Miwui Vang Kachihān Leila?
Thingrong katathailala tara̱wui nganamna shonluira, kha mi chi pichizanda mathuiluimara. Kathiabing ringluirala da Jobna phaninga, malungkhavāt mavānranglakha eina tangda thumhaida, chiwui thili ali ngakaoluiki kaji ngaraiya; kala tara̱na lungguili malekthuiya thāda Varena miwui kachihān sākhaimi da hānga.
14 1"Sha̱naowui eina pharā mi hi, awui mirin sha̱sang kakhanang eina pemtinghai. 2Ana awon thāda shokta ngahuihaowa; khaya̱ thāda yāmzatta maleichingmara. 3Hikathā mili nana namik yangchinga? Kala ili na eina bicharli khuirāra? 4Makatharwui eina khipāna kathara akha khuishokshapkhala? Khipākhala maleimana. 5Awui mirin ngarānda leiwui vang, awui kachāngbing mashing chi na eina lei, kala ana makānshok khavai nana thari sākhammihai, 6awui eina namik yangkharokmi, chieina ngalang kaphei mi thāda awui atam otram peiuranglakha eina tangda a ngasāmranu.
7"Thingrong akhawui vang kachihān lei: chi ta̱teklaga, latluida shonshokra, kala awui ashonbing makaimara. 8Awui angayung ngaleili rarhaolala, kala awui angunrum ngaleili thihailala, 9Tara̱wui anganam tharan china awon wonra, kala mateka kadhar thāda aphāng shokra. 10Kha mi akhana thihaida kongluihaowa; mi akhana khaksui peiuda thivāhaowa, kala a kali lei? 11Ngayiwui eina tara̱ shimānhaowa thāda, kala kongna thenghaida kānhaowa thāda, 12Chithāda mi akhana ngaraichāda, mangakarthukmara; kazingram makhalei eina tangda, a mathuilakmara, lah awui pikakhuiwui eina mathotkhuimara.
13"Nana ili chikhurli thummira, nawui malungkhavāt kāshunglak eina tangda ili thumhaimiranu, iwui vang atam sākhuida, kala ili phaningungmiranu! 14Mi akhana thihaiakha, a ringluishitra? Iwui pharā khangasak rāranglakha eina tangda, iwui ot chot atam saikorali ina hondalei. 15Nana ngakaora, kala ina nali ngahānkāra; nana napāngwui themsak ningkachānga. 16Chi tharan nana iwui pheikārbing thuimira; iwui morei nana mayonpammara. 17Iwui salāng chi akhao akhali mahor namda haikahaina, kala iwui morei nana farormihaora.
18"Kha kaphung akha tekhaira sākazamhaowa, kala lunghār akha apam eina ngacheihaowa thāda, 19tara̱na lunggui chotngasakta, kala awui zingrotna ngaleiwui lui khuithuihao; chithāda nana miwui kachihān shimān ngasaka. 20Nana ali mashimānla yuihaira, kala a ngara̱thuihaowa; nana amai sākhamāng ngasakta ali chihovāhaira. 21Awui naomayarabing khayākakā samphanghaira, kala ana matheimana; athum maishi ngasakhaira, kala ana mayangmana. 22Ana akhalattawui phasāwui kachotmāng khanamyanga, kala ana akhalattawui vangmāng chapngachāra."
