Ayubu 14 FHB Father's Heart Bible™

14 ¹“Mũndũ, ũrĩa ũciarĩtwo nĩ mũtumia, arĩ na matukũ manini na aiyũrĩtwo nĩ mathĩĩna. ²Akũraga ta ihũa agacooka akahooha; oragĩra ta kĩĩruru na ndatũũraga. ³Nĩũkũũrĩkĩria maitho maku harĩ mũndũ ta ũcio? Na nĩũndeehaga ciirainĩ hamwe nawe? ⁴Nũũ ũngĩruta kĩndũ gĩtheru kuuma kĩrĩa kĩrĩ thaahu? Gũtirĩ o na ũmwe. ⁵Kuona atĩ matukũ make nĩmatuĩtwo, mũigana wa mĩeri yake ũrĩ harĩwe, na nĩũigĩte mĩhaka ĩrĩa atangĩhĩtũka, ⁶wĩhũgũre ũtige kũmũrora, nĩguo ahuurũke, o nginya arĩĩkie mũthenya wake ta mũrutwĩra wa mũcaara.

⁷“Amu mũtĩ nĩ ũrĩ na kĩĩrĩgĩrĩro: ũngĩtemwo, nĩũgũcooka gũthundũka rĩngĩ, nacio thundũ ciaguo itikaaga. ⁸O na mĩri yaguo ĩngĩkũrĩra thĩinĩ wa tĩĩri, nakĩo gĩthukĩ kĩaguo gĩkue tĩĩriinĩ, ⁹ũngĩigua mũnungo wa maaĩ, nĩũgũthundũka, na ũrute honge ta mũmera mwerũ. ¹⁰No mũndũ akuuaga agakomio thĩ; mũndũ ahũmũkaga mũhũmũ wake wa mũthia, na akorwo arĩ kũ? ¹¹O ta ũrĩa maaĩ mathiraga iriainĩ, naruo rũũĩ rũkahũa rũkooma, ¹²noguo mũndũ akomaga na ndookagĩra; o nginya rĩrĩa igũrũ rĩtagakorwo rĩrĩ ho, ndarĩũkagĩra kana aarahũrwo kuuma toroinĩ wake.

¹³“Naarĩ korwo no ũũhithe mbĩrĩrainĩ, ũũhithe o nginya marakara maku mahĩtũke, ũige ihinda rĩamũre nĩ ũndũ wakwa, na ũndirikane! ¹⁴Mũndũ angĩkua, nĩagaacooka muoyo rĩngĩ? Matukũ mothe ma wĩra wakwa mũritũ no njetereere, o nginya kwerũhio gwakwa gũũke. ¹⁵Wee nĩũngĩĩta, na niĩ ngagũcookeria; nĩũkeerirĩria wĩra wa moko maku. ¹⁶Amu hĩndĩ ĩyo nĩũngĩtara makinya makwa; no ndũngĩrangĩra wĩhia wakwa. ¹⁷Ũremi wakwa nĩũngĩohererwo mondoinĩ, na wee ũhumbĩre wĩhia wakwa.

¹⁸“No o ta ũrĩa kĩrĩma kĩgũũaga gĩkamomoka, narĩo ihiga rĩkeeherio handũ haarĩo, ¹⁹o ta ũrĩa maaĩ mathiiaga mahiga, nacio ndwaro ciamo igathereria tĩĩri wa thĩ, noguo wee wanangaga kĩĩrĩgĩrĩro kĩa mũndũ. ²⁰Wee nĩũmũhootaga nginya tene, nake agathira; ũgathũkia ũthiũ wake na ũkamũingata. ²¹Aariũ ake nĩmagĩaga gĩtĩĩo, nake ndamenyaga; manyiihĩrĩrio thĩ, nake ndakĩonaga. ²²Aiguaga o ruo rwa mwĩrĩ wake mwene, na agacakayagĩra o we mwene.”