UYobhi Uphendula Abahlobo Bakhe
UYobhi ubabiza abahlobo bakhe ngamagqirha angento yanto aqaba ngobuxoki, aze alumkise ukuba uThixo akayi kuwabulela ngokumthethelela ngenkohliso. Ufuna ukumangalelana noThixo ngokwakhe: nokuba angandibulala, ndiya kuthemba kuye. Aze athi, yini na ukuba usifihle ubuso bakho?
13 1“Yabona, iliso lam likubonile konke oku; indlebe yam ikuvile yakuqonda. 2Oko nikwazi, nam ndiyakwazi; andingaphantsi kuni. 3Kodwa mna bendiya kuthetha kuSomandla, ndilangazelela ukumangalelana noThixo. 4Kodwa nina niqaba ngobuxoki; ningamagqirha angento yanto nonke. 5Akwaba beningathi tu—oko ngebubulumko benu! 6Phulaphulani ngoku ukubambana kwam, niphulaphule isikhungo semilebe yam. 7Ningamthethelela na uThixo ngobuxoki, nimthethelele ngenkohliso? 8Ningamkhethela na ubuso? Niya kummela na uThixo? 9Ingaba kuya kulunga na kuni xa enikhangela nina? Okanye ningamkhohlisa na njengoko ningakhohlisa umntu? 10Inene uya kunikhalimela ukuba nithe nakhetha ubuso ngasese. 11Ubungangamsha bakhe abuyi kuninkwantyisa na, noloyiko lwakhe luwe phezu kwenu? 12Amazwi enu ayimizekeliso yothuthu; amakhaka enu ngawodongwe.
13“Yithini tu phambi kwam, ndithethe; makundiwele nokuba kuyintoni na okuzayo. 14Yini na ukuba ndiyibeke engozini inyama yam, ndibuthabathe ubomi bam ezandleni zam? 15Nokuba angandibulala, ndiya kuthemba kuye; noko ndiya kuzithethelela iindlela zam ebusweni bakhe. a a v15 Nasekuchaseni kwakhe, ukholo lukaYobhi lufikelela kuThixo. Ukuqhawuka okupheleleyo kobudlelane kuza kamva — uYobhi umbona uBawo wethu ubuso ngobuso ekupheleni kwale ncwadi. 16Noku kuya kuba lusindiso lwam, kuba akukho mntu ungenaThixo onokulinga ukuza phambi kwakhe. 17Waphulaphuleni ngenyameko amazwi am; isibhengezo sam masifike ezindlebeni zenu. 18Yabonani, ndilungisile ityala lam; ndiyazi ukuba ndiya kugwetyelwa. 19Ngubani na oya kubambana nam? Kuba ngoko bendiya kuthi tu ndife.
20“Ndiphe kuphela izinto ezibini, ndandule ukungazifihli ebusweni bakho: 21Susa isandla sakho kude kum, ungavumi ukuba uloyiko lwakho lundinkwantyise. 22Wandule ubize, ndiphendule; okanye ndithethe, undiphendule. 23Zingaphi na iziphoso zam nezono zam? Ndibonise ukreqo lwam nesono sam. 24Yini na ukuba usithelise ubuso bakho, undithathe njengotshaba lwakho? 25Uya kuligubhisa na igqabi eliphetshethwa ngumoya, usukele umququ owomileyo? 26Kuba ubhale izinto ezikrakra ngam, undidlise ilifa izono zobutsha bam. 27Uzibeke iinyawo zam esikhondweni, ubonisele zonke iindlela zam; umise umda kwiintende zeenyawo zam.
28“Ngoko umntu uyonakala njengomthi obolayo, njengengubo edliwe ngamanundu.”
