கலாத்தியர் 2

2 ¹பதினான்கு வருஷங்களுக்குப் பின்பு, நான் மறுபடியும் பர்னபாவுடன் எருசலேமுக்குப் போனேன்; தீத்துவையும் கூட்டிக்கொண்டு போனேன். ²வெளிப்படுத்தலின்படியே நான் போனேன்; புறஜாதியாருக்குள்ளே நான் பிரசங்கிக்கிற சுவிசேஷத்தை அவர்களுக்கு விவரித்தேன்; நான் ஓடுகிறதும் ஓடினதும் விருதாவாய்ப் போகாதபடிக்கு, மதிக்கப்பட்டவர்களுக்குத் தனிமையாய் அதை விவரித்தேன். ³ஆனாலும் என்னுடனேகூட இருந்த தீத்து கிரேக்கனாயிருந்தும், விருத்தசேதனம் பண்ணிக்கொள்ள வேண்டுமென்று அவனுங்கூட கட்டாயப்படுத்தப்படவில்லை. ⁴கிறிஸ்து இயேசுவினிடத்தில் நமக்கு உண்டான சுதந்திரத்தை வேவுபார்க்கும்படி இரகசியமாய் உள்ளே கொண்டுவரப்பட்டு, நம்மை அடிமைப்படுத்த வேண்டுமென்று நுழைந்த கள்ள சகோதரர் நிமித்தமாக இப்படி நடந்தது. ⁵சுவிசேஷத்தின் சத்தியம் உங்களிடத்தில் நிலைத்திருக்கும்படிக்கு, நாங்கள் ஒரு நாழிகைகூட அவர்களுக்குக் கீழ்ப்படியவில்லை. ⁶மதிக்கப்பட்டவர்களைக்குறித்தோ—அவர்கள் எப்படிப்பட்டவர்களாயிருந்தாலும் எனக்கு ஒன்றுமில்லை; எங்கள் பிதா முகதாட்சிணியம் பாராதவர்—மதிக்கப்பட்ட அவர்கள் எனக்கு ஒன்றையும் கூட்டவில்லை. ⁷மாறாக, விருத்தசேதனமுள்ளவர்களுக்குச் சுவிசேஷத்தைக் காண்பிக்கும் பொறுப்பு பேதுருவினிடத்தில் ஒப்புவிக்கப்பட்டதுபோல, விருத்தசேதனமில்லாதவர்களுக்குச் சுவிசேஷத்தைக் காண்பிக்கும் பொறுப்பு என்னிடத்தில் ஒப்புவிக்கப்பட்டதென்று அவர்கள் கண்டார்கள். ⁸ஏனெனில், விருத்தசேதனமுள்ளவர்களுக்கு அப்போஸ்தலனாயிருக்கும்படி பேதுருவில் கிரியை செய்தவர், புறஜாதியாருக்காக என்னிலும் கிரியை செய்தார். ⁹எனக்கு அளிக்கப்பட்ட கிருபையை அறிந்து, தூண்களாக மதிக்கப்பட்ட யாக்கோபும், பேதுருவும், யோவானும், நானும் பர்னபாவும் புறஜாதியாரிடத்திற்குப் போகவும், அவர்கள் விருத்தசேதனமுள்ளவர்களிடத்திற்குப் போகவும், எனக்கும் பர்னபாவுக்கும் அந்நியோந்நியத்தின் அடையாளமாக வலதுகைகளைக் கொடுத்தார்கள். ¹⁰நாங்கள் தரித்திரரை நினைத்துக்கொள்ளவேண்டும் என்பதொன்றையே அவர்கள் கேட்டுக்கொண்டார்கள்; அப்படிச் செய்கிறதற்கு நானும் ஜாக்கிரதையாயிருந்தேன்.

