ಯೋಬನ ಗ್ರಂಥ 14 FHB Father's Heart Bible™

14 ¹“ಸ್ತ್ರೀಯಿಂದ ಹುಟ್ಟಿದ ಮನುಷ್ಯನು ಅಲ್ಪಾಯುಷ್ಯನೂ ಕಷ್ಟಭರಿತನೂ ಆಗಿದ್ದಾನೆ. ²ಅವನು ಹೂವಿನಂತೆ ಅರಳಿ ಬಾಡಿಹೋಗುತ್ತಾನೆ; ನೆರಳಿನಂತೆ ಓಡಿಹೋಗಿ ನಿಲ್ಲುವುದಿಲ್ಲ. ³ಇಂಥವನ ಮೇಲೆ ನೀವು ದೃಷ್ಟಿ ಇಡುತ್ತೀರಾ? ನನ್ನನ್ನು ನಿಮ್ಮೊಂದಿಗೆ ನ್ಯಾಯವಿಚಾರಣೆಗೆ ಎಳೆಯುತ್ತೀರಾ? ⁴ಅಶುದ್ಧವಾದದ್ದರಿಂದ ಶುದ್ಧವಾದದ್ದನ್ನು ಹೊರತರಬಲ್ಲವನು ಯಾರು? ಯಾರೂ ಇಲ್ಲ. ⁵ಅವನ ದಿನಗಳು ನಿಶ್ಚಿತವಾಗಿರುವುದರಿಂದ, ಅವನ ತಿಂಗಳುಗಳ ಸಂಖ್ಯೆ ನಿಮ್ಮ ಬಳಿ ಇದೆ; ನೀವು ಮೇರೆಗಳನ್ನು ಗೊತ್ತುಪಡಿಸಿದ್ದೀರಿ, ಅವುಗಳನ್ನು ಅವನು ದಾಟಲಾರನು, ⁶ಕೂಲಿಯಾಳಿನಂತೆ ಅವನು ತನ್ನ ದಿನವನ್ನು ಪೂರೈಸುವ ತನಕ, ಅವನು ವಿಶ್ರಮಿಸುವಂತೆ ಅವನ ಕಡೆಯಿಂದ ದೃಷ್ಟಿಯನ್ನು ತಿರುಗಿಸಿರಿ.

⁷“ಮರಕ್ಕಂತೂ ನಿರೀಕ್ಷೆ ಉಂಟು: ಅದನ್ನು ಕಡಿದರೂ ಅದು ಮತ್ತೆ ಚಿಗುರುತ್ತದೆ, ಅದರ ಕುಡಿಗಳು ಬತ್ತಿಹೋಗುವುದಿಲ್ಲ. ⁸ಅದರ ಬೇರು ಭೂಮಿಯಲ್ಲಿ ಮುಪ್ಪಾದರೂ, ಅದರ ಬುಡ ನೆಲದಲ್ಲಿ ಸತ್ತರೂ, ⁹ನೀರಿನ ವಾಸನೆಗೆ ಅದು ಮೊಗ್ಗೊಡೆದು ಹೊಸ ಸಸಿಯಂತೆ ಕೊಂಬೆಗಳನ್ನು ಚಾಚುತ್ತದೆ. ¹⁰ಆದರೆ ಮನುಷ್ಯನು ಸತ್ತು ಬಿದ್ದುಹೋಗುತ್ತಾನೆ; ಮನುಷ್ಯನು ಕೊನೆಯುಸಿರು ಬಿಟ್ಟ ಮೇಲೆ, ಅವನೆಲ್ಲಿ? ¹¹ಕೆರೆಯಿಂದ ನೀರು ಮಾಯವಾಗುವಂತೆ, ನದಿ ಕ್ಷೀಣಿಸಿ ಬತ್ತಿಹೋಗುವಂತೆ, ¹²ಹಾಗೆಯೇ ಮನುಷ್ಯನು ಮಲಗಿ ಮತ್ತೆ ಏಳುವುದಿಲ್ಲ; ಆಕಾಶಗಳು ಇಲ್ಲವಾಗುವ ತನಕ, ಅವನು ಎಚ್ಚರಗೊಳ್ಳನು, ತನ್ನ ನಿದ್ರೆಯಿಂದ ಎಬ್ಬಿಸಲ್ಪಡನು.

