1ይ ሳሙኤል 25 FHB Father's Heart Bible™

25 ¹ሳሙኤል ድማ ሞተ፤ ኵሎም እስራኤል ከዓ ተኣከቡ፥ ብዛዕባኡ ሓዘኑ፥ ኣብ ገዛኡ ኣብ ራማ ድማ ቀበርዎ። ዳዊት ከዓ ተሲኡ ናብ በረኻ ፓራን ወረደ።

²ኣብ ማዖን ድማ ሓደ ሰብኣይ ነበረ፤ ጥሪቱ ኸዓ ኣብ ቀርሜሎስ ነበረ። እቲ ሰብኣይ የመና ሃብታም ነበረ፤ ሰለስተ ሽሕ ኣባጊዕን ሽሕ ኣጣልን ነበርዎ። ኣብ ቀርሜሎስ ከዓ ፀጕሪ ኣባጊዑ ይቐርፅ ነበረ። ³ስም እቲ ሰብኣይ ናባል ነበረ፤ ስም ሰበይቱ ኸዓ ኣቢግያ ነበረ። ንሳ ለባም፥ ፅብቕቲ ድማ ነበረት፤ ንሱ ግና ኣብ ኣካይዳኡ ሕሱም፥ ጨካን ድማ ነበረ፤ ካብ ዓሌት ካሌብ እዩ ነይሩ። ⁴ዳዊት ድማ ኣብ በረኻ እንተሎ፥ ናባል ፀጕሪ ኣባጊዑ ይቐርፅ ከም ዘሎ ሰምዐ። ⁵ዳዊት ድማ ዓሰርተ መንእሰያት ለኣኸ፤ ነቶም መንእሰያት ከዓ ከምዙይ በሎም፦ “ናብ ቀርሜሎስ ድይቡ፤ ናብ ናባል ከዓ ኺዱ፥ ብስመይ ድማ ሰላም በልዎ። ⁶ከምዙይ ድማ በልዎ፦ ‘ዕምሪ ይሃብካ። ሰላም ንዓኻ፥ ሰላም ንቤትካ፥ ሰላም ድማ ንዅሉ ዘሎካ ይኹን።’ ⁷ፀጕሪ ኣባጊዕ ከም እትቐርፅ ሰሚዐ ኣለኹ። ጓሶትካ ምሳና ነበሩ፤ ብሓንቲ እኳ ኣይበደልናዮምን፤ ኣብ ቀርሜሎስ ኣብ ዝነበሩሉ ዅሉ ጊዜ ድማ ሓንቲ እኳ ኣይጎደሎምን። ⁸ንመንእሰያትካ ጠይቖም፥ ንሳቶም ድማ ክነግሩኻ እዮም። እዞም መንእሰያተይ ድማ ኣብ ቅድሜኻ ሞገስ ይርከቡ፤ ኣብ በዓል መዓልቲ መፂእና ኣለና እሞ። በይዛኻ ዝርከበካ ንባሮትካን ንዳዊት ወድኻን ሃብ።”

⁹መንእሰያት ዳዊት ድማ መፂኦም እዝ ዅሉ ቃላት እዙይ ብስም ዳዊት ንናባል ነገርዎ፤ ደው ኢሎም ከዓ ተፀበዩ።

¹⁰ናባል ድማ ንባሮት ዳዊት ከምዙይ ኢሉ መለሰሎም፦ “ዳዊት መን እዩ? እዝ ወዲ እሴይ ከ መን እዩ? ሎሚ ኻብ ጐይቶቶም ዝፍለዩ ባሮት በዚሖም ኣለዉ። ¹¹ነቲ እንጀራይን ማየይን ነቲ ንቐራፅቲ ኣባጊዐይ ዝሓረድክዎ ስጋን ወሲደ፥ ካበይ ምዃኖም ንዘይፈልጦም ሰባትዶ ክህብ?”

