Jobna Awui Ngasotnaobingli Ngahānkai
Jobna awui ngasotnaobingli, nathum aremawui khanongmāng, kakapik tui eina teimachara misera, da hānga, kala athumna awui vang kakapik eina hāngkhavaiwui vang Varena ningyāng maungmimara da hāngmachina. Ana Vare khalatta eina awui mashun hāngphatchāng: ana ili sāthathaolala, I ali kachihān ngasāra. Chiwui thili, khisāda namai ngathumhaikhala?
13 1"Yanglu, imik eina saikora hi theihaira; ikhanā eina shāhaira kala theishingkhuihaira. 2Nathumna kathei chi inala thei; I nathumli mangazanmeimana. 3Kha ina Sāshap-pangshapali hāngphalungra, kala Vare eina iwui tuingaphun ngayātkhavai ningchānga. 4Kha nathumna khangui eina leishi-leishai neokatotmihai; nathum saikora makānkhanā khanongbingna. 5Nathumna kasaikha pamchaosi kaja, chi nathumwui thangkhamei ngasāra! 6Ara iwui hāngkapapai nganālu, kala imorchaiwui kapo nganākhuilu. 7Nathumna Varewui vang kapik tui hāngmirala kala awui vang mikhanam tui hāngmirala? 8Nathumna ali mijang sāmirala? Nathumna Varewui vang ngayātmirala? 9Ana nathumli yanglak tharan nathumwui vang kaphā sārala? Lah mi minam thāda nathumna ali minam ngasakshaprala? 10Nathumna ngathumda mijang saakha, kachangkhata ana nathumli khararra. 11Awui khayākakāna nathumli ngachee ngasakmarala, kala ali khangacheena nathumwuitungli rāshokmirala? 12Nathumwui chānsam chi hotlāwui chānsamna; nathumwui raipanbing leikhon eina sākahaina.
13"Iwui mangāli kasaikha pamlu, kala ina hāngranu; khikha kharaakha iwuitungli rāshokhaoranu. 14Khisāda ina iwui asā hamlaga khavaira kala iwui mirin ipāngli khuira? 15Ana ili sāthatlala, ina ali chihānra; chithālala awui mangāli iwui shongfa ngahātra. a a v15 Awui khamayā hānglakli khaleilala, Jobwui shitkasangna Varewui shong sāri. Vare eina awui ningkathar khongnaokahai chi thili tangda rāra—Job lairikwui akatangli ithumwui Avāli mashā eina theisa. 16Hi tākam eina iwui huikhami sāra, kaja vare makathei mi khipānakha awui mangāli ngazekta rārarmana. 17Iwui tui ning ngasharda nganālu; iwui phongshok nathum khanāli rāshungranu. 18Yanglu, iwui tuingaphun ngarān kahaina; ili kanmira kaji ina thei. 19Khipāna ili ngasungra? Kaja chithākha ina kasaikha pamda thira.
20"Thing khani maningla ili milu, chitharan ina namaiwui eina khalatta mathumhaora: 21Napāng iwui eina katāli khangtāhaolu, kala nawui khangacheena ili machipā ngasakaranu. 22Chitharan ngakaolu, ina ngahānkāra; lah ina hāngngasaklu, chitharan nana ili ngahānkāmilu. 23Iwui khayonkhamāng kala iwui morei kayākhakhala? Iwui makaphā kasāsā kala iwui morei ili chitheimilu. 24Khisāda namai thumhaida ili nawui yangkashena da shānkhuikhala? 25Masina phanthui kahai thingnā nana sāmachitra, kala khangatei lanji chi kharomra? 26Kaja nana iwuitungli kakhā otsak kakapi, kala iwui nganuilakhawui morei ili samphang ngasaka. 27Nana iphei zurthing sanga, kala iwui kazazat saikora nana yanga; ipheimayāwui vang nana thari sāsanga.
28"Chiwui vang eina mina thingpār kathāda, makungna shaikahai kachon thāda thenghaira."