¹³“ನೀವು ನನ್ನನ್ನು ಸಮಾಧಿಯಲ್ಲಿ ಅಡಗಿಸಿ, ನಿಮ್ಮ ಕೋಪ ತೀರುವ ತನಕ ನನ್ನನ್ನು ಮರೆಮಾಡಿ, ನನಗೆ ನಿಶ್ಚಿತ ಕಾಲವನ್ನು ಗೊತ್ತುಪಡಿಸಿ, ನನ್ನನ್ನು ಜ್ಞಾಪಿಸಿಕೊಂಡರೆ ಎಷ್ಟೋ ಒಳ್ಳೆಯದು! ¹⁴ಮನುಷ್ಯನು ಸತ್ತರೆ, ಅವನು ಪುನಃ ಬದುಕುವನೇ? ನನ್ನ ನವೀಕರಣವು ಬರುವ ತನಕ, ನನ್ನ ಕಠಿಣ ಸೇವೆಯ ಎಲ್ಲ ದಿನಗಳಲ್ಲಿ ನಾನು ಕಾಯುವೆನು. ¹⁵ನೀವು ಕರೆಯುವಿರಿ, ನಾನು ನಿಮಗೆ ಉತ್ತರ ಕೊಡುವೆನು; ನಿಮ್ಮ ಕೈಕೆಲಸಕ್ಕಾಗಿ ನೀವು ಹಂಬಲಿಸುವಿರಿ. ¹⁶ಆಗ ನೀವು ನನ್ನ ಹೆಜ್ಜೆಗಳನ್ನು ಎಣಿಸುವಿರಿ; ನನ್ನ ಪಾಪದ ಮೇಲೆ ನೀವು ಕಣ್ಣಿಡುವುದಿಲ್ಲ. ¹⁷ನನ್ನ ದ್ರೋಹವು ಚೀಲದಲ್ಲಿ ಮುದ್ರೆಹಾಕಲ್ಪಡುವುದು, ನೀವು ನನ್ನ ಪಾಪವನ್ನು ಮುಚ್ಚಿಬಿಡುವಿರಿ.

¹⁸“ಆದರೆ ಬೆಟ್ಟವು ಬಿದ್ದು ಪುಡಿಪುಡಿಯಾಗುವಂತೆ, ಬಂಡೆ ತನ್ನ ಸ್ಥಳದಿಂದ ಜರುಗುವಂತೆ, ¹⁹ನೀರು ಕಲ್ಲುಗಳನ್ನು ಸವೆಸುವಂತೆ, ಅದರ ಪ್ರವಾಹಗಳು ಭೂಮಿಯ ಮಣ್ಣನ್ನು ಕೊಚ್ಚಿಕೊಂಡು ಹೋಗುವಂತೆ, ನೀವು ಮನುಷ್ಯನ ನಿರೀಕ್ಷೆಯನ್ನು ನಾಶಪಡಿಸುತ್ತೀರಿ. ²⁰ನೀವು ಅವನನ್ನು ಸದಾಕಾಲಕ್ಕೂ ಜಯಿಸುತ್ತೀರಿ, ಅವನು ಗತಿಸಿಹೋಗುತ್ತಾನೆ; ಅವನ ಮುಖವನ್ನು ವಿಕಾರಗೊಳಿಸಿ ಅವನನ್ನು ಕಳುಹಿಸಿಬಿಡುತ್ತೀರಿ. ²¹ಅವನ ಮಕ್ಕಳು ಗೌರವಕ್ಕೆ ಬಂದರೂ ಅವನಿಗೆ ತಿಳಿಯದು; ಅವರು ಕುಗ್ಗಿಸಲ್ಪಟ್ಟರೂ ಅವನು ಗಮನಿಸನು. ²²ಅವನು ತನ್ನ ಸ್ವಂತ ದೇಹದ ನೋವನ್ನು ಮಾತ್ರ ಅನುಭವಿಸುತ್ತಾನೆ, ತನಗಾಗಿ ಮಾತ್ರ ಅವನು ದುಃಖಿಸುತ್ತಾನೆ.”