Ayubu Acookeria Arata Ake
Ayubu eeta arata ake aganga a tũhũ arĩa magemagia na maheeni, na akamakaania atĩ Ngai ndakamacookeria ngaatho nĩ kũmũrũĩrĩra na wara. Enda gũciirithania na Ngai we mwene: o na angĩnjũraga, nĩngwĩhoka harĩ we. Agacooka akooria, nĩkĩ ũhithaga ũthiũ waku?
13 1Ta rorai, riitho rĩakwa nĩrĩonete maũndũ maya moothe; gũtũ gwakwa nĩkũiguĩte na gũkĩmenya ũhoro ũcio. 2Maũndũ marĩa inyuĩ mũũĩ, o na niĩ nĩndĩmooĩ; ndirĩ mũnini kũrĩ inyuĩ. 3No niĩ ingĩenda kwaria na Mwene-Hinya-Wothe, na nĩ ndĩĩriragĩria gũciirĩrĩra ciira wakwa harĩ Ngai. 4No inyuĩ mũgemagia maũndũ na maheeni; inyuothe mũrĩ aganga a tũhũ. 5Naarĩ korwo mũngĩkira biũ—ũcio nĩguo ũngĩtuĩka ũũgĩ wanyu! 6Rĩu iguai kĩhooto gĩakwa, na mũthikĩrĩrie mathaithana ma mĩromo yakwa. 7Anga nĩmũkwaria maheeni mũgĩciirĩrĩra Ngai, na mwarie ũhinga nĩ ũndũ wake? 8Anga nĩmũkũmũtĩĩra maũthĩ? Anga nĩmũgũciirĩrĩra Ngai? 9Anga nĩ ũndũ mwega ũngĩmũkora rĩrĩa akaamũtuĩria? Kana no mũmũheenie o ta ũrĩa mũngĩheenia mũndũ? 10Ti-itherũ nĩakamũrũithia mũngĩtĩĩra andũ maũthĩ na hitho. 11Anga riiri wake ndũngĩmũmakia, na guoya wa gwĩtigĩra ũmũgwĩrĩre? 12Ciugo cianyu cia ũũgĩ nĩ thimo cia mũhu; ngo cianyu nĩ cia rĩũmba.
13Kirai ki mbere yakwa, na mũreke njarie; na ũrĩa wothe ũngĩnguora ũngwĩre. 14Nĩkĩĩ ingĩĩigĩrĩra mwĩrĩ wakwa ũgwatiinĩ, na njoe muoyo wakwa na moko makwa mwene? 15O na angĩnjũraga, no niĩ nĩngwĩhoka harĩ we; no rĩrĩ, nĩngaciirĩrĩra mĩthiĩre yakwa mbere yake. a a v15 O na arĩ thĩinĩ wa gũteta gwake, wĩhoko wa Ayubu nĩũrorete na kũrĩ Ngai. No ũiguano mũkinyanĩru wa ngwatanĩro ũgaakinya thuutha—Ayubu nĩakoona Ithe witũ ũthiũ kwĩ ũthiũ mũthiainĩ wa ibuku rĩĩrĩ. 16Ũndũ ũyũ o naguo nĩguo ũgaatuĩka ũhonokio wakwa, nĩgũkorwo gũtirĩ mũndũ ũtarĩ na ũngai ũngĩũmĩrĩria gũũka mbere yake. 17Thikĩrĩriai wega ciugo ciakwa; ũhoro ũrĩa ndĩramwĩra ũkinye matũinĩ manyu. 18Ta rorai, nĩndĩĩhaarĩirie ciira wakwa; nĩnjũĩ atĩ nĩngatuuo mũthingu. 19Nũũ ũngĩciira na niĩ? Nĩgũkorwo hĩndĩ ĩyo ingĩkira ki, ngue.
20No maũndũ meerĩ marĩa ngũkũhooya ũũhe, nĩguo ndikehithe ũthiũinĩ waku: 21Ruta guoko gwaku kũraihu na niĩ, na ndũgetĩkĩrie guoya waku ũũmakie. 22Hĩndĩ ĩyo wĩtane, na niĩ nĩngwĩtĩka; kana ũreke njarie, nawe ũnjookerie. 23Mahĩtia makwa na mehia makwa nĩ maigana? Nyonia ũremi wakwa na rĩĩhia rĩakwa. 24Nĩkĩĩ ũhithaga ũthiũ waku, na ũkandua thũ yaku? 25Anga nĩũkũmakia ithangũ rĩrahurutwo nĩ rũhuho, na ũteng'erie mahuti momũ? 26Nĩgũkorwo nĩ ũndĩkaga maũndũ marũrũ ũkĩnjũkĩrĩra, na ũgatũma ngae mehia ma wĩthĩ wakwa. 27Wĩkagĩra magũrũ makwa mĩĩhingoinĩ, na ũkaroraga njĩra ciakwa ciothe; ũgekagĩra mũhaka ikinyainĩ cia magũrũ makwa.
28Nĩ ũndũ ũcio mũndũ athiraga ta mũtĩ ũbuthĩte, o ta nguo ĩrĩĩtwo nĩ memenya.