Jobei haoeibü thangbou shuong to jongaida
Jobei haoeibü jaisi shuong to kokshouei yukkubü, jim akibü moli shuong dogo laukei, hoba Mühghaüei dishon ongkei hao shanga yepeijaweko lenbü shanga kan to athangtetlabü dogo lenkei. Haoei himshuong Mühghaü yoa haoeibü mat oyola lamda: haoei ngo haitikei yingasikei, ngei hao ka maanglemlabü. Kheijinei, aila nyi phe to jemten ka kuda?
13 1“Chühashi, ngeibü nyekei ho pendou hapa; ngeibü nouei ditkei hoba dambukei. 2Kanei ai ngebü, ngeikei kho ngeda; ngo kan to hanbü aying. 3Lausikei ngei Thükenbou to joyola mangsühda, hoba ngei Mühghaü yoa kü mat shanga oyoda haiyeida. 4Lausikei kanei amlangbüei yukkuda; kan pendou jim akibü moli shuong ki. 5Kanei lemailela semele kikei yingma— kho kaneibü songsihon yeitilabü! 6Tou ngeibü mat ditashi, hoba ngeibü sembungeibü subüjabü ngüha leashi. 7Kanei Mühghaü shanga amlangbü lauan hao shanga yepeijaweko laulabü lo? 8Kanei hao to the chühlabü lo? Kanei Mühghaü shanga mat oyolabü lo? 9Haoei kan takteilaje, kan la maila lo? Ayingsi müt che huonettibü tegü, kanei hao huonettila thükkei lo? 10Kanei hangsho theto chühlaje, Haoei kan to maimaitham haklabü. 11Haoeibü thükkabouei kan to ajemtenlep lo, hoba hao hatbüei kan thüka asühlep lo? 12Kaneibü tetenbü ngüh kho tapeibü tetenbü ngüh ki; kaneibü aih shuong kho thamchak kümbü ki.
13“Kan kü thedanga sangsembo kijan, hoba ngei laukho; ai ong loulaje kho kü thüka sühshima. 14Ngei aila kü phe to jemten ka kula, hoba kü langkei kü ika jungla? 15Haoei ngo haitikei yingasikei, ngei hao ka maanglemlabü; khei yingasikei ngei hao thedanga ngeibü lam shuong shanga tokyobü. a a v15 Haoei meimei lauda sünga dogokei, Jobeibü mailembü kho Mühghaü jungto nyangda. Mühghaü yoa thenbü penbüsoubü kho phaia longlabü—ho lai hainang ka Jobei seneibü Bou theshuok hapda. 16Hokei ngeibü delila kilabü, aishanga Mühghaü akibü mütei hao thedanga loula athükkei. 17Ngeibü ngüh to maangsangko ditjan; hoba ngeibü aukabü kaneibü nou to loutishima. 18Chühashi, ngei ngeibü mat lamlekei; ngo khümenlabü dogo ngei ngekei. 19Aoei ngo khulimbo tokyobü? Aishanga kheijinei ngo semele kian ühailabü.
20“Kü shanga thinei nyi kümshima, kheijinei ngo ka the ka ngo lolo ahulabü: 21Kaibü ik ngo ka saabü sungngaiashi, hoba kaibü hatbüei ngo teaito. 22Kheijinei ngaashi, hoba ngei jongailabü; ayingsi ngei joyokho, hoba nyi kü to jongaiashi. 23Ngeibü shedbü hoba ngeibü shabü lalokche? Ngeibü ngühkhüm lulimbü hoba ngeibü shabü kü la lenashi. 24Nyi aila kaibü thenyek hula, hoba ngo kaibü dangbou tegü daman chühda? 25Nyi pik soujung satbü to aitolabü, hoba sho ulangbü to shieilabü lo? 26Aishanga nyi ngo khulimbo khauekbü shuong doda, hoba ngeibü mütaoabü shabü ngo künkutida. 27Nyi ngeibü you buei khühla, hoba ngeibü lam pendou lombo kida; nyi ngeibü you phang shanga thonbü phokuda.
28“Kheijinei müt bu lusabü tegü, meisiauei shaubü nei tegü maulabü.”