¹²መንእሰያት ዳዊት ድማ ተመሊሶም፥ ምስ በፅሑ ኵሉ እዝ ቃላት እዙይ ነገርዎ።

¹³ዳዊት ድማ ንሰቡ “ነፍሲ ወከፍኩም ሰይፉ ይዓጠቕ!” በሎም። ነፍሲ ወከፍ ድማ ሰይፉ ተዓጠቐ፤ ዳዊትውን ተዓጠቐ። ኣስታት ኣርባዕተ ሚእቲ ድማ ደድሕሪ ዳዊት ደየቡ፤ ክልተ ሚእቲ ኸዓ ምስ ኣቑሑ ተረፉ።

¹⁴ሓደ ኻብቶም መንእሰያት ድማ ንኣቢግያ ሰበይቲ ናባል ከምዙይ በላ፦ “ዳዊት ካብ በረኻ ንጐይታና ሰላም ክብሉ ልኡኻት ለኣኸ፤ ንሱ ግና ፀርፊ ደርበየሎም። ¹⁵እዞም ሰባት እዚኣቶም የመና ፅቡቓት ነበሩልና። ከቶ ኣይጎድኡናን፤ ምስኣቶም ኣብ መሮር ኣብ ዝዞርናሉ ዅሉ ጊዜ ድማ ሓንቲ እኳ ኣይጎደለናን። ¹⁶ኣባጊዕ ክንጓሲ ምስኣቶም ኣብ ዝነበርናሉ ዅሉ ጊዜ፥ ለይትን መዓልትን መንደቕ ኮይኖም ከበቡና። ¹⁷ሕዚ ድማ እንታይ ከም እትገብሪ ፍለጢ እሞ ርአዪ፤ ኣብ ልዕሊ ጐይታና፥ ኣብ ልዕሊ ኵሉ ቤቱ ድማ መዓት ተመዲቡ ኣሎ እሞ። ንሱ ኽፉእ ሰብ እዩ እሞ ዝዛረቦ የለን።”

¹⁸ኣቢግያ ድማ ቀልጢፋ ኽልተ ሚእቲ እንጀራን ክልተ ሓርቢ ወይንን ሓሙሽተ ዝተዳለዋ ኣባጊዕን ኣስታት ሓሙሽተ መስፈሪ ቆሎን ሚእቲ ዘለላ ዘቢብን ክልተ ሚእቲ ቍራስ በለስን ወሲዳ፥ ኵሉ ድማ ኣብ ልዕሊ ኣእዱግ ፅዓነቶ። ¹⁹ነቶም ኣገልገልታ ድማ “ቀቅድመይ ኪዱ፤ ኣነ ድማ ክስዕበኩም እየ” በለቶም። ንሰብኣያ ናባል ግና ሓንቲ እኳ ኣይነገረቶን። ²⁰ኣብ ኣድጋ ተቐሚጣ በቲ ስዉር መንገዲ እምባ ክትወርድ እንተላ፥ ዳዊትን ሰቡን ናብኣ እናወረዱ መፁ እሞ ተራኸበቶም።

²¹ዳዊት ድማ ከምዙይ ኢሉ ነበረ፦ “ኣነ ነቲ እዝ ሰብኣይ እዙይ ኣብ በረኻ ዘለዎ ዅሉ ንኸንቱ ሓሎኽዎ፤ ካብ ናቱ ሓንቲ እኳ ኣይጠፍአትን፤ ንሱ ግና ኣብ ክንዲ ፅቡቕ ክፉእ ፈደየኒ። ²²ካብ ኵሎም ናቱ ዝኾኑ ሓደ ተባዕታይ ክሳዕ ወጋሕታ ብህይወት እንተ ኣትሪፈ፥ ኣቦና ንፀላእቲ ዳዊት ከምዙይ ይግበሮም፥ ካብዙይ ዝኸፍአ ድማ ይወስኸሎም።”

