Sasei Belshazzar Kootap Kwanda
Koeei Belshazzar eng' tuguuk che ki koisto eng' Kootap Kwandanyo, ak kolas kamuktaik che po thahabu ak koik. Kosir euut eng' taartaarit, ak korukrugen kutung'oikyik. Kokuur Daniel ng'aleet ne iman: kingen agobo kwaang'ung' ago ma itoroor chii age tugul. Eng' kemounooto kome laitoryat.
5 1Ki yai Laitoryat Belshazzar sagutyet ne oo agobo piik che taagunotiin 1,000, koeeiso divai eng' taitap pichooto 1,000. 2Ye kachamchame Belshazzar divai, ki ng'at si koibu tuguuk che po thahabu ak fedha che ki koip kwandanyi Nebukadnesar eng' hekaluutap Jerusalem, si koeeiso laitoryat, ak piik che taagunotiin che nenyi, ak osotikyik, ak chebaigeinik. 3Ki koibu anyun tuguuk che po thahabu che ki koisto eng' hekaluut, Kootap Kwanda ne mi Jerusalem; ki eei laitoryat, ak piik che taagunotiin che nenyi, ak osotikyik, ak chebaigeinik. 4Ki eei divai ak kolas kamuktaik che po thahabu, ak fedha, ak sugunwet, ak karnet, ak keetiik, ak koik.
5Eng' sainooto ko ki boorunu morigap eutap chii, ak kosir eng' taartaarigap irimeetap kootap laitornatet ne po laitoryat, neegit ak teepeetap lamb, ak kogeer laitoryat euut ne sir. 6Ki wal taitap laitoryat, ak koiyweisin kabwaatutikyik, ak kobetito kubesoikyik, ak korukrugen kutung'oikyik.
7Ki rwai laitoryat si koguur piik che ponindos, ak che siriine topoisyek, ak che ng'oorsei, koleenji piik che ng'oomen che po Babilon, “Chiito age tugul ne soman siruutyoni ak koboorwo weeksennyi, ko tuun laach ngoroik che piriireen, ak sirimdo ne po thahabu kaatinnyi, ak koek ne po somok eng' laitornatet.” a a v7 Ki Belshazzar laitoryat ne kobootgei ak kwandanyi Nabonido ne ki ma mi, amuneeto ko ‘ne po somok eng' laitornatet’ ko komosta ne oo kosiir ne ki imuuchi kogoito chii.
8Ki chut anyun piik tugul che ng'oomen che po laitoryat, ago ma mi chii ne ki imuuch kosoman siruutyoni anan koboorchi weeksennyi. 9Ki iyweis anyun Laitoryat Belshazzar miising' kosiir, ak koleelach tainnyi kosiir, ak koiimgei piik che taagunotiin che nenyi.
10Agobo ng'aleegap laitoryat ak piik che taagunotiin che nenyi, ki chut laitoryandet koot ne po sagutyet, koleenji, “Laitoryat, isap koigeny! Amat koiywein kabwaatutiguk anan koleelach taing'ung'. 11Mi chiito age eng' laitornateng'ung' ne tinyei kabuusetap kamuktaik che tiliil. Eng' peetuusyegap kwandang'ung' ki koboor ng'omnateet, ak naet, ak utaatyet ne uu utaatyetap kamuktaik. Ki yai Laitoryat Nebukadnesar kwandang'ung'—kwandang'ung' laitoryat—ineendet koek kiptaiyatap che ng'oomen, ak pooniik, ak che siriine topoisyek, ak che ng'oorsei, 12amu ki kinyooru eng' Danieli ni kabuuset ne kikwong'ee, ak naet, ak ng'omnateet—koweech karwotisyek, ak koboor tangochisyek, ak kosobun tuguuk che uueen—ineendet ne ki kuure laitoryat kainennyi Belteshazzar. Nguno kuur Danieli; ko tuun weech.”
