Mi eng' bukuit
Bukuit

Kowolji Job Choronokyik

Koguure Job tupchosyekyik chepkerichinik che ma nyolu, che laach lembech, ak koriichi kole ma koitchini Kamuktaindet amu ki kotoret ineendet eng' lembech. Machei kopolyo ng'aleekyik ak Kamuktaindet inyeegei: agot kobara, amang'u ineendet. Yeityo, amu nee si iuny taing'ung'?

Sura 13.

“Keero, kageer kondanyu tuguuchu tugul; kagas itinnyu ak kaanai niito. Ne ingen okweek, angen anee ako; ma osiirwo okweek. Ago amache ang'alaalji Ne po Kamuktaet, ak amache miising' apolyo ng'aleekyuk ak Kamuktaindet. Ago otumdei lembech okweek; okweek ko chepkerichinik che ma nyolu tugul. Oyae osiis komugul — ko noo ne ki koek utaatyeng'wong'! Nguno ogas polyoennyu, ak ogas soometap kutinnyu. Tos ong'alaalji Kamuktaindet eng' lembech, ak ong'alaalji ineendet eng' berberet? Tos otiytiy ineendet? Tos ong'alaali otoreti Kamuktaindet? Tos komyee kobootok ye keerei ineendet okweek? Anan omuuchi oberber ineendet ko uu ye oberberei chiito? Iger kong' ineendet okweek komanda, ngot otiytiy piik eng' mutyo. Tos ma imuisei telunatennyi okweek, ak kobut okweek iyweetanyi? Kalewenaikwok ko kalewenaigap oreek; long'enikwok ko che po ng'ung'unyek.

“Osiis eng' tainnyu, ak ang'alaal; ingobunjo kiy age tugul ne nyoonei. Amu nee si anam panyeknyu eng' burgeet, ak anam saboondanyu eunnyu? Agot kobara, amang'u ineendet; ago ang'alaal agobo ortinwekyuk eng' tainnyi. a a v15 Agot eng' ng'aleekyik che yoe, koriei kiyomsetap Job agobo Kamuktaindet. Nyoonei tai kaboroonetap imanda ne oo kiyaton — keer Job Kwandanyo tai eng' tai eng' letap bukuit. Noo ako ko sarunennyu, amu ma gany chiito ne ma po Kamuktaindet konyo tainnyi. Ogas komyee ng'aleekyuk; ingoiit kaimwaennyu itiikwok. Keero, kaachop kirwookyinnyu; angen ale ayaaktochigei. Ng'oo ne boryo ak anee? Amu nooto ko asiis ak ame.

“Goonwo tuguuk aeng' kityo, si matuun aung'egei eng' taing'ung': Iste eung'ung' loo eng' anee, ak metuun iyweisya iyweetang'ung'. Yeityo iguur, ak awolun; anan ang'alaal, ak iwolwoo. Chaang' ata yaityonikyuk ak tengekwogikyuk? Iboorwo pistoennyu ak tengektonyu. Amu nee si iung'e togeng'ung' ak ibwaatwo ko aa punyondeng'ung'? Tos iyweisyei sogoot ne iwirtoei usoonet, ak ioone mobeek che yaamaat? Amu isirchi tuguuk che ng'woneen agaigai anee, ak iyaei apunu tengekwogigap ming'inatennyu. Inde keelyekyuk eng' ratuutik ak iriip ortinwekyuk tugul; inde ole poochitu keldebesaigap keelyekyuk.

“Kou nooto ko betito chiito ko uu keetit ne kabetak, ko uu ngoryeet ne kagaam suumeek.”