²³ኣቢግያ ድማ ንዳዊት ምስ ረአየት፥ ቀልጢፋ ካብ ኣድጋ ወሪዳ፥ ብገፃ ተደፊኣ ናብ ምድሪ ሰገደትሉ። ²⁴ኣብ እግሩ ድማ ወዲቓ ከምዙይ በለት፦ “ጐይታይ፥ እቲ በደል ኣባይ ኣብ በይነይ ይኹን። በይዛኻ ኣነ ኣገልጋሊትካ ክዛረበካ ሕደገኒ፤ ቃላት ኣገልጋሊትካ ድማ ስማዕ። ²⁵ጐይታይ፥ በይዛኻ ነዝ ኽፉእ ሰብኣይ ናባል ኣይትቝፀረሉ፤ ንሱ ኸም ስሙ እዩ እሞ፤ ናባል ዓሻ ማለት እዩ፥ ዕሽነትውን ምስኡ ኣሎ። ኣነ ኣገልጋሊትካ ድማ ነቶም ጐይታይ ዝለኣኽካዮም መንእሰያት ኣይረአኽዎምን። ²⁶ሕዚ ድማ፥ ጐይታይ፥ ኣቦና ህያው ከም ዝኾነ ነፍስኻውን ህያው ከም ዝኾነት፥ ኣቦና ደም ካብ ምፍሳስ፥ ብናይ ባዕልኻ ኢድ ሕነ ካብ ምፍዳይ ድማ ከም ዝኸልከለካ፥ ፀላእትኻን ኵሎም ንጐይታይ ክጎድኡ ዝደልዩን ከም ናባል ይኹኑ። ²⁷ሕዚ ድማ እዝ ኣገልጋሊትካ ንጐይታይ ዘምፅአቶ ገፀ በረኸት እዙይ፥ ነቶም ደድሕሪ ጐይታይ ዝኸዱ መንእሰያት ይወሃብ። ²⁸ኣቦና ንጐይታይ ነባር ቤት ክሰርሓሉ ብርግፅ እዩ እሞ፥ ናይ ኣገልጋሊትካ በደል ይቕረ በለ፤ ጐይታይ ውግእ ኣቦና ይዋጋእ ኣሎ እዩ እሞ። ብዅሉ ዘመን ህይወትካ ድማ ክፍኣት ኣባኻ ኣይረኸብ። ²⁹ሓደ ሰብ ክሰጎካ፥ ነፍስኻ ድማ ክደሊ እንተ ተልዓለ፥ ነፍሲ ጐይታይ ምስ ኣቦኻ ኣብ ቍፃር ህያዋን ተኣሲራ ብደሓን ክትፅንሕ እያ፤ ነፍሲ ፀላእትኻ ግና ከምቲ ብጉድጓድ ወንጭፍ ዝውርወር ኣርሒቑ ክድርብያ እዩ። ³⁰ኣቦና ነቲ ብዛዕባኻ ተዛሪብዎ ዝነበረ ዅሉ ፅቡቕ ንጐይታይ ምስ ገበረሉ፥ ኣብ ልዕሊ እስራኤል ድማ ገዛኢ ምስ ገበረካ፥ ³¹እዙይ ንጐይታይ ብዘይ ምኽንያት ደም ብምፍሳስ ወይ ብናይ ባዕሉ ሕነ ብምፍዳይ ጓህን ዕንቅፋት ልብን ኣይኸውንን። ኣቦና ድማ ንጐይታይ ፅቡቕ ምስ ገበረሉ፥ ንኣገልጋሊትካ ዘክር።”

