ገላትያ 3 FHB Father's Heart Bible™

3 ¹ኣቱም ዓያሹ ገላትያ፥ መን ጠንቆለኩም? ኢየሱስ ክርስቶስ ተሰቒሉ ኣብ ቅድሚ ዓይንኹም ተራእየ። ²ካባኻትኩም እዙይ ጥራሕ ክፈልጥ እደሊ ኣለኹ፦ መንፈስ ቅዱስ ብግብሪ ሕጊ ድዩ ወይስ ብምስማዕ እምነት ዝተቐበልኩምዎ? ³ክሳዕ ክንድዙይ ዓያሹ ዲኹም? ብመንፈስ ጀሚርኩም፥ ሕዚ ብስጋ ዲኹም ትፍፀሙ ዘለኹም? ⁴ክንድዙይ ዝኣክል መከራ ብኸንቱ ዲኹም ዝተቐበልኩም፥ ብሓቂ ብኸንቱ እንተ ኾይኑ? ⁵እምበኣር እቲ መንፈስ ቅዱስ ብልግሲ ዝህበኩም፥ ኣብ ማእኸልኩምውን ተኣምራት ዝገብር ኣቦና፥ እዙይ ብግብሪ ሕጊ ድዩ ወይስ ብምስማዕ እምነት ዝገብሮ? ⁶ከምዙይ ኸዓ ብዛዕባ ኣብርሃም ኮነ፦ “ብኣቦና ኣመነ፥ ፅድቂ ኾይኑውን ተቘፀረሉ።” ⁷እምበኣር እቶም እምነት ዘለዎም፥ ንሳቶም ደቂ ኣብርሃም ከም ዝኾኑ ፍለጡ።

⁸እቲ ፅሑፍ፥ ኣቦና ንኣህዛብ ብእምነት ከም ዘፅድቖም ኣቐዲሙ ርእዩ፥ ንኣብርሃም “ብኣኻ ኵሎም ኣህዛብ ክባረኹ እዮም” ኢሉ ብስራት ኣቐዲሙ ነገሮ።

⁹እምበኣር እቶም እምነት ዘለዎም፥ ምስቲ ኣማኒ ኣብርሃም በረኸት ይረኽቡ።

¹⁰ብግብሪ ሕጊ ዝተኣማመኑ ዅሎም ትሕቲ መርገም እዮም እሞ፤ “ኣብ መፅሓፍ ሕጊ ተፂሒፉ ዘሎ ዅሉ ገይሩ ዘይፍፅም ኵሉ ርጉም እዩ” ተባሂሉ ተፂሒፉ እዩ። ¹¹ብሕጊ ኣብ ቅድሚ ኣቦና ዝፀድቕ ሓደ እኳ ኸም ዘየለ ግሉፅ እዩ፦ “ፃድቕ ብእምነት ክነብር እዩ።” ¹²እቲ ሕጊ ግና ኣብ እምነት ኣይተመስረተን፤ “እቲ ዝገብሮም ብእኦም ክነብር እዩ” ደኣ እዩ እምበር።

¹³ክርስቶስ ምእንታና መርገም ብምዃኑ፥ ካብ መርገም ሕጊ ተቤዘወና፤ “ኣብ ዕንፀይቲ ዝተሰቕለ ዅሉ ርጉም እዩ” ተባሂሉ ተፂሒፉ እዩ እሞ። ¹⁴እዙይ ዝገበረ፥ በረኸት ኣብርሃም ብክርስቶስ ኢየሱስ ናብ ኣህዛብ ምእንቲ ኽመፅእ፥ ንሕናውን ነቲ ተስፋ ዝተውሃበ መንፈስ ቅዱስ ብእምነት ምእንቲ ክንቅበል እዩ።

