1 Samweli 25

25 ¹Samweli akafa, na Israeli wote wakakusanyika kumwombolezea, wakamzika nyumbani kwake huko Rama. Kisha Daudi akaondoka akashuka mpaka jangwa la Parani.

²Palikuwa na mtu huko Maoni aliyekuwa na mali huko Karmeli. Alikuwa tajiri sana: kondoo 3,000 na mbuzi 1,000. Alikuwa akikata manyoya ya kondoo wake huko Karmeli. ³Jina la mtu huyo ni Nabali, na jina la mkewe ni Abigaili. Yeye alikuwa mwenye busara na mzuri wa sura, lakini mumewe alikuwa mkali na mkatili katika matendo yake—Mkalebi. ⁴Alipokuwa jangwani, Daudi akasikia kwamba Nabali anakata manyoya ya kondoo wake. ⁵Daudi akatuma vijana kumi, akiwaambia, "Pandeni Karmeli. Mwendeeni Nabali na kumsalimu kwa jina langu. ⁶Mwambieni: 'Uwe na maisha marefu. Amani iwe kwako, amani kwa nyumba yako, na amani kwa vyote ulivyo navyo.' ⁷Nasikia una wakataji manyoya. Wachungaji wako walikuwa pamoja nasi; hatukuwatendea baya lolote, wala hawakupungukiwa na kitu wakati wote walipokuwa Karmeli. ⁸Waulize vijana wako nao watakuambia. Basi vijana wangu na wapate kibali machoni pako, kwa maana tumekuja siku ya karamu. Tafadhali wape watumishi wako na mwanao Daudi kile chochote unachoweza kutoa."

⁹Vijana wa Daudi wakaja wakamwambia Nabali maneno haya yote kwa jina la Daudi, kisha wakangoja.

¹⁰Nabali akawajibu watumishi wa Daudi, "Daudi ni nani? Huyu mwana wa Yese ni nani? Siku hizi watumishi wengi wanawakimbia mabwana zao. ¹¹Kwa nini nichukue mkate wangu, maji yangu, na nyama niliyochinja kwa ajili ya wakataji manyoya wangu, niwape watu wasiojulikana wanakotoka?"

¹²Basi vijana wa Daudi wakarudi, na walipofika wakamweleza maneno hayo yote.

¹³Daudi akawaambia watu wake, "Kila mtu na ajifunge upanga wake!" Kila mmoja akajifunga upanga wake, na Daudi naye akajifunga upanga wake. Watu wapatao 400 wakapanda pamoja na Daudi; watu 200 wakabaki na vyombo.

¹⁴Mmoja wa vijana akamwambia Abigaili, mke wa Nabali, "Daudi alituma wajumbe kutoka jangwani kumsalimu bwana wetu, naye akawatukana. ¹⁵Watu hao walikuwa wema sana kwetu. Hawakutudhuru kamwe, wala hatukupungukiwa na kitu wakati wote tulipotangatanga nao mashambani. ¹⁶Walikuwa ukuta kutuzunguka usiku na mchana, wakati wote tulipokuwa pamoja nao tukichunga kondoo. ¹⁷Sasa fahamu na uone unachopaswa kufanya, kwa maana msiba umeandaliwa juu ya bwana wetu na nyumba yake yote. Yeye ni mtu asiyefaa kiasi kwamba hakuna awezaye kusema naye."

¹⁸Abigaili akafanya haraka akachukua mikate 200, viriba viwili vya divai, kondoo watano waliotayarishwa, vibaba thelathini na vitano vya bisi, mafungu mia ya zabibu kavu, na maandazi 200 ya tini, akavipakia juu ya punda. ¹⁹Akawaambia watumishi wake, "Tangulieni mbele yangu; mimi nawafuata nyuma." Lakini hakumwambia mumewe Nabali chochote. ²⁰Alipokuwa akipanda punda wake akishuka njia iliyofichika mlimani, akakutana na Daudi na watu wake wakishuka kumwelekea.

²¹Basi Daudi alikuwa amesema, "Kweli nimelinda vyote alivyokuwa navyo mtu huyu jangwani bila faida—hakuna kitu chake kilichopotea—naye ananilipa mabaya kwa mema. ²²Baba yetu awatendee hivyo adui za Daudi, na kuzidi, kama nitamwacha hai hata mwanamume mmoja wa wote walio wake kufikia asubuhi."

