UJobe 14

14 ¹“Umuntu, ozelwe ngowesifazane, unezinsuku ezimbalwa, egcwele inhlupheko. ²Uvela njengembali, abune; ubaleka njengesithunzi, akahlali. ³Ingabe uwabeka amehlo akho kumuntu onjalo na? Ube usungingenisa ekwahlulelweni nawe na? ⁴Ngubani ongakhipha into ehlanzekile kokungcolileyo? Akekho. ⁵Njengoba izinsuku zakhe zimisiwe, isibalo sezinyanga zakhe sikuwe, ubekile imingcele angeke ayeqe, ⁶susa amehlo akho kuye, ukuze aphumule, aze aqede usuku lwakhe njengesisebenzi esiqashiwe.

⁷“Ngokuba likhona ithemba lomuthi: uma ugawulwa, uyophinde uhlume, namahlumela awo ngeke aphele. ⁸Noma impande yawo iguga emhlabathini, nesiphunzi sawo sifa emhlabathini, ⁹ngephunga lamanzi uyohluma, ukhiphe amagatsha njengesitshalo esisha. ¹⁰Kodwa umuntu uyafa, alaliswe phansi; umuntu uphefumula okokugcina, usephi na? ¹¹Njengoba amanzi enyamalala echibini, nomfula uncipha uze wome, ¹²kanjalo umuntu uyalala, angabe esavuka; kuze amazulu angabe esaba khona, akayikuvuka noma avuswe ebuthongweni bakhe.

¹³“Sengathi ungangifihla ethuneni, ungisithe kuze kudlule ulaka lwakho, umisele isikhathi esinqunyiwe ngami, bese ungikhumbula! ¹⁴Uma umuntu efa, uyophinde aphile na? Zonke izinsuku zomsebenzi wami onzima bengiyolinda, kuze kufike ukuvuselelwa kwami. ¹⁵Ubuyomemeza, mina ngiyophendula kuwe; ubuyolangazelela umsebenzi wezandla zakho. ¹⁶Ngokuba ngaleso sikhathi ubuyowabala amanyathelo ami; ubungeke usiqaphe isono sami. ¹⁷Ukuhlubuka kwami kubuyovalelwa esikhwameni, uze usisibekele isono sami.

¹⁸“Kodwa njengoba intaba iwa ibhidlike, nedwala lisuswa endaweni yalo, ¹⁹njengamanzi aguguda amatshe, nezikhukhula zawo zikhukhula umhlabathi womhlaba, kanjalo uyalibhubhisa ithemba lomuntu. ²⁰Uyamehlula kuze kube phakade, bese edlula; uyabuguqula ubuso bakhe, bese umxosha. ²¹Amadodana akhe ayadunyiswa, yena angakwazi; ayathotshiswa, yena angakunaki. ²²Uzwa kuphela ubuhlungu bomzimba wakhe, azililele yena kuphela.”