Daniel 5

5 ¹Awunga Belshazzarna wungnaobing thingkhali reikhamatai zātkhān akha sāda, thingkha chiwui mangāli drakhāra̱ manga. ²Drakhāra̱ khuira̱lakha, Belshazzarna, awunga, awui wungnaobing, apreiva̱ kala angashirva̱ chiwui eina mangkhavai, ashāvā Nebuchadnezzarna Jerusalemwui khorumshimwui eina khuikahai sinā kala lupāwui khorkhong chi khuirā khavai kasoi. ³Chieina athumna Jerusalemli khalei ithumwui Avāwui shim, khorumshim chiwui eina khuikahai sinā khorkhong chi khuirai; kala awunga, awui wungnaobing, apreiva̱ kala angashirva̱ chiwui eina manga. ⁴Athumna drakhāra̱ chi manga, kala sinā, lupā, pithrai, mari, thing kala ngalung eina sākahai varebing chi sochikata.

⁵Chitharan mipāwui pāngmareng shokta, thaomeishongli kāroda khalei awungawui keinung shim phākho wai chili kapi, kala awungana kapi kahai pāng chi yangpama. ⁶Chieina awungawui zakmai onhaowa, awui kaphaningna ali ngachee ngasaka, awui kashān phungmi, kala awui khuksao akha eina akhali shokta kathira.

⁷Awungana panglāk eina vaoda laivā kathembing, Chaldeanaobing kala khanong sākatheibing chi hokhui, kala Babylonwui thangkhama saikorali hānga, "Hi kapi kahai pālaga chiwui kakhalat ili hāngmi khipākha, hungrisi chon ngavaira, akahungli sinā khara̱ khalaphaira, kala wungramli kakathumana munghaora." ^a a v7 Belshazzarna maleiphā ashāvā Nabonidus azingli, ashāvāla ngasoda wungram munga; chiwui vang 'wungramli kakathum' hi ana somishap khoka reikhamatai chiya.

⁸Chieina awungawui thangkhama saikora zanga, kha kapi kahai chi pākashap, lah chiwui kakhalat awungali hāngmikashap khipākha maleimana. ⁹Chiwui vang Awunga Belshazzar tharā shida ngacheehaowa, awui mai tharā thengchenghaowa, kala awui wungnaobing pa̱ngapāhaowa.

¹⁰Awunga kala awui wungnaobingwui tui kashā tharan, awungva̱na morkasong pamli zanga, kala hānga, "O awunga, okpeimeiranu! Nawui kaphaningna nali mangachee ngasaklu, lah namai mathengchenglu. ¹¹Nawui wungramli mi akha lei, awuili kathara varebingwui manglā ngasomi. Nashāvāwui atamli, awuili ningthei, theishingkakhui kala varebingwui thangkhamei thada thangkhamei samphanga. Nashāvā awunga Nebuchadnezzarna ali mahei kathembing, laivā kathembing, Chaldeanaobing kala khanong sākatheibing saikorawui akhavā sāmi, ¹²khikhalajila awungana Belteshazzar hokahai Danielli, hakmahālak kahai manglā, awor kala theishingkakhui, mang kakhalat hāngmi, akachang meikhaimi, kala kathuka tui khalāmi kashap samphanga. Ara Danielli holu; ana kakhalat hāngmira."

Danielna Avāwui Hukhum Pā

¹³Chieina Danielli awungawui mangāli khuirai, kala awungana ngahāna, "Na Daniel, ishāvā awungana Judahwui eina khuirā kahai raithā kahaibingwui akha chinala? ¹⁴Nali varebingwui manglā ngasomi, kala kahor, theishingkakhui kala thangkhamei chāra̱-chāsān nali samphanga da ina shāhaira. ¹⁵Hi kapi kahai pā khavai kala chiwui kakhalat ili hāngmi khavai thangkhama kala laivā kathembing chi iwui mangāli khuirai, kha athumna mahāngmirarthuwa. ¹⁶Nana kakhalat hāngmishapa kala kathuka tui khalāmishapa da ina shāhaira. Nana hi kapi kahai pālaga chiwui kakhalat ili hāngmishapakha, hungrisi chon ngavaira, akahungli sinā khara̱ khalaphaira, kala wungramli kakathumana munghaora."

¹⁷Chieina Danielna awungali ngahānkai, "Nawui sāman chi nakhalatta vang leisalu; nawui khayā chi khangatei akhali milu. Chithālala, ina awungali kapi kahai chi pāmira kala chiwui kakhalat ali hāngmira. ¹⁸O awunga, Reikhamataia ithumwui Avāna navā Nebuchadnezzarli wungram, kharei, tekhamatei, kala khayākakā mi. ¹⁹Ana ali mikahai kharei chiwui vang eina, mibing, yurbing kala tuiyur saikora awui mangāli kathirririhaowa kala ngacheehaowa. Ana mikhangaiali shaothata, mikhangaiali ringngasaka, mikhangaiali reingasaka, mikhangaiali teongasaka. ²⁰Awui wuklung langkaso sāhaida awui manglā khanganing mararhaowa tharan, awui wungpamkhongwui eina tuknarhaowa kala awui tekhamatei raimihaowa. ²¹Ana mibingwui pamkhavaiwui eina kashamhaowa, awui ning sāwui ning thāda ngasakhaowa; Reikhamataia ithumwui Avāna mikumowui wungram munga, kala awuitungli mikhangaiali kapangsanga da matheiranglakha eina tangda, ana khararwui gadhābingli ngasopama, mukkā thāda khawo phāshai ngasakhaowa, kala kazingramwui ikra̱na ali chumkhuihaowa.

²²Kha awui naomayara Belshazzar, nana hi saikora theilala nawui wuklung mateongasakmana. ²³Chiwui mahutli, na kazingramwui Proholi ngakaishida khalatta reikhangaiya. Nana awui shimwui khorkhong ngarā nawui mangāli khuivāmi, kala na, nawui khangambing, preiva̱ngarā kala angashirva̱ngarāna chiwui eina drakhāra̱ manga. Matheiya, mashāya, kala khikha matheiya varebing, lupā, sinā, pithrai, mari, thing kala ngalungwui varebing chi nana sochikata. Kha nawui khaksuikha awui pāngli singa, nawui shongfa saikora khaleia ithumwui Avā chili nana khayā mashimana. ²⁴Chiwui vang eina ana kapi hi kapikahai pāng chi chihovāhaira.

²⁵Hi kapisanghai kapi hina: MENE, MENE, TEKEL, PARSIN.

²⁶Hiwui kakhalata chi hina: MENE, ithumwui Avāna nawui wungramwui atam shānhaira kala chi kupkahai ngasaka.

²⁷TEKEL, na sheronli tamkahai kala makāshungmana da samphanga.

²⁸PERES, nawui wungram ngayarhaida Medes eina Persianaobingli mihaira."

²⁹Chieina Belshazzarna kaso mihaowa, kala athumna Danielli hungrisi kachon eina ngavaimi, awui kahungli sināwui khānghui khalapmi, kala ali wungramwui kakathuma khamungana da pao hāshoka.

³⁰Chithang ngayā Babylonwui awunga Belshazzar shaothathaowa. ³¹Kala Medewui Dariusna, zingkum hangtharukta khani shakha kāshung kahai tharan, wungram samphanga.