Jobho 14 FHB Father's Heart Bible™

14 ¹“Munhu, akaberekwa nomukadzi, ane mazuva mashoma uye azere nenhamo. ²Anomera seruva ndokusvava; anotiza somumvuri uye haagari. ³Munotarisisa munhu akadaro here? Uye munondiuyisa mukutongwa nemi? ⁴Ndiani angabudisa chinhu chakachena kubva pane chisina kuchena? Hapana. ⁵Sezvo mazuva ake akatarwa, kuwanda kwemwedzi yake kuri kwamuri, uye makatara miganhu yaasingagoni kudarika, ⁶fulatirai kwaari, kuti azorore, kusvikira apedza zuva rake somushandi wemaricho.

⁷“Nokuti pane tariro kumuti: kana wakatemwa, uchamerazve, uye mabukira awo haangakundikani. ⁸Kunyange mudzi wawo ukachembera muvhu uye chigutsa chawo chikafa muvhu, ⁹pakunhuhwa kwemvura uchabukira uye uchabudisa matavi sechirimwa chitsva. ¹⁰Asi munhu anofa agoradzikwa pasi; munhu anopedza kufema, zvino aripi? ¹¹Semvura inopera mudziva, uye sorwizi runopwa ndokuoma, ¹²saizvozvo munhu anorara pasi uye haamuki; kusvikira matenga ashaikwa, haangamuki kana kumutswa pahope dzake.

¹³“Dai maingondiviga muguva, mugondihwanda kusvikira hasha dzenyu dzapfuura, mugotara nguva yakatarwa yangu, mugondirangarira! ¹⁴Kana munhu akafa, achararamazve here? Mazuva ose okushanda kwangu kunorema ndaimirira, kusvikira kuvandudzwa kwangu kwasvika. ¹⁵Maizodana, uye ndaizopindura imi; maizoshuva basa ramaoko enyu. ¹⁶Nokuti ipapo maizoverenga nhanho dzangu; hamaizocherechedza chivi changu. ¹⁷Kumukira kwangu kwaizonamirwa muhomwe, uye maizofukidza chivi changu.

¹⁸“Asi somugomo unowa uchiputsika uchipera, uye sedombo rinobviswa panzvimbo yaro, ¹⁹semvura inopera mabwe uye mafashamo awo anokukura ivhu renyika, saizvozvo munoparadza tariro yomunhu. ²⁰Munomukunda nokusingaperi, agopfuura achienda; munoshatisa chiso chake mugomudzinga. ²¹Vanakomana vake vanokudzwa, asi haazivi izvozvo; vanoderedzwa, asi haacherechedzi. ²²Anongonzwa marwadzo omuviri wake chete, uye anongozvichema iye oga.”