Müt shanga maanglem ki lo?

Buham che tetbü dei lüm to nyibou longsenda, lausikei müt kho longda hoba aloenlabü. Jobei, haibü shuong langlabü lo dogo damenda, hoba ange danla shongko yemekoubü hoba touje leingaikubü dogo semda, hoba Mühghaüei dei laangei hangletbü tegü maanglem hangletda dogo lauda.

Chapter 14.

“Yaksa ka bukla kibü müt kho, chalou shisho ki, hoba thushedei jakakei. Hao chipen tegü longda hoba setda; hao yemekou tegü danda hoba alongeilabü. Nyi ho tegü müt to souhatda lo? Hoba nyi ngo no yoa matjemshang to leida sai? Aoei asaopobü ka saopobü che longtila thük? Aoeikei athük. Haoeibü chalou huongsepan kibü shanga, haoeibü lit lühbak kho no yoa ki, hoba hao danla athükbü leilang nyi sakkukei, Hao ka kaibü nyek sepeiashi, hao haksola shanga, hao mulambü müt tegü jembü chalou khangenla thenbü shongko.

“Aishanga bunyu shanga maanglem ki: kho akilonga, kho nyibou shoonglabü, hoba khübü shoongbü akhümlabü. Khübü li kaoa bausikei hoba khübü chung kaoa haiasikei, dei lüm to kho tongbü longtilabü hoba haanbü kelang tegü bhek shoonglabü. Lausikei müt haida hoba yantian apda; müt che hak hinda, hoba hao lato ki? Dei molo ka dankhümlabü tegü, hoba shumang khümko ulangda, Kho tegü müt yepda hoba aloenlabü; müh akiko apla shongko, hao apialabü ayingsi yepmang ka ashenlabü.

“Nyi ngo hee to huashi, kaibü ange danla shongko ngo satenashi, ngo shanga jih huongsepko phoashi, hoba ngo damenashi! Müt haialonga, hao nyibou langlabü lo? Kü aaoeibü khangenbü chalou pendoua ngei haisühda, kü haanbü yeibü longla shongko. Nyi ngalabü, hoba ngei ka to jongailabü; nyi kaibü ik kümbü shanga haiyeilabü. Aishanga kheijinei nyi ngeibü younak paklabü; nyi kü shabü to amaangsanglabü. Ngeibü ngühkhüm lulimbü nyungkaia thipbü kilabü, hoba nyi kü shabü naanglabü.

Lausikei shongh atan leilulaje, hoba laang jembü kishang ka sunglanglaje, deiei laang to leiludaje, hoba khoeibü deishouei kaodak sekmou haman apdaje, kho tegü nyi müteibü maanglem kho mautila. Nyi hao to ponpen thükada, hoba hao danda; nyi haoeibü thenyek mak kaktida hoba hao sattida. Haoeibü shousi shuongei soneikangbü hapda, hoba haoei kho angeda; haoen yantida, hoba haoei kho adamda. Haoei jembü mang onat ong damda, hoba haoei himshuong shanga ong haapda.”