Ngakarthuilu, Zion
Chifali kapam keinung akhali ngakarthuida ngalamkhavai kachon sanglu da hānga, aremali yorsang kahai kala lupā maleila ngatang kahai. Awui Avāna munga da paokaphā khuikharābing phungreibing eina rāngaranga. Chi rao chiwui maramli kuphai, ngaprāsang kahai kha mibingna yangkharing khavai tangda kasemkashi.
52 1Zion, ngakarthuilu, ngakarthuilu, nawui yāng sanglu; keinung kathara Jerusalem, nawui kashankachon khamathā sanglu; kaja ahui marimkashokbing eina makatharabing nawuili khipākha mazangluimana. 2Chifawui eina nakhalatta shaksālu kala thuilu; Jerusalem, nawui wungpamkhongli pamlu; Zionwui naongalāva̱ tukthui kahaia, nakahungwui zurthing eina nakhalatta ningkhān ngasaklu.
3Kaja ithumwui Avāna hithāda hānga: "Nana aremali yorsang kahaina, kala na lupā maleila ngatang kahaira."
4Kaja Proho Avāna hithāda hānga: "Kharethang iwui mibing yur kateibing thāda okthui khavai Egyptli tai, kala Assyriana athumli aremali rekhareka.
5"Kala ara, hi khina?" da ithumwui Avāna hānga, "iwui mibing aremali tukvā kahaina. Athumwui khamungabingna chapngachai," da ithumwui Avāna hānga, "kala atam kachida, zimiksho hupta, iwui ming ngasā ngasak kahaina. 6Chiwui vang eina iwui mibingna iwui ming theira; chiwui vang eina chithang matuida iya jira kaji athumna theira; yanglu, ina hili lei."
7Chingri kahai hākashoka, kaphā otwui paokaphā khuikharā, huikhami hākashoka, Zionli "Nawui Avāna munga!" da kahāng, paokaphā khuikharāwui phei chi kaphungtungli kayākha khamathāhaokhala! 8Nganālu! Nawui khamayonabingna akhon khāngkai; athum katonga khamathānna vaohaowa, kaja ithumwui Avā Zionli latung kahai chi athumna khalattawui mik eina theira. 9Katonga laa sāphoklu, O Jerusalemwui ja̱ta kahai apambing, kaja ithumwui Avāna awui mibingli ringphā ngasakhaira; ana Jerusalemli ngatangmihaira. 10Ithumwui Avāna yur saikorawui miktāli awui kathara pāngthei phunghaira, kala okathuiwui amarei saikorana ithumwui Avāwui huikhami chi theira. 11Thuihaolu! Thuihaolu! Apam chiwui eina thuihaolu; makathar ot chi masingalu; athum ngachaiwui eina thuihaolu; ithumwui Avāwui khorkhong phungabing, nakhalatta tharngasaklu. 12Kaja na katotlak eina mathuivāmara, kala na mayāmlakmara; kaja ithumwui Avāna nali rida vāra, kala ithumwui Avāna nawui khanukshong eina nali ngākmira.
Iwui Rao Jishu, Kajuili Khāngkakā
13Yanglu, iwui rao Jishuna themlāk eina sāra; ana reingasaka kahaira, khāngkakā kahaira, kala reikhamatai masot chikat kahaira. a a v13 Philithangwui Rao Laa hipamli haokaphokta chapter 53 tangda katāchinga. Kadhara Sākahaina Jishuli hi kasui samphang kala khāngchikata Rao jina da apam kachungkhali hānga—Matthew 8:17, Acts 8:32-35, 1 Peter 2:21-25. 14Mi kachungkhana ali matakhakhai thāda, awui zakmai mi khipāwui mataida khangakhaihaowa, kala awui khangachā mikumo khipāwui mataida khangakhaihaowa, 15chithāda ana yur kachungkhali ikrorra; awui vang eina awungabingna athumwui khamor shungra. Kaja athumli mahāngkapai chi, athumna theira, kala athumna mashākahai chi, athumna bhap tāra. b b v15 "Ikror" da kaho hi haokaphokwui tuiwui pāngmonwui tharngasakwui bhap shurra; Bible kateibingna tui hi "ngachee ngasak" da tuihaira.
