Tos Mi Amang'u ne po Chii?
Eetu keetit ne ki kiting'e kogeny eng' ng'uunetap peek, ago ruiyei chii ak ma kong'eetu. Bwaatei Job kole tos muuchi che kagobek kosob, ak keneene keele kagoiunegei agoi kosiir angeet ak koyeityo kokuurgei kogeny, ak kole yaamei Kamuktaindet amang'u ko uu ye yaamei peek koito.
14 1“Chii, ne ki kisich eng' kwony, ko nwach peetuusyek ak ko tinyei nyalilda che chaang'. 2Eetu ko uu taapteet ak kobetos; mwei ko uu urwetap ak ma koi. 3Tos iriip konyeguk chiito ne uu nooto? Ak iibu anee kirwooget kobooto inyee? 4Ng'oo ne muuchi koip kiy ne tiliil kobun ne ng'wanit? Ma mi age. 5Amu ki king'at peetuusyekyik, ko mi eng' inyee kweanetap arawekyik, ak kaginde kiwateet ne ma muuchi kosiir, 6ung'e konyeguk eng' ineendet, si komuuny, agoi kobat peetuunnyi ko uu otwogindet ne nyooru melekto.
7“Amu mi amang'u ne po keetit: ngo keting'e, eetu kogeny, ak ma koletu moriikyik. 8Agot ngo ngony tigikyennyi eng' ng'wony ak kome keldanyi eng' ng'ung'unyek, 9Eng' ng'uunetap peek koyai mulwet ak kosach mooriik ko uu minutyet ne leel. 10Ago me chii ak ki iming'in; yaat chii sendeiyot ne po let, ak mi ano ineendet? 11Ko uu ye geskei peek eng' araraita, ak konwach aineet ak koyama, 12ko uu nooto koru chii ak ma kong'eetu; agoi ye ma mi kipsengwet kogeny, ma kong'osu anan kong'eetyo eng' ruuyennyi.
13“Asaain iuny anee eng' olemi che ki kobek, ung'ena anee agoi kosiir angeeng'ung', inde sait ne king'at agobo anee, ak ibwaata anee! 14Ngo me chii, tos sobe kogeny? Agen peetuusyek tugul che po poisyennyu ne nyigiis, agoi konyo lelutyennyu. 15Iguur, ak awol inyee; imogee poisyetap euneguk. 16Amu yooto ikweanji tyegutikyuk; ma iriip tengekwogikyuk. 17King'ooch pistoennyu eng' lolet, ak itugiye tengekwogikyuk.
18“Ago ko uu ye betutu tulweet ak koburuuchi koba, ak keisto rwandet eng' oldanyi, 19ko uu ye ges peek koik ak koip maranosyekyik ng'ung'unyek ne po emet, ko uu nooto imeme amang'utap chii. 20Isiir ineendet koigeny, ak koba tai; iwal togeennyi ak iyookto ineendet. 21Sich weeriikyik toroornatet, ak ma kongen nooto; ki iming'in icheek, ak ma kobwaat ineendet. 22Sapsaba ng'wanindap poortanyi kityo, ak koriir agobo ineegei kityo.”