Isaiah 51

51 ¹"Nathum khamashung khangarong shurbing, ithumwui Avāli phābing, ili nganālu: nathum harkhui kahai lunghār kala nathumli khonkhui kahai lung harkhuipamli yangkālu. ²Nathumwui avā Abrahamli yangkālu, kala nathumli pharākakhui Sarahli; kaja a akhamāng leilakha ina ali ngakaohaida, ali somilaga mi kachungkhana sāmi. ³Kaja ithumwui Avāna Zionli ning lumngasaka; awui ruinganai saikorali ana ning lumngasaka. Ana awui lamhāng chi Eden thāda sāngasaka, awui siwuk chi ithumwui Avā yāmgui thāda sāngasaka. Awuili mathān kala ringphā, ningkashi kala laasak kakhong samphangra.

⁴"Ili nganālu, iwui mibing; iwui yur, ili shālu: kaja tamkachithei iwui eina shokra, kala ina iwui mashun chi mibingli kahor thāda sāra. ⁵Iwui khamashung khangarong nganailakhaira, iwui huikhami shokhaira, kala ipāngna mibingli mashun khuivāra; shamadrupheili kapambingna ili hondara, kala iwui pāngli athumna chihānra. ⁶Nathumwui mik kazingramli khāngkālu, kala azingli khalei okathuili yangkālu: kazingrambing meikhut thāda shimānhaora, okathui kachon thāda chamserhaora, kala chili kapambing tumit thāda thira; kha iwui huikhami katang mavaila leichingra, kala iwui khamashung khangarong khikhalada masākakhuimara. ⁷Nathum khamashung khangarong theibing, iwui tamkachithei athumwui wuklungli haiching kahai mibing, ili nganālu: mikumowui misui chili mangacheealu, kala athumwui zeikakharui eina malung machipaaranu. ⁸Kaja makungna athumli kachon thāda shaira, kala kachaina athumli sahā thāda shaira; kha iwui khamashung khangarong katang mavaila leichingra, kala iwui huikhami thot saikorali leichingra."

⁹Thuilu, thuilu, yang eina ngavailu, O ithumwui Avā pāngthei! Achālakhawui atam thāda, kasāngkha thuikahai thotbingli thuilu. Rahab shamadru sāreili amarimrim katattā kahai, dragonli rungthat kahai chi na maningmala? ^a a v9 Isaiahwui mikyanli, ithumwui Avā pāngthei katingshok kahai chi otram peichaoda awui huikhami khangasak pangshapna — okathui sākahaiwui eina, Egyptwui eina thanshok kahaili, kala ranglakha rāra kaji ngatangkhamili peichaoda. ¹⁰shamadru, kathuka kahakwui tara̱ theng ngasak kahai, shamadruwui kathuka chi ngatangkhui kahaibing kānkā khavai shongfa sākahai chi na maningmala? ¹¹Chithāda ithumwui Avāna ngatangkhui kahaibing ngalanluira kala laa sālaga Zionli latungra; katang makhavai ringkaphā athumwui kuili leichingra. Ringphā kala mathānna athumli ngaphankhuira, kala kakhanang sikafa thuihaora.

¹²"Ina, ina nathumli ning lumngasaka kaje china. Mikumo thikaje chi, khawo thāda kānthui kaje mibing chi ngachee khavai nathum khipāna jira, ¹³nathumli sākahai, kazingram hārshoka kahai, okathuiwui shimphunga rungshing kahai nathumwui Kasaa ili malaida? Sāshimān sākhavai marān kahai rekakhareka miwui malungkhavātwui vang, nathum langpongda khangachee eina okpeida leira. Kha rekakhareka miwui malungkhavāt kali leikhala? ¹⁴Mari khanghuili khalap kahai chi tangda ningkhān ngasakhaora; a thida chomli mazangmara, lah a mathairarmara. ¹⁵Kaja shamadru sāza̱da awui tara̱ khangang ngasak kaje ina nathumwui Avā china; kazingramwui raimibingwui Avā chi awui mingna. ¹⁶Kala ina iwui tui nawui khamorli hai, kala ipāngwui khaya̱ eina nali khaluiphinhai, kazingram lingda okathuiwui shimphunga rungshingda, kala Zionli hānga, 'Nathum iwui mibingna.'"

¹⁷Thuilu, thuilu! O Jerusalem, ithumwui Avā pāngwui eina awui malungkhavātwui tengkot manga kahai, nali jakchāngchāng zatngasak kaje tengkot, koklui chi akhan eina tangda mangserhai kahai nathum, ngakarthuilu! ¹⁸Ana kapharā naongarābing saikorawui alungli, ali ngareithui khavai mi maleimana; ana nganaokhui naongarābing saikorawui alungli, apāng khuida thānkhavai mi maleimana. ¹⁹Ramcho kala kashimān, chāmrei kala raighai, ot khani hi nawuitungli yuihaira; khipāna nawuitungli chapngachāra? Khipāna nali ringphā ngasakra? ²⁰Nawui naongarābing vānhaira; athum chānrei haophok kachida khalenli man kahai sirao thāda pitai, ithumwui Avāwui malungkhavāt kala nawui Avāwui kakharar eina pemtinghai.

²¹Chiwui vang eina, O na kachota, drakhāra̱ mamangla marip kahai, hi nganālu:

²²Awui mibingwui vang nganingmi kahai, nawui Proho Avāna hithāda hānga: 'Yanglu, nali ngayit ngasak kahai tengkot, iwui malungkhavātwui koklui chi nawui pāng eina ina khuihaira; nana chi mamangluimara.' ²³Nali, 'Mashunzanglu, chieina ithumna nawuitungli kānkāra,' da hāng kahai nawui rekakharekabingwui pāngli chi ina mihaora; chieina nana nawui angun ngalei thāda, kala athumwui kānkhavai chānrei thāda sāhaowa.