ገላትያ 3

3 ¹እናንተ የማታስተውሉ ገላትያውያን ሆይ፤ ማን ጠነቈላችሁ? ኢየሱስ ክርስቶስ ተሰቅሎ በዓይናችሁ ፊት በግልጥ ተሳይቶ ነበር። ²ከእናንተ ይህን ብቻ ማወቅ እፈልጋለሁ፤ መንፈስ ቅዱስን የተቀበላችሁት በሕግ ሥራ ነውን ወይስ በእምነት በመስማት? ³እንዲህ የማታስተውሉ ናችሁን? በመንፈስ ጀምራችሁ አሁን በሰው ጥረት ትፈጸማላችሁን? ⁴እንዲህ ብዙ መከራን የተቀበላችሁት በከንቱ ነውን? በእውነት በከንቱ ከሆነ። ⁵እንግዲህ መንፈስ ቅዱስን አትረፍርፎ የሚሰጣችሁ፣ በመካከላችሁም ተኣምራትን የሚያደርገው አባታችን፣ ይህን የሚያደርገው በሕግ ሥራ ነውን ወይስ በእምነት በመስማት? ⁶እንደዚሁም አብርሃም “አባታችንን አመነ፤ ይህም ጽድቅ ሆኖ ተቈጠረለት።” ⁷እንግዲህ እምነት ያላቸው እነዚህ የአብርሃም ልጆች መሆናቸውን ዕወቁ።

⁸መጽሐፍ አባታችን አሕዛብን በእምነት እንደሚያጸድቅ አስቀድሞ አይቶ፣ ለአብርሃም ወንጌልን አስቀድሞ “በአንተ አሕዛብ ሁሉ ይባረካሉ” ብሎ ነገረው።

⁹ስለዚህ እምነት ያላቸው ከእምነቱ ሰው ከአብርሃም ጋራ ይባረካሉ።

¹⁰በሕግ ሥራ የሚታመኑ ሁሉ በርግማን ሥር ናቸውና፤ “በሕግ መጽሐፍ የተጻፈውን ሁሉ አዘውትሮ የማያደርግ ሁሉ የተረገመ ነው” ተብሎ ተጽፎአልና። ¹¹በሕግ ማንም በአባታችን ፊት እንደማይጸድቅ ግልጥ ነው፤ “ጻድቅ በእምነት ይኖራል።” ¹²ሕግ ግን በእምነት የተመሠረተ አይደለም፤ ይልቁንም “እነዚህን የሚያደርግ በእነርሱ ይኖራል።”

¹³ክርስቶስ ስለ እኛ ርግማን በመሆን ከሕግ ርግማን ዋጀን፤ መጽሐፍ “በዛፍ ላይ የተሰቀለ ሁሉ የተረገመ ነው” ይላልና። ¹⁴ይህንም ያደረገው የአብርሃም በረከት በክርስቶስ ኢየሱስ ወደ አሕዛብ እንዲደርስ፣ የተስፋውንም መንፈስ ቅዱስ በእምነት እንድንቀበል ነው።

ተስፋው ጸንቷል፤ ሕጉ ያገለግላል

¹⁵ወንድሞችና እኅቶች ሆይ፤ በሰው ልማድ እናገራለሁ፤ የጸና የሰውን ኪዳን ማንም አያፈርስም ወይም አይጨምርበትም። ¹⁶ተስፋዎቹ ለአብርሃምና ለዘሩ ተነገሩ። ስለ ብዙዎች “ለዘሮችህ” አይልም፤ ነገር ግን ስለ አንዱ “ለዘርህ” ይላል፤ እርሱም ክርስቶስ ነው። ¹⁷የምለውም ይህ ነው፤ ከአራት መቶ ሠላሳ ዓመት በኋላ የመጣው ሕግ፣ አባታችን አስቀድሞ ያጸናውን ኪዳን ሽሮ ተስፋውን አያስቀርም። ¹⁸ርስቱ ከሕግ ቢሆን ከዚያ በኋላ ከተስፋ አይደለም፤ አባታችን ግን ለአብርሃም በተስፋ ሰጠው።

¹⁹እንግዲህ ሕግ ለምን ተሰጠ? ተስፋው የተነገረለት ዘር እስኪመጣ ድረስ ስለ መተላለፍ ተጨመረ፤ በመላእክት በኩል በመካከለኛ እጅ ተዘጋጀ። ^a a v19 የአይሁድ ትውፊት፣ እግዚአብሔር በሲና ተራራ ሕጉን ለሙሴ በመላእክት አማካኝነት እንደ ሰጠው ያስተምር ነበር። ²⁰መካከለኛ ግን ለአንድ ወገን ብቻ አይደለም፤ አባታችን ግን አንድ ነው።

²¹እንግዲህ ሕግ የአባታችንን ተስፋዎች ይቃወማልን? ከቶ አይደለም! ሕይወትን ሊሰጥ የሚችል ሕግ ተሰጥቶ ቢሆን ኖሮ፣ ጽድቅ በእውነት ከሕግ በሆነ ነበር። ²²መጽሐፍ ግን ተስፋው በኢየሱስ ክርስቶስ በማመን ለሚያምኑ እንዲሰጥ፣ ሁሉን በኀጢአት ሥር ዘጋ።

²³እምነት ከመምጣቱ በፊት፣ ሊመጣ ያለው እምነት እስኪገለጥ ድረስ ተዘግተን በሕግ ሥር እንጠበቅ ነበር። ²⁴ስለዚህ እምነት ሊያጸድቀን፣ ሕግ እስከ ክርስቶስ ድረስ ሞግዚታችን ሆነ። ²⁵አሁን ግን እምነት ከመጣ በኋላ፣ ከዚያ በኋላ ከሞግዚት ሥር አይደለንም።

በእምነት የአብ ልጆች

²⁶በክርስቶስ ኢየሱስ ሁላችሁ በእምነት የአባታችን ልጆች ናችሁና። ²⁷ወደ ክርስቶስ የተጠመቃችሁ ሁላችሁ ክርስቶስን ለብሳችኋልና። ²⁸አይሁዳዊ ወይም ግሪክ የለም፤ ባሪያ ወይም ነጻ የለም፤ ወንድና ሴት የለም፤ ሁላችሁ በክርስቶስ ኢየሱስ አንድ ናችሁና። ²⁹የክርስቶስ ከሆናችሁ፣ የአብርሃም ዘር ናችሁ፤ እንደ ተስፋውም ወራሾች ናችሁ።