Soman Danieli Kirwogetap Kwanda
13Ki koibu Danieli ole mi laitoryat, ak kiteebe, “Tos inyee Danieli, agenge eng' kiprutoinigap Judea che ki koip kwandanyu laitoryat eng' Judah? 14Koagas ale mi eng' inyee kabuusetap kamuktaik—naet, ak ng'omnateet, ak utaatyet ne ma kota komi ne kinyoorunet eng' inyee. 15Ki koibu ole ami piik che ng'oomen ak pooniik si kosoman siruutyoni ak koboorwo weeksennyi, ago ma imuuch. 16Koagas ale imuuchi iweech ak isobun tuguuk che uueen. Ngo isoman siruutyoni ak iboorwo weeksennyi, ko tuun ilaakyi ngoroik che piriireen, ak sirimdo ne po thahabu kaating'ung', ak iek ne po somok eng' laitornatet.”
17Kowolji Danieli laitoryat, koleenji, “Riip kaanisyeguk; igoochi melekwoguk chiito age. Ago anee asomanchini laitoryat siruutyoni ak aboorwo weeksennyi. 18Laitoryat, ki koochi Kwanda ne Toroor kwandang'ung' Nebukadnesar laitornatet, ak etunateet, ak toroornatet, ak telunatet. 19Amu etunateet ne ki koochi, ki potanso ak koiyweis piik tugul, ak pororyosyek, ak kutusweek eng' tainnyi. Ki bar ne ki machei, ak koyai kosap ne ki machei, ak koiito ne ki machei, ak koming'in ne ki machei. 20Ye kingo meme muguleldanyi ak kokiimgei kabuusennyi koek menoteet, ki koistoe eng' ng'echereetap laitornatennyi ak koistoegei toroornatennyi. 21Ki kiwiirta kong'etee piik, ak koyaak mindilileennyi koek ko uu po tyong'; ki menye kobooto sigiroik che po timdo, ak kibai susweek ko uu teta, ak koiny ineendet roptap kipsengwet—agoi konai kole laitorani Kwanda ne Toroor laitornatetap piik, ak kondennyi ne ki choorei.
22Ago inyee, Belshazzar weeriinnyi, ma iming'inegei muguleldang'ung', agot ko kinai tuguuchu tugul. 23Ago ki itoigei inyee agobo Kiptaiyatap kipsengwet. Ki ibune tuguugap koonnyi ole imi, ak koeeiso inyee, ak piik che taagunotiin che nenyi, ak osotiguk, ak chebaigeinik divai eng' icheek. Ki ilas kamuktaik che po fedha, ak thahabu, ak sugunwet, ak karnet, ak keetiik, ak koik—kamuktaik che ma muuchi kogeer, anan kogas, anan konai kiy age tugul. Ago ineendet ne namei kabuuseng'ung' eng' eunnyi, ne tinyei ortinwekwuk tugul—Kwanda—ko ma ioiityi. 24Nooto si koyookto euut ne ki sir siruutyoni.
25Ak uu ni siruut ne ki kisir: MENE, MENE, TEKEL, PARSIN.
26Ak uu ni weeksennyi: MENE—ki kweni Kwanda peetuusyegap laitornateng'ung' ak kogees.
27TEKEL—ki kiweigei inyee eng' mowek ak kinyoorunet ile iming'in.
28PERES—ki kipchei laitornateng'ung' ak kigoochi Medoik ak Persiaik.”
29Ki ng'at anyun Belshazzar, ak kolaakyi Danieli ngoroik che piriireen, ak konde sirimdo ne po thahabu kaatinnyi, ak komwaita kole ko ineendet laitoryat ne po somok eng' laitornatet.
30Eng' kemeetyonooto ko ki kibar Belshazzar, laitoryatap Babiloniik. 31Ak ki taach Dario Medoindet laitornatet, ko ki po kenyiisyek tiptem ak aeng'.