Job 13

13 ¹“Tan-awa, nakita sa akong mata kining tanan; nadungog kini sa akong dalunggan ug nasabtan. ²Ang inyong nahibaloan, nahibaloan ko usab; dili ako ubos kaninyo. ³Apan buot kong mosulti sa Labawng Makagagahom, ug nangandoy ako nga ipangatarongan ang akong kahimtang sa Dios. ⁴Apan nagbulit kamo ug bakak; mga mananambal nga walay pulos kamong tanan. ⁵Kon maghilom pa lang unta kamo sa hingpit—kana mao unta ang inyong kaalam! ⁶Karon paminawa ang akong pangatarongan, ug patalinghogi ang pangaliya sa akong mga ngabil. ⁷Mosulti ba kamo ug bakak alang sa Dios ug mamakak alang kaniya? ⁸Mopabor ba kamo kaniya? Ipangatarongan ba ninyo ang kahimtang sa Dios? ⁹Maayo ba ang madangatan ninyo kon susihon niya kamo? O malimbongan ba ninyo siya sama sa paglimbong ninyo sa usa ka tawo? ¹⁰Sa pagkatinuod badlongon gayod niya kamo kon sa tago kamo mopabor. ¹¹Dili ba molisang kaninyo ang iyang pagkahalangdon, ug ang kahadlok kaniya mohugpa kaninyo? ¹²Ang inyong mga sanglitanan mga panultihon nga abo; ang inyong mga salipdanan hinimo sa yutang kolonon.

¹³“Paghilom kamo sa akong atubangan, ug tugoti ako nga mosulti; tugoti nga modangat kanako ang bisan unsay moabot. ¹⁴Nganong ibutang ko man sa katalagman ang akong kaugalingong unod ug kuptan ang akong kinabuhi sa akong kaugalingong mga kamot? ¹⁵Bisan patyon niya ako, molaom gihapon ako kaniya; apan panalipdan ko ang akong mga pamaagi sa iyang atubangan. ^a a v15 Bisan sa iyang pagsupak, ang pagsalig ni Job midangat gihapon ngadto sa Dios. Ang bug-os nga kalamposan sa relasyon moabot sa ulahi—nakita ni Job ang atong Amahan nawong sa nawong sa kataposan sa basahon. ¹⁶Kini usab mahimong akong kaluwasan, kay walay tawong walay Dios nga mangahas sa pag-atubang kaniya. ¹⁷Paminawa pag-ayo ang akong mga pulong; padangata sa inyong mga dalunggan ang akong pahayag. ¹⁸Tan-awa, giandam ko na ang akong kahimtang; nasayod ako nga mapakamatarong ako. ¹⁹Kinsa ang makiglantugi kanako? Kay kon mao, maghilom ako ug mamatay.

²⁰“Duha lang ka butang ang ihatag kanako, ug unya dili ako motago gikan sa imong atubangan: ²¹Ipahilayo ang imong kamot gikan kanako, ug ayaw itugot nga molisang kanako ang kahadlok kanimo. ²²Unya tawag, ug motubag ako; o tugoti ako nga mosulti, ug ikaw motubag kanako. ²³Pila ka buok ang akong mga kalapasan ug mga sala? Ipakita kanako ang akong pagsupak ug ang akong sala. ²⁴Nganong gitagoan mo man ang imong nawong ug giisip mo ako nga imong kaaway? ²⁵Hadlokon mo ba ang dahon nga gipalid sa hangin ug gukdon ang laya nga uhot? ²⁶Kay nagsulat ka ug mapait nga mga butang batok kanako ug gipapanunod mo kanako ang mga sala sa akong pagkabatan-on. ²⁷Gibutang mo sa sepohan ang akong mga tiil ug gibantayan mo ang tanan kong agianan; nagbutang ka ug utlanan alang sa mga lapalapa sa akong mga tiil.

²⁸“Busa ang tawo nagakadunot sama sa dunot nga kahoy, sama sa bisti nga gikaon sa tangkob.”