²³Abigaili alipomwona Daudi, akafanya haraka akashuka kutoka juu ya punda wake, akaanguka kifudifudi mbele yake, akainama hata nchi. ²⁴Akaanguka miguuni pake, akasema, "Lawama na iwe juu yangu peke yangu, bwana wangu. Tafadhali mruhusu mtumishi wako aseme nawe; sikiliza maneno ya mtumishi wako. ²⁵Tafadhali, bwana wangu, usimtie moyoni mtu huyu asiyefaa Nabali, kwa maana yeye ni kama jina lake—Nabali maana yake Mpumbavu, na upumbavu u pamoja naye. Lakini mimi, mtumishi wako, sikuwaona vijana ambao bwana wangu aliwatuma. ²⁶Sasa, bwana wangu, kama aishivyo Baba yetu na kama uishivyo wewe: kwa kuwa Baba yetu amekuzuia usimwage damu na usijilipizie kisasi kwa mkono wako mwenyewe, basi adui zako na wote wanaotafuta kumdhuru bwana wangu na wawe kama Nabali. ²⁷Sasa zawadi hii ambayo mtumishi wako amemletea bwana wangu na wapewe vijana wanaomfuata bwana wangu. ²⁸Samehe kosa la mtumishi wako, kwa maana hakika Baba yetu atamfanyia bwana wangu nyumba idumuyo, kwa sababu bwana wangu anapigana vita vya Baba yetu. Wala lisipatikane kosa lolote kwako siku zote za maisha yako. ²⁹Kama mtu akiinuka kukufuatilia na kutafuta uhai wako, uhai wa bwana wangu utafungwa salama katika furushi la wahai pamoja na Baba yako; lakini uhai wa adui zako yeye atautupa mbali kama kutoka katika kifuko cha kombeo. ³⁰Baba yetu atakapomtendea bwana wangu mema yote aliyoahidi kukuhusu, na kukufanya kuwa mtawala juu ya Israeli, ³¹bwana wangu hatakuwa na huzuni wala hatia ya kumwaga damu bila sababu au ya kujilipizia kisasi mwenyewe. Na Baba yetu atakapomtendea bwana wangu mema, mkumbuke mtumishi wako."

³²Daudi akamwambia Abigaili, "Ahimidiwe Baba yetu, Mungu wa Israeli, aliyekutuma leo unipokee. ³³Zibarikiwe busara zako, na ubarikiwe wewe, uliyenizuia leo nisimwage damu na nisijilipizie kisasi kwa mkono wangu mwenyewe. ³⁴Kwa maana kama aishivyo Baba yetu, Mungu wa Israeli, aliyenizuia nisikudhuru—kama usingalifanya haraka kunipokea, hakika hakuna mwanamume hata mmoja wa Nabali ambaye angalisalia hai kufikia asubuhi."

³⁵Daudi akapokea mkononi mwake vile alivyomletea, akamwambia, "Nenda nyumbani kwako kwa amani. Tazama, nimeisikia sauti yako, nami nimekubali ombi lako."

³⁶Abigaili alipomfikia Nabali, tazama, alikuwa akifanya karamu nyumbani mwake kama karamu ya mfalme. Moyo wake ulikuwa mchangamfu, naye alikuwa amelewa sana, kwa hiyo hakumwambia neno lolote mpaka asubuhi. ³⁷Asubuhi, divai ilipomtoka Nabali, mkewe akamweleza mambo hayo yote. Moyo wake ukafa ndani yake, akawa kama jiwe. ³⁸Baada ya kama siku kumi, Baba yetu akampiga Nabali, naye akafa.

³⁹Daudi aliposikia kwamba Nabali amekufa, akasema, "Ahimidiwe Baba yetu, aliyetetea shauri langu juu ya matukano niliyopata kutoka kwa Nabali, na kumzuia mtumishi wake asitende baya. Baba yetu amemrudishia Nabali ubaya wake juu ya kichwa chake mwenyewe." Kisha Daudi akapeleka ujumbe kumwomba Abigaili awe mke wake.

⁴⁰Watumishi wa Daudi wakaja kwa Abigaili huko Karmeli, wakamwambia, "Daudi ametutuma tukuchukue uwe mke wake."

⁴¹Akainuka, akainama kifudifudi hata nchi, akasema, "Tazama, mtumishi wako yu tayari kutumika na kuwaosha miguu watumishi wa bwana wangu." ⁴²Abigaili akafanya haraka akajitayarisha, akapanda punda wake, na pamoja na wajakazi wake watano akawafuata wajumbe wa Daudi, akawa mke wake. ⁴³Daudi alikuwa amemwoa pia Ahinoamu wa Yezreeli, hivyo wote wawili wakawa wake zake. ⁴⁴Sauli alikuwa amemtoa binti yake Mikali, mke wa Daudi, kwa Palti mwana wa Laishi, wa Galimu.