Jobu 14

14 ¹“Ènìyàn, tí a bí nínú obìnrin, ọjọ́ rẹ̀ kúrú, ó sì kún fún ìpọ́njú. ²Ó ń ta jáde bí òdòdó, ó sì ń rọ; ó ń sá lọ bí òjìji, kì í sì í dúró pẹ́. ³Ǹjẹ́ ìwọ ha ń tẹ ojú rẹ mọ́ irú ẹni bẹ́ẹ̀? Ìwọ sì mú mi wá sínú ìdájọ́ pẹ̀lú rẹ? ⁴Ta ni ó lè mú ohun mímọ́ jáde láti inú ohun àìmọ́? Kò sí ẹnìkan. ⁵Níwọ̀n bí a ti pinnu ọjọ́ rẹ̀, iye oṣù rẹ̀ wà lọ́dọ̀ rẹ, ìwọ sì ti gbé àwọn ààlà kalẹ̀ tí kò lè kọjá, ⁶yí ojú rẹ padà kúrò lọ́dọ̀ rẹ̀, kí ó lè sinmi, títí yóò fi parí ọjọ́ rẹ̀ bí alágbàṣe.

⁷“Nítorí ìrètí wà fún igi: bí a bá gé e lulẹ̀, yóò tún ru jáde, àwọn ẹ̀ka tuntun rẹ̀ kì yóò sì kùnà. ⁸Bí gbòǹgbò rẹ̀ bá tilẹ̀ di arúgbó nínú ilẹ̀, tí kùkùté rẹ̀ sì kú nínú erùpẹ̀, ⁹nígbà tí ó bá gbọ́ òórùn omi, yóò rúwé, yóò sì yọ ẹ̀ka jáde bí igi tuntun. ¹⁰Ṣùgbọ́n ènìyàn ń kú, a sì tẹ́ ẹ ba; ènìyàn mí ẹ̀mí ìkẹyìn rẹ̀, níbo ló sì wà? ¹¹Gẹ́gẹ́ bí omi ti ń gbẹ kúrò nínú adágún, tí odò sì ń dín kù tí ó gbẹ pátápátá, ¹²bẹ́ẹ̀ ni ènìyàn dùbúlẹ̀, kì yóò sì dìde; títí ọ̀run yóò fi di aláìsí mọ́, kì yóò jí, a kì yóò sì jí i kúrò nínú oorun rẹ̀.

¹³“Ìbá ṣe pé ìwọ yóò fi mí pamọ́ sínú isà òkú, kí o bò mí mọ́lẹ̀ títí ìbínú rẹ yóò fi kọjá, kí o dá àkókò kan lélẹ̀ fún mi, kí o sì rántí mi! ¹⁴Bí ènìyàn bá kú, yóò ha tún wà láàyè bí? Ní gbogbo ọjọ́ iṣẹ́ àṣekára mi ni èmi yóò fi dúró de, títí ìsọdọ̀tun mi yóò fi dé. ¹⁵Ìwọ yóò pè, èmi yóò sì dá ọ lóhùn; ìwọ yóò sì ṣàfẹ́rí iṣẹ́ ọwọ́ rẹ. ¹⁶Nítorí nígbà náà ni ìwọ yóò ka ìṣísẹ̀ mi; ìwọ kì yóò sì máa ṣọ́ ẹ̀ṣẹ̀ mi. ¹⁷A ó fi èdìdì di ìṣọ̀tẹ̀ mi sínú àpò, ìwọ yóò sì bo ẹ̀ṣẹ̀ mi mọ́lẹ̀.

¹⁸“Ṣùgbọ́n gẹ́gẹ́ bí òkè ńlá ti ń wó tí ó sì ń wó palẹ̀, tí a sì ń ṣí àpáta kúrò ní ipò rẹ̀, ¹⁹gẹ́gẹ́ bí omi ti ń pa òkúta rẹ́, tí àgbàrá rẹ̀ sì ń gbá erùpẹ̀ ilẹ̀ lọ, bẹ́ẹ̀ ni ìwọ ń pa ìrètí ènìyàn run. ²⁰Ìwọ borí rẹ̀ láéláé, ó sì kọjá lọ; ìwọ ba ojú rẹ̀ jẹ́, o sì lé e lọ. ²¹Àwọn ọmọ rẹ̀ dé sí ọlá, òun kò sì mọ̀ ọ́n; a sì rẹ̀ wọ́n sílẹ̀, òun kò sì kíyè sí i. ²²Ìrora ara òun fúnra rẹ̀ nìkan ni ó ń mọ̀, ó sì ń ṣọ̀fọ̀ fún ara rẹ̀ nìkan.”