Daniel 6

6 ¹Dariusna wungramwui vang satrapbing 120 kapangkhui, wungram katonga peichaoda chipam ngasaka, ^a a v1 Satrapbing chi Persiawui ngalei otva̱bingwui ngachaili hakmeikapa, kachichā mina wungramwui ngalei kazat khavai akha munga. ²kala athumwui atungli otva̱ kathum, chiwui akha Danielna; chithāda satrapbingna athumli ngahānkāra kala awungana khikha tongkazā masamphangmara. ³Danielna otva̱bing kala satrapbing reimei, khikhalajila awuili matakhak kahai manglā lei, kala awungana ali wungram katonga akhavā sākhavai khangarān sai.

⁴Otva̱bing kala satrapbingna wungramwui otli Danielli khayon tukkhui khavai apong phai, kha a chisin kahaiwui vang khikha matheimana; awuili achuk lah makaphā-makhayā khikha matheimana. ⁵Chieina athumna hānga, "Ithumna awui Varewui ainli matheiakha, Danielli khayon khikha matheirarmara."

⁶Chiwui vang eina otva̱bing kala satrapbingna ngarumda awungawui apam vālaga hānga, "Awunga Darius, okpeimeiranu! ⁷Wungramwui otva̱bing, kathānabing, satrapbing, machinmebing kala lammungabing saikorana, awungana wungnaowui shiyan akha kala pangda khalei kakaso akha kapimi khavai da mayāngaroka: kachikathāna zimiksho thumrā peichaoda, awunga, na maningla, khipā vare lah mi akhali kapoakha, ali kazingkha̱ khurli horsanghaora. ⁸Ara, awunga, Medes eina Persianaobingwui ainwui azingli mangachei khavai, kakaso chi kapimida shoi sālu. ⁹Chiwui vang eina Awunga Dariusna lairik kala shiyan-chikan chi shoi sāhaowa."

¹⁰Kakaso chi shoi sāhaira da kathei tharan, Danielna awui shimwui mathang atowui kāli ungvai, charfabing Jerusalemli sho, atam kachida thāda thangkhali thumshida khuktizangda awui Avāwui mangāli ningkashi mida seihā sai. ¹¹Chieina mibing china ngarumlaga Danielna awui Avāwui mangāli seihā sāda lukhamashanwui vang kapo kasā chi thei. ¹²Athumna kakasowui pongli awungawui apam vāda, "Nana zimiksho thumrā peichaoda, awunga na maningla, khipā vare lah mi akhali kapoakha ali kazingkha̱ khurli horsanghaora da kakaso akha shoi masāhaila?" Awungana ngahānkai, "Tui chi Medes eina Persianaobingwui ain athishurda nganinga, mangacheikapaiana."

¹³Athumna awungali hānga, "Judahwui raithā kahaibingwui akha Danielna, awunga, nali kala nawui shoi sāhai kakaso chi khikha maningmana; thangkhali thumshida seihā sāchinga." ¹⁴Hi kashā tharan, awunga ning chotta leihaowa, Danielli huikhui khavai ningtitlaga, ali kanshok khavai zimik matunranglakha eina tangda ot sai.

¹⁵Chieina mibing china awungawui mangāli kaziplaga hānga, "Theikhuilu, awunga: Medes eina Persianaobingwui ain athishurda, awungana kapimi kahai kakaso lah khak khikha ngacheirarmana."

¹⁶Chieina awungana khak mihaowa, kala athumna Danielli khuivālaga kazingkha̱ khurli horsanghaowa. Awungana Danielli hānga, "Nana thangkachida otram ngatha̱mi kahai nawui Varena nali huikhuiranu."

¹⁷Ngalung akha khuivāda khurwui khamorli haihai, kala awungana awui mahor namkhavai khutop kala awui wungnaobingwui khutop eina mahor nammi, chithāda Danielwui pongli khikha mangacheipaishina. ¹⁸Chieina awungana awui shimli vaida chithang ngayā khuma; awui mangāli laa kasā khikha makhuirāmana, kala pikakhui awui eina yāmhaowa.

¹⁹Chieina ngathorthak awungana ngakarthuida kazingkha̱ khurli hengsāda vai. ²⁰Khurli vāshungnanai tharan, ana Danielli chapngachāda ngakaowa. Awungana Danielli hānga, "Daniel, kharinga Varewui rao, nana thangkachida otram ngatha̱ nawui Varena kazingkha̱bingwui eina nali kanshok theihaila?"

²¹Chieina Danielna awungali hānga, "Awunga, katang mavaila ringchingranu! ²²Iwui Avāna awui kazingrao chihotāda kazingkha̱bingwui khamor shungmihaowa. Athumna ili makaphā masāmana, khikhalajila awui mangāli i khayon makhalei mi ngasāhaira, kala nawui mangāli, Awunga, ina khikha khayon masāhailakmana."

²³Awunga ringphālakhaowa, kala Danielli khurwui eina khāngmathot khavai kasoi. Chieina Danielli khurwui eina khāngmathothaira, kala awuitungli khamā akhanida maleimana, khikhalajila ana awui Avāli shitsanghaira. ^b b v23 Daniel, khurli lungna namshānda shunghai, kala ring eina thānshokhai chi, hi Jishuwui khudamna—Jishu, chikhurli lungna namshānda shunghai, kala ali mahorhai Avāna ringkhaluisangkahaina.

²⁴Awungana Danielli nguida kaphenkahai mibing chi, athumwui naongarā kala preiva̱ ngarā peichaoda, khuirāda kazingkha̱ khurli horsang khavai kasoi. Athum khurwui azingli mavāshungranglakha, kazingkha̱bing athumli yuihaida athumwui ara̱kui saikora sātekmihaowa.

²⁵Chieina awunga Dariusna okathuili khalei miyur saikora, yur saikora kala tuiyur khangatatei saikorali hithāda kapisangmi: "Nathumwui chingri kahai chungmeida samphangranu! ²⁶Ina kakaso akha mihaira: iwui wungram saikorali khalei mibingna katang makhavai leichinga kharinga Vare, Danielwui Varewui mangāli kathirriri eina ngacheeranu. Awui wungram chiya sākashimān maleimara; awui pangshap katang mavaimara. ²⁷Ana kanshokmi kala ngatangkhuimi; ana kazingramli kala okathuili khudam kala matakhak kahai ot sāmi; ana kazingkha̱bingwui pangshapwui eina Danielli kanshokkahai chilina."

²⁸Chieina Daniel hi Dariusna kala Persiawui Cyrusna munglakha atamli mataisangchinga.