Galatians 3

3 ¹Una foolish Galatia people, na who bewitch una? Dem show Jesus Christ wey dem crucify for una eye clear-clear. ²Na only dis one I wan learn from una: na by di works of di law una take receive di Holy Spirit, abi na by hearing wey get faith? ³Una don foolish reach so? Una start with di Spirit, and now na by human effort una wan take reach di end? ⁴Una suffer plenty things for nothing—if e really be say na for nothing? ⁵So, our Papa, wey dey pour di Holy Spirit give una plenty-plenty and dey work miracle for una midst, e dey do dis one by di works of di law, abi na by hearing wey get faith? ⁶Na so e be with Abraham: “E believe our Papa, and dem count am to am as correct-and-holy way.” ⁷So, make una understand say, na dem wey get faith be di pikin dem of Abraham.

⁸Scripture see am before-before say our Papa go make di nations dem correct by faith, so e talk di good news to Abraham before di time reach: “Through you, all di nations dem go get blessing.”

⁹So, dem wey get faith dey get blessing together with Abraham, di man wey get faith.

¹⁰Because everybody wey dey lean on di works of law dey under curse, since dem write am say: “Curse dey on everybody wey no dey continue to do everything wey dem write for di Book of di Law.” ¹¹E clear say nobody dey correct before our Papa by di law: “Di correct-and-holy person go live by faith.” ¹²But di law no stand on top faith; instead, “Whoever do dem go live by dem.”

¹³Christ buy us commot from di law im curse when e become curse for us—because Scripture talk say, “Curse dey on everybody wey dem hang for tree.” ¹⁴E do dis one so that Abraham im blessing go come reach di nations dem inside Christ Jesus, so that we go take faith receive di Holy Spirit wey dem promise.

Di Promise Stand, di Law Dey Serve

¹⁵My brothers and sisters, make I talk am for human way: nobody dey cancel abi add anytin to human Covenant wey dem don confirm. ¹⁶Na to Abraham and im pikin dem talk di promises. E no talk say “and to pikin dem,” wey be plenty, but “and to your pikin,” wey be one, and dat one na Christ. ¹⁷See wetin I dey talk: di law, wey come 430 years after, no fit cancel di Covenant wey our Papa don already confirm, so as to spoil di promise. ¹⁸If na from law di inheritance dey come, e no be from promise again—but our Papa give am to Abraham through promise.

¹⁹Wetin be di law reason then? Na because of wrong-wrong things dem add am, until di pikin wey dem make di promise to go come—dem arrange am through angel dem by di hand of one mediator. ^a a v19 Jewish tradition hold am say na through angel dem wey stand for middle God take give Moses di law for Mount Sinai. ²⁰Now, mediator no dey for one side alone; but our Papa na one.

²¹So, di law dey against our Papa im promises dem? E no go ever happen! If law fit give life, then correct-and-holy way for really come from law. ²²But Scripture lock everytin under sin, so that dem go fit give di promise—through faith for Jesus Christ—to dem wey believe.

²³Before faith come, dem keep us under di law, lock us inside until dem go reveal di faith wey dey come. ²⁴So, di law na di one wey dey guide us until Christ come, so that faith go fit make us correct. ²⁵But now wey faith don come, we no dey under guide again.

Pikin dem of di Papa Through Faith

²⁶Because inside Christ Jesus, una all na pikin dem of our Papa through faith. ²⁷Because all of una wey dem baptize inside Christ don wear Christ like cloth. ²⁸Jew or Greek no dey, slave or free-person no dey, man and woman no dey—because una all na one inside Christ Jesus. ²⁹And if una belong to Christ, then una na Abraham im pikin dem, wey go inherit according to di promise.