እቲ ተስፋ ይፀንዕ፥ እቲ ሕጊ የገልግል

¹⁵ኣቱም ኣሕዋተይ፥ ከም ኣዘራርባ ሰብ ክዛረብ፦ ዝፀደቐ ኺዳን ሰብ፥ ሓደ እኳ ኣይስርዞን ኣይውስኸሉንውን። ¹⁶እቲ ተስፋ ንኣብርሃምን ንዘርኡን ተነጊሩ ነይሩ። ብብዙሕ ቍፅሪ “ንዘርእታት” ኣይብልን፥ ብሓደ ቍፅሪ ደኣ “ንዘርእኻ” ይብል እምበር፤ ንሱ ኸዓ ክርስቶስ እዩ። ¹⁷እዝ ዝብሎ ዘለኹ እዙይ እዩ፦ ድሕሪ ኣርባዕተ ሚእትን ሰላሳን ዓመት ዝመፀ ሕጊ፥ ነቲ ኣቦና ኣቐዲሙ ዘፅደቖ ኺዳን፥ ነቲ ተስፋ ንምስራዝ ኣየፍርሶን እዩ። ¹⁸እቲ ርስቲ ኻብ ሕጊ እንተ ኾይኑ፥ ደጊም ካብ ተስፋ ኣይኮነን፤ ኣቦና ግና ንኣብርሃም ብተስፋ ገይሩ ሃቦ።

¹⁹እምበኣር ሕጊ ስለ ምንታይ? እቲ ተስፋ ዝተውሃቦ ዘርኢ ክሳዕ ዝመፅእ፥ ምእንቲ ኣበሳታት ተወሰኸ፤ ብኢድ ማእኸላይ ብመላእኽቲ ተሰሪዑ ተውሃበ። ^a a v19 ኣይሁድ ብልምዶም፥ እግዚኣብሄር ነቲ ሕጊ ኣብ ከረን ሲና ብመላእኽቲ ማእኸሎት ገይሩ ንሙሴ ከም ዝሃቦ ይኣምኑ ነበሩ። ²⁰ማእኸላይ ናይ ሓደ ወገን ጥራሕ ኣይኮነን፤ ኣቦና ግና ሓደ እዩ።

²¹እምበኣር ሕጊ ፀረ ተስፋታት ኣቦናዶ እዩ? ከቶ ኣይኮነን! ህይወት ክህብ ዝኽእል ሕጊ እንተ ዝህሉ፥ ፅድቂ ብሓቂ ኻብ ሕጊ መፅአ ነይሩ። ²²እቲ ፅሑፍ ግና፥ እቲ ተስፋ ብእምነት ኢየሱስ ክርስቶስ ነቶም ዝኣምኑ ምእንቲ ኽውሃቦም፥ ኵሉ ኣብ ትሕቲ ሓጢኣት ዓፀዎ።

²³እምነት ቅድሚ ምምፅኡ፥ እቲ ዝመፅእ እምነት ክሳዕ ዝግለፅ፥ ተዓፂና ኣብ ትሕቲ ሕጊ ተሓለና። ²⁴ስለዙይ እቲ ሕጊ፥ እምነት ምእንቲ ኸፅድቐና፥ ክሳዕ ክርስቶስ ሞግዚትና ኾይኑ ነበረ። ²⁵ሕዚ ግና እምነት ካብ መፀ፥ ደጊም ኣብ ትሕቲ ሞግዚት ኣይኮንናን።

ብእምነት ውሉድ ኣቦ

²⁶ብክርስቶስ ኢየሱስ ብእምነት ኵላትኩም ውሉድ ኣቦና ኢኹም እሞ። ²⁷ናብ ክርስቶስ ዝተጠመቕኩም ዅላትኩም፥ ንክርስቶስ ለቢስኩምዎ ኢኹም እሞ። ²⁸ኣይሁድ ኾነ ግሪኻዊ የለን፥ ባርያ ኾነ ናፃ የለን፥ ተባዕታይን ኣንስተይትን የለን፤ ኵላትኩም ብክርስቶስ ኢየሱስ ሓደ ኢኹም እሞ። ²⁹ናይ ክርስቶስ እንተ ኾይንኩም ከዓ፥ ዘርኢ ኣብርሃም፥ ከም ተስፋ ድማ ወረስቲ ኢኹም።