Legide Nkume Ahụ Anya

Nye ndị na-atụ egwu na ha dị ole na ole, Nna anyị na-atụ aka azụ nʼotu nwoke na otu nwanyị, Ebraham na Sera. Eluigwe na ụwa na-aka nká; nnapụta ya adịghị aka nká. Jerusalem aṅụchaala iko ya nke na-eme ka mmadụ daa ada, ọ dịghị nwa fọdụrụ iji kwagide ya. Ọ na-ewepụ iko ahụ.

Isi 51.

“Geenụ m ntị, unu ndị na-achụso ezi omume, unu ndị na-achọ Nna anyị: lee nkume ahụ anya, bụ nke e si gbupụta unu, na olulu nkume ahụ e si gwupụta unu. Leenụ Ebraham nna unu anya, na Sera onye mụrụ unu; nʼihi na mgbe ọ bụ naanị otu onye, akpọrọ m ya, gọzie ya ma mee ya ka ọ baa ụba. Nʼihi na Nna anyị na-akasi Zaịọn obi; ọ na-akasi mkpọmkpọ ebe ya niile obi. Ọ na-eme ka ọzara ya dị ka Iden, ọ na-eme ka ala ọzara ya dị ka ubi Nna anyị. A na-ahụ ọṅụ na obi ụtọ nʼime ya, na ekele na ụda abụ.

“Geenụ m ntị, ndị m; nụrụnụ m, mba m: nʼihi na ozizi ga-esi nʼaka m pụta, aga m emekwa ka ikpe ziri ezi m bụrụ ìhè nye ndị mba niile. Ezi omume m dị nso, nzọpụta m apụọla, ogwe aka m ga-ewetara ndị mba ikpe ziri ezi; ala ndị dị nʼakụkụ oké osimiri na-echere m, ha na-atụkwasịkwa olileanya ha nʼogwe aka m. Welienụ anya unu elu lee eluigwe anya, ledakwanụ ụwa dị nʼokpuru anya: eluigwe ga-agabiga dị ka anwụrụ ọkụ, ụwa ga-eka nka dị ka uwe, ndị bi nʼime ya ga-anwụkwa dị ka ijiji; ma nzọpụta m ga-adịgide ruo mgbe ebighị ebi, ezi omume m agaghịkwa agbaji ma ọlị. Geenụ m ntị, unu ndị maara ezi omume, ndị bu ozizi m nʼobi ha: unu atụla egwu nkọcha nke ndị mmadụ efu, unu ekwekwala ka mkparị ha kụda unu mmụọ. Nʼihi na nla ga-eri ha dị ka uwe, ikpuru ga-erikwa ha dị ka ajị anụ; ma ezi omume m ga-adịgide ruo mgbe ebighị ebi, nzọpụta m ruokwa ọgbọ niile.”

Teta, teta, yikwasị onwe gị ike, O ogwe aka Nna anyị! Teta dị ka nʼụbọchị ndị gara aga, nʼọgbọ ndị gaferela aga. Ọ bụghị gị gbujisịrị Rahab, anụ ọjọọ nke oké osimiri ahụ, ntakịrị ntakịrị, nke dupuru dragọn ahụ afọ? ^a Ọ bụghị gị mere ka oké osimiri takpọọ, mmiri nke ogbu mmiri dị ukwuu ahụ, onye mere ebe miri emi nke oké osimiri ka ọ bụrụ ụzọ ka ndị a gbapụtara si gafee? Ya mere, ndị Nna anyị gbapụtara ga-alọghachi, ha ga-ejikwa abụ bịaruo Zaịọn; ọṅụ ebighị ebi ga-abụ okpueze nʼisi ha. Obi ụtọ na ọṅụ ga-erute ha, mwute na ịsụ ude ga-agbapụ ọsọ.

“Mụ, ọ bụ m bụ onye na-akasi gị obi. Ị bụ onye dị aṅaa nke ga-atụ egwu ụmụ mmadụ efu nke na-anwụ anwụ, ndị na-agabiga dị ka ahịhịa, nke mere i ji chefuo m, Onye kere gị, Onye gbasapụrụ eluigwe ma tọọ ntọala ụwa? Ị na-ebi ndụ nʼoké egwu ụbọchị niile nʼihi ọnụma nke onye mmegbu ahụ, onye kpebisiri ike ịla ihe nʼiyi. Ma olee ebe ọnụma nke onye mmegbu ahụ dị? A ga-atọpụ onye ahụ a tọọrọ nʼagbụ nʼoge na-adịghị anya; ọ gaghị anwụ rịdaa nʼolulu, agụụ agaghịkwa agụ ya. Nʼihi na mụ onwe m bụ Nna gị, onye na-akpali oké osimiri mee ka ebili mmiri ya na-ebigbọ— Nna nke usuu ndị agha eluigwe bụ aha ya. Etinyela m okwu m nʼọnụ gị ma jiri ndò nke aka m kpuchie gị, na-akụ eluigwe dị ka osisi ma na-atọ ntọala ụwa, na-agwakwa Zaịọn, ‘Unu bụ ndị m.’”

Teta, teta! Bilie, O Jerusalem, gị onye ṅụworo site nʼaka Nna anyị iko nke ọnụma ya, onye ṅụchapụrụ efere ahụ ruo nʼọdụdụ ya, iko ahụ nke na-eme ka ị na-adagharị. Nʼetiti ụmụ niile ọ mụrụ, o nweghị onye ga-edu ya; nʼetiti ụmụ niile ọ zụlitere, o nweghị onye ga-ejide ya aka. Ihe abụọ ndị a adakwasịla gị—onye ga-eru gị ụjụ?—mbibi na ịla nʼiyi, ụnwụ na mma agha. Onye pụrụ ịkasi gị obi? Ụmụ gị adaala mba; ha dina nʼisi ụzọ ọbụla dị ka mgbada nke mara nʼọnya, jupụta nʼọnụma nke Nna anyị, na ịba mba nke Nna gị.

Ya mere, nụrụ nke a, gị onye a na-ata ahụhụ, onye ṅụbigara, ma ọ bụghị site na mmanya:

Nke a bụ ihe Nna gị, Onye na-achị ihe niile, kwuru, onye na-ekwuchitere ndị ya ọnụ: ‘Lee, ewepụla m site nʼaka gị iko ahụ nke na-eme ka ị na-adagharị, efere ọnụma m; ị gaghị aṅụkwa ya ọzọ ma ọlị.’ Aga m etinye ya nʼaka ndị na-ata gị ahụhụ, bụ ndị gwara gị, ‘Hulata ala ka anyị wee gabiga nʼelu gị,’ nke mere i ji mee ka azụ gị dị ka ala, dị ka okporo ụzọ ka ha si gafee.