ഇയ്യോബ് 14 FHB Father's Heart Bible™

14 ¹“സ്ത്രീയിൽനിന്നു ജനിച്ച മനുഷ്യൻ അല്പായുസ്സും കഷ്ടതനിറഞ്ഞവനും ആകുന്നു. ²പുഷ്പംപോലെ അവൻ വിരിഞ്ഞു വാടിപ്പോകുന്നു; നിഴൽപോലെ ഓടിയകന്ന് നിലനില്ക്കാതെപോകുന്നു. ³ഇങ്ങനെയുള്ളവന്റെമേൽ അങ്ങ് ദൃഷ്ടിവയ്ക്കുന്നുവോ? എന്നെ അങ്ങയോടൊപ്പം ന്യായവിധിയിലേക്കു കൊണ്ടുവരുന്നുവോ? ⁴അശുദ്ധമായതിൽനിന്നു ശുദ്ധമായത് ആർക്കു പുറപ്പെടുവിക്കാൻ കഴിയും? ആർക്കും കഴിയുകയില്ല. ⁵അവന്റെ നാളുകൾ നിർണയിക്കപ്പെട്ടിരിക്കുകയാലും, അവന്റെ മാസങ്ങളുടെ എണ്ണം അങ്ങയുടെ പക്കലായിരിക്കുകയാലും, അങ്ങ് വെച്ചിട്ടുള്ള അതിരുകൾ അവന് കടക്കാനാവാത്തതിനാലും, ⁶അവന് വിശ്രമിക്കാൻ കഴിയേണ്ടതിന് അവനിൽനിന്നു ദൃഷ്ടി തിരിക്കേണമേ, ഒരു കൂലിക്കാരനെപ്പോലെ അവൻ തന്റെ ദിവസം തികയ്ക്കുവോളം.

⁷“ഒരു വൃക്ഷത്തിനു പ്രത്യാശയുണ്ട്: അതു മുറിച്ചുകളഞ്ഞാലും വീണ്ടും തളിർക്കും, അതിന്റെ കൂമ്പുകൾ ഇല്ലാതാവുകയില്ല. ⁸അതിന്റെ വേര് ഭൂമിയിൽ പഴകിയാലും അതിന്റെ കുറ്റി നിലത്തു ചത്തുപോയാലും, ⁹വെള്ളത്തിന്റെ ഗന്ധമേറ്റാൽ അതു മുളയ്ക്കുകയും ഒരു പുതിയ തൈപോലെ കൊമ്പുകൾ പുറപ്പെടുവിക്കുകയും ചെയ്യും. ¹⁰എന്നാൽ മനുഷ്യൻ മരിച്ചു വീണുപോകുന്നു; മനുഷ്യൻ തന്റെ അന്ത്യശ്വാസം വലിക്കുന്നു, പിന്നെ അവൻ എവിടെ? ¹¹ഒരു തടാകത്തിൽനിന്നു വെള്ളം വറ്റിപ്പോകുന്നതുപോലെയും, നദി ക്ഷയിച്ചുണങ്ങിപ്പോകുന്നതുപോലെയും, ¹²അങ്ങനെ മനുഷ്യൻ കിടക്കുന്നു, എഴുന്നേല്ക്കുന്നതുമില്ല; ആകാശം ഇല്ലാതാകുവോളം, അവൻ ഉണരുകയോ തന്റെ ഉറക്കത്തിൽനിന്ന് എഴുന്നേല്പിക്കപ്പെടുകയോ ഇല്ല.

¹³“അങ്ങ് എന്നെ ശവക്കുഴിയിൽ ഒളിപ്പിക്കുകയും അങ്ങയുടെ കോപം കടന്നുപോകുവോളം എന്നെ മറച്ചുവയ്ക്കുകയും എനിക്കൊരു നിശ്ചിതസമയം നിയമിക്കുകയും എന്നെ ഓർക്കുകയും ചെയ്തിരുന്നെങ്കിൽ! ¹⁴മനുഷ്യൻ മരിച്ചാൽ അവൻ വീണ്ടും ജീവിക്കുമോ? എന്റെ കഠിനസേവയുടെ എല്ലാ നാളുകളിലും, എന്റെ നവീകരണം വരുവോളം, ഞാൻ കാത്തിരിക്കും. ¹⁵അങ്ങ് വിളിക്കും, ഞാൻ അങ്ങയോട് ഉത്തരം പറയും; അങ്ങയുടെ കൈകളുടെ പ്രവൃത്തിയെ അങ്ങ് വാഞ്ഛിക്കും. ¹⁶അപ്പോൾ അങ്ങ് എന്റെ കാലടികൾ എണ്ണും; എന്റെ പാപത്തെ അങ്ങ് സൂക്ഷിച്ചുനോക്കുകയില്ല. ¹⁷എന്റെ അതിക്രമം ഒരു സഞ്ചിയിൽ മുദ്രവച്ചടയ്ക്കപ്പെടും, എന്റെ പാപത്തെ അങ്ങ് മൂടിക്കളയും.

¹⁸“എന്നാൽ ഒരു പർവതം വീണു തകർന്ന് ഇല്ലാതാകുന്നതുപോലെയും, ഒരു പാറ അതിന്റെ സ്ഥാനത്തുനിന്നു നീങ്ങുന്നതുപോലെയും, ¹⁹വെള്ളം കല്ലുകളെ തേയ്ച്ചുകളയുന്നതുപോലെയും അതിന്റെ പ്രവാഹങ്ങൾ ഭൂമിയുടെ മണ്ണിനെ ഒഴുക്കിക്കളയുന്നതുപോലെയും, അങ്ങ് മനുഷ്യന്റെ പ്രത്യാശയെ നശിപ്പിക്കുന്നു. ²⁰അങ്ങ് അവനെ എന്നേക്കുമായി കീഴടക്കുന്നു, അവൻ കടന്നുപോകുന്നു; അവന്റെ മുഖം അങ്ങ് വികൃതമാക്കി അവനെ പറഞ്ഞയയ്ക്കുന്നു. ²¹അവന്റെ പുത്രന്മാർ ബഹുമാനം പ്രാപിക്കുന്നു, അവൻ അതറിയുന്നില്ല; അവർ താഴ്ത്തപ്പെടുന്നു, അവൻ അതു ശ്രദ്ധിക്കുന്നതുമില്ല. ²²തന്റെ സ്വന്തം ശരീരത്തിന്റെ വേദന മാത്രം അവൻ അനുഭവിക്കുന്നു, തന്നെക്കുറിച്ചുമാത്രം അവൻ വിലപിക്കുന്നു.”