟବସ୍ଥା ଦ୍ଵାରା ଧାର୍ମିକତା ଆସେ, ତେବେ ଖ୍ରୀଷ୍ଟ ବୃଥାରେ ମଲେ।