Ng'eet, ee Zion
Keleenji nganaseet ne tebee ng'ung'unyek kong'eetyi ak kolaach ngoroik che po yorunet, kialda tetat ak kiketyach ama po robiinik. Nyonei labatiik parak eng' tuloonook ak logoiywek che myee kole laitorani Kwandanyi. Kobata eng' otwogindet, ne kigitoroor, ago ne kigartoti poortanyi kot koung'ategei che geere.
Ng'alaali Kwandanyo eng' mustarisyek 3–6
52 1Ng'eet, ng'eet, laach kimnateng'ung', Zion; laach ngoroiguk che karaaran, Jerusalem, nganaseet ne tiliil; amu mata kochut kogeny chii ne ma kimuratan ak ne ng'wony. 2Ileileigei eng' temburyek ak ng'eet; tebee eng' komostang'ung', Jerusalem; ilakte ratuutik che mi kaating'ung', inyee tiibiigap Zion ne kagiluul.
3Amu mwaei Kwandanyo kole: “Ki kialdok tetat, ak iketyachok ama po robiinik.”
4Amu mwaei Kiptaiyat Kwanda kole: “Eng' taunet kiba piikyuk Misiri si komeny olooto ko uu toek, ak ki inyaliil Assyria icheek tetat.
5“Ara anyun, nee ni?” kole Kwandanyo, “amu kibe piikyuk tetat? Riirei kirwoogikwak,” kole Kwandanyo, “ak kotugul, betuusyek tugul, kisasei kainennyu. 6Nooto anyun konai piikyuk kainennyu; nooto anyun eng' peetuunooto konai kole anee ne ng'alaali; keero, anee ni.”
7Karaaran miising' eng' tuloonook keelyegap segeik ne iibu logoiywek che myach, ne imwatoi kaalyeet, ne iibu logoiywegap tuguuk che myach, ne imwatoi yetunet, ne leenji Zion, “Laitorani Kwandang'ung'!” 8Kas! Waachei riibiik tweguunekwak; waachei kobooten eng' poiboiyet, amu kogerei eng' konyekwak Kwandanyo koweekyigei Zion. 9Otyen kobooten eng' poiboiyet, okweek karatwegap Jerusalem, amu kagoigaigai Kwandanyo piikyik; kagotyach Jerusalem. 10Kagong'aang' Kwandanyo eunnyi ne tiliil eng' taitap pororyosyek tugul, ak kogeer tabanwegap ng'wony tugul yetunetap Kwandanyo. 11Omande! Omande! Omong' eng' olooto; amat otwaa kiy age tugul ne ng'wony; omong' eng' kwenunnywa; oanyinygei, okweek che ibe tereenigap Kwandanyo. 12Amu mo omong' eng' kagirgiret, ama olabat; amu kobendi Kwandanyo kondoe okweek, ak riibei Kwandanyo okweek eng' let.
Otwogindennyu Jeso, ne Kitoroorit
13Keero, koyai otwogindennyu eng' ng'omnateet; ng'eetei, ak kingoeeti parak, ak kingotoroorit miising'. a a v13 Tuiyei yu songolyetap Otwogindet ne po ang'wan, ak koruui agoi sirutit 53. Igoorei Testamente ne Leel Jeso ko uu Otwogindet ni ne mogornos ak ne kitoroorit, eng' siruutyoosyek che chaang' — Matayo 8:17, Boisyonik 8:32-35, 1 Petero 2:21-25. 14Ko uu ye kokwong'yo piik che chaang' agobo ineendet—kiga koya togeennyi miising' kosiir chii age tugul, ak poortanyi kosiir poortap chiito age tugul, 15ko uu nooto koisisye pororyosyek che chaang'; koger laitorinik kutusweekwak agobo ineendet. Amu ne ma kimwachin, kogeer, ak ne ma kigas, koguiyo. b b v15 Ng'olyoot ne le “koisisye” ko isupei ortinwetap anyinyeetap tisiik ne mi ng'olyoot ne tai; iwolei siruutyoosyek alak ng'olyoondani ko uu “koiywei.”