³²ዳዊት ድማ ንኣቢግያ ከምዙይ በላ፦ “እቲ ሎሚ ኽትረኽበኒ ዝለኣኸኪ ኣቦና፥ ኣምላኽ እስራኤል፥ ብሩኽ ይኹን። ³³እቲ ፅቡቕ ምኽርኺ ብሩኽ ይኹን፤ ንስኺ ኸዓ ሎሚ ደም ካብ ምፍሳስ፥ ብናይ ባዕለይ ኢድ ሕነ ካብ ምፍዳይ ድማ ዝኸልከልክኒ ብርኽቲ ኹኒ። ³⁴ኣቦና፥ ኣምላኽ እስራኤል፥ እቲ ኸይጎድኣኪ ዝኸልከለኒ ህያው ከም ዝኾነ፥ ቀልጢፍኪ ኽትረኽብኒ እንተ ዘይመፂእኪ፥ ካብ ናባል ሓደ ተባዕታይ እኳ ክሳዕ ወጋሕታ ኣይምተረፎን ነይሩ።”

³⁵ዳዊት ድማ ነቲ ኣምፂኣትሉ ዝነበረት ካብ ኢዳ ተቐበለ፤ ከምዙይ ከዓ በላ፦ “ብሰላም ናብ ገዛኺ ኪዲ። እንሆ፥ ድምፅኺ ሰሚዐ ልመናኺ ተቐቢለ ኣለኹ።”

³⁶ኣቢግያ ድማ ናብ ናባል ምስ መፀት፥ እንሆ፥ ኣብ ቤቱ ኸም ናይ ንጉስ በዓል ገይሩ ነበረ። ልቡ ኸዓ ተሓጒሱ ነበረ፤ የመና ድማ ሰኺሩ ነበረ እሞ፥ ክሳዕ ወጋሕታ ሓንቲ እኳ ኣይነገረቶን። ³⁷ወጋሕታ ኸዓ፥ ወይኒ ካብ ናባል ምስ ወፀ፥ ሰበይቱ እዝ ዅሉ ነገረቶ። ልቡ ድማ ኣብ ውሽጡ ሞተ፤ ከም እምኒ ድማ ኾነ። ³⁸ኣስታት ዓሰርተ መዓልቲ ድሕሪዙይ ከዓ፥ ኣቦና ንናባል ወቕዖ እሞ ሞተ።

³⁹ዳዊት ድማ ናባል ከም ዝሞተ ምስ ሰምዐ ከምዙይ በለ፦ “ነቲ ናባል ዝፀረፈኒ ፀርፊ ዝተማጎተለይ፥ ንባርያኡ ድማ ኻብ ክፉእ ዝኸልከለ ኣቦና ብሩኽ ይኹን። ኣቦና ድማ ክፍኣት ናባል ናብ ርእሱ መለሶ።” ድሕሪዙይ ዳዊት ኣቢግያ ሰበይቱ ኽትከውን ልኢኹ ተዛረባ።

⁴⁰ባሮት ዳዊት ድማ ኣብ ቀርሜሎስ ናብ ኣቢግያ መፁ፤ ከምዙይ ከዓ በልዋ፦ “ዳዊት ሰበይቱ ኽንገብረኪ ለኣኸና።”

⁴¹ተንሲኣ ድማ ብገፃ ናብ ምድሪ ተደፊኣ ሰገደት፤ “እኒሃ ኣገልጋሊትካ፥ ከተገልግልን ንኣእጋር ኣገልገልቲ ጐይታይ ክትሓፅብን ድልውቲ እያ” ድማ በለት። ⁴²ኣቢግያ ድማ ቀልጢፋ ተሲኣ ኣብ ኣድጋ ተቐመጠት፤ ምስ ሓሙሽተ ኣግራዳ ኸዓ ነቶም ልኡኻት ዳዊት ሰዓበቶም፤ ሰበይቱ ድማ ኾነት። ⁴³ዳዊት ድማ ንኣሒኖዓም በዓልቲ ኢይዝራኤል ኣእተዋ፤ ክልቲአን ድማ ኣንስቱ ኾና። ⁴⁴ሳኦል ከዓ ንሚካል ጓሉ፥ ሰበይቲ ዳዊት፥ ነቲ ኻብ ጋሊም ዝነበረ ጳልጢኤል ወዲ ሌሳ ሃባ።