Jobei Jongaida
Jobei thesatbü ngüh to thesatbü ngühei jongaikei, songsihon kan yoa hailabü dogo; kheijinei meisiau hoba au shuong keiei seneibü Bou ikei ho kümbei dogo angekei dogo lauda. Haoeibü ngüh damanchühbü aying: Mühghaüei damanchühbou shuong, matjembou shuong, ungshedbou shuong hoba choba shuong to insiaubu sungngaida, hoba kaodakbü leiyeibü shuong to mühyaaka nyamnyamko settibü yeitida.
12 1Kheijinei Jobei jongaikei: 2“Maimaitham kan ong mütshuong ki, hoba songsihon kan yoa ühailabü. 3Lausikei ngokei maang kia, kan tegütham; ngo kan tokei shishobü aying. Ho tegü thinei aoei angekei? 4Ngo kü jenabou shuong thedanga theshatbü yeia—ngo, aoei Mühghaü to welaukei hoba haoei kü to jongaikei; shabü akibü hoba mubü müt che, tou theshatbü yeikei. 5Sangmaia kibü shuongei khonsak to liman yeida— you tuongbü shuong shanga lamlean kibü wapbü che ki. 6Yepeijawebü neichem sangmaia kia, hoba Mühghaü to khau angtibü shuong khümetangetan kia—aoei lulueibü mühghaü haoeneibü ika künda. a a v6 Aoei lulueibü mühghaü haoeneibü ika künda: Mühghaü to limban haoen lolo lulueibü hau to aeibou mailembü müt shuong ki. 7Lausikei meisiau to pheashi, hoba haoenei kan to lenlabü; mühkabü au shuong, hoba haoenei kan to ngetilabü; 8Ayingsi kaodak to joyoashi, hoba khoei kan to lenlabü; hoba yungnyua kibü ngau shuongei kan to wanenkulabü. 9Ho pendou yoa aoei seneibü Bou ikei ho kümbei dogo angekei? b b v9 Haoeibü jenabou müt sem yoa saabü lemenbü danko, hanei ong Jobei seneibü Bou to haoeibü nyen aeto ngada—haoeibü jenabou shuongei ladangkei ala kula ngebü nyen ki. Haoeibü maangei, thensilen yoa kijinei, tou haoei shaangie ngebü Bou aeto nyangda. 10Haoeibü ika lang kibü pendoueibü langkei hoba müt khunakshousi pendoueibü hak kia. 11Sembungei haoeibü shausiyung jemoubü tegü, noukei ngüh to atakteilep lo? 12Songsihon kho jaishou shuong yoa hapda, hoba ditenbü chalou lengbü yoa hapda. 13Songsihon hoba kaangbü hao yoa kia; dambü hoba ditenbü haoeibü ki. 14Haoei ai leiluda, kho nyibou kümla athük; haoei shuthelabü müt nyibou litila athük. 15Haoei dei to khangenalonga, kho ulangtham yeilabü; haoei kho litialonga, khoei kaodak to küpleplabü. 16Hau hoba songsihon hao yoa kia; khüpettibü müt hoba khüpettibou ham haoeibü ki. 17Haoei damanchühbü shuong hangletnyu leian hauda, hoba matjembü shuong to ngoubü la yeitida. 18Haoei Choba shuongei kümbü janglüh leilutila, hoba haoeneibü senou neida. 19Haoei ungshedbou shuong hangletan leian hauda, hoba danbü thon kibü shuong tuongtila. 20Haoei mailembü shuongeibü sembung üangti, hoba jaishou shuongeibü hapbü ngebü sungngaila. 21Haoei konglebü shuong thüka himou lottida, hoba hau kibü shuongeibü seisihau sungngaila. 22Haoei nakthüh ka thinei haübü khittida, hoba yemkao ngesakbü to sungbada. 23Haoei phangshuong yaang yeitida, kheijinei haoen mautila; haoei phangshuong yaangentiko, kheijinei haoen leian hauda. 24Haoei kaodak leiyeibü shuongeibü maangpon sungngaila, hoba haoen lam akibü sekmanga shoongaiko hautida. 25Haoen ngesakbü ai akiko nakthüh phanga shongan chühko paida, hoba haoei haoen ihei jaakbü müt tegü shoongaitida.”