அந்தியோகியாவில் பவுல் கேபாவை எதிர்க்கிறார்

¹¹பேதுரு அந்தியோகியாவுக்கு வந்தபோது, அவன் குற்றவாளியாய்க் காணப்பட்டபடியால், நான் முகமுகமாய் அவனை எதிர்த்தேன். ¹²யாக்கோபினிடத்திலிருந்து சிலர் வருகிறதற்கு முன்னே அவன் புறஜாதியாரோடே சாப்பிட்டான்; அவர்கள் வந்தபோதோ, விருத்தசேதனமுள்ளவர்களுக்குப் பயந்து, அவன் விலகிப் பிரிந்துகொண்டான். ^a a v12 “விருத்தசேதனமுள்ளவர்கள்” — புறஜாதி விசுவாசிகள் முழுமையாய் ஏற்றுக்கொள்ளப்படவேண்டுமானால் விருத்தசேதனம் பண்ணிக்கொள்ளவேண்டும் என்று வலியுறுத்திய யூத கிறிஸ்தவர்கள். ¹³மற்ற யூதரும் அவனோடேகூட இந்த மாயத்தில் சேர்ந்துகொண்டார்கள்; அதினால் பர்னபாவும்கூட அவர்களுடைய மாயத்தினால் இழுத்துக்கொள்ளப்பட்டான். ¹⁴ஆனால் சுவிசேஷத்தின் சத்தியத்தின்படி அவர்கள் செம்மையாய் நடவாததை நான் கண்டபோது, எல்லாருக்கும் முன்பாக நான் பேதுருவை நோக்கி: “யூதனாயிருக்கிற நீ யூதனைப்போலல்ல, புறஜாதியானைப்போல் ஜீவித்தால், புறஜாதியாரை யூதரைப்போல் ஜீவிக்கும்படி நீ எப்படிக் கட்டாயப்படுத்துகிறாய்?” என்றேன்.

¹⁵நாம் பிறப்பினாலே யூதராயிருக்கிறோமேயன்றி, புறஜாதியாராகிய பாவிகள் அல்ல; ¹⁶ஆயினும், மனுஷன் நியாயப்பிரமாணத்தின் கிரியைகளினாலே தேவனிடத்தில் நீதிமானாக்கப்படாமல், இயேசுகிறிஸ்துவைப்பற்றும் விசுவாசத்தினாலேயே நீதிமானாக்கப்படுகிறான் என்று அறிந்து, நாமும் நியாயப்பிரமாணத்தின் கிரியைகளினாலல்ல, கிறிஸ்துவைப்பற்றும் விசுவாசத்தினாலே நீதிமானாக்கப்படும்படிக்கு, கிறிஸ்து இயேசுவின்மேல் விசுவாசிகளானோம்; ஏனெனில், நியாயப்பிரமாணத்தின் கிரியைகளினாலே எந்த மனுஷனும் நீதிமானாக்கப்படுவதில்லை. ¹⁷நாம் கிறிஸ்துவுக்குள் நீதிமானாக்கப்படத் தேடுகையில், நாமும் பாவிகளாகக் காணப்பட்டால், கிறிஸ்து பாவத்திற்கு ஊழியக்காரரோ? அப்படியல்லவே! ¹⁸நான் இடித்துப்போட்டவைகளையே திரும்பக் கட்டினால், நான் மீறி நடக்கிறவனாக என்னை நானே காண்பிக்கிறேன். ¹⁹நான் எங்கள் பிதாவுக்கென்று பிழைக்கும்படி, நியாயப்பிரமாணத்தினாலே நியாயப்பிரமாணத்திற்கு மரித்தேன். ²⁰நான் கிறிஸ்துவுடனேகூடச் சிலுவையில் அறையப்பட்டேன்; இனி நான் அல்ல, கிறிஸ்துவே எனக்குள் பிழைத்திருக்கிறார்; இப்பொழுது நான் சரீரத்தில் பிழைத்திருக்கிற ஜீவனோ, என்னில் அன்புகூர்ந்து, எனக்காகத் தம்மைத்தாமே ஒப்புக்கொடுத்த எங்கள் பிதாவின் குமாரனைப்பற்றும் விசுவாசத்தினாலே பிழைத்திருக்கிறேன். ²¹நான் எங்கள் பிதாவின் கிருபையை விருதாவாக்குகிறதில்லை; நியாயப்பிரமாணத்தினாலே நீதி வருமானால், கிறிஸ்து மரித்தது வீணாயிருக